二澳探秘行 (02Mar14)

貳零壹肆年參月貳日 - 二澳探秘行

大澳>二澳>大澳

1月頭遇怪事後因太過忙,所以攪下攪下去到3月頭先可以齊人再去實地考察

因今次有實際目的,所以無浪費時間直由大澳行入去,係番鬼塘村沿住河仔行,12點幾去到二澳,不過兩個月已好大變化,去到只識得舊大石同埋約略位置,連條石屎路都唔同晒,就係咁樣,二澳怪事又成為一個謎了

睇完當然又行番去大澳飲飲食食啦,途中慢慢行,經過大大少少灘位,見好多人掘蠔,係大澳食完野睇下野玩下貓咁5點左右就探車走了,二澳復耕後變化非常大同快,所以我地一無所獲,算了

[03/02/14]

Photo Link

盂蘭勝會(三十) - 大窩口地藏王菩薩寶誕

貳零壹貳年玖月拾伍號(柒月三十) - 大窩口地藏王菩薩寶誕

去到大窩口7點幾,又係開緊飯,現場所見唔見有打武跡象,有人問過原來係取消左,因為貴,所以又係白果,但就睇左陣白字戲,好睇呀.丫,仲有卒之知道台上掛果條係咩,我開頭以為係儀式野保平安順利之類既東西,原來係錢來的,要黎比台上既人加油,近睇原來係一張張一百蚊,開頭我仲估係符黎添,真有趣

另一邊經棚做緊儀式,但睇唔明做緊乜,睇左陣走人了

[15/09/12]
Photo Link <<<<<<<<<<<

盂蘭勝會(三十) - 長沙灣潮籍盂蘭勝會Part.02

貳零壹貳年玖月拾肆號(柒月廿九) - 長沙灣潮籍盂蘭勝會Part.02

之後就係送大士同派米,點解係送大士?因依度既化寶爐非常之遠,細既紙扎祭品可以係場內既鐵桶化,但大件既呢,就要嗌車車走羅去化,而派米呢,有樣我感覺唔係咁好,可能係地方大又係最後既盂蘭勝會,好似好講階級,人地果d感覺冇咁重,只係一心做好樣野,但依度我有d唔慣,開始派米時係d好似德高望重既人派,仲聽到有人同個幫手講要企後面,你無資格派云云,我覺好難聽,而且明顯依d嘉賓係生手,好慢仲問阿婆幾點黎排,阿婆就算聽得清你講咩都得鬼閒理你咩,做完show後由番熟手派就快番d,但另一邊又見有人同阿婆嘈,仲要好惡果隻死都要搶番阿婆既第二包米,唉,佢地係咁啦,一包半包由佢啦(見有幫手都係咁講,我都係第一次見派米派成咁),感覺唔多好,不過我係外人,多事

之後聽講大窩口地藏王果邊有打武,又走左過去,知道流料後又番長沙灣睇埋last既幾part野,一番場就見有位阿叔同福品競投嗌大交,爭d打交咁濟,經過派米事件,依檔野感覺都幾麻煩,anyway,走左去睇禮斗同散旗,散旗就相當精彩,同之前睇既有d唔同,佢地話係加長版喎,時間我冇留意,不過明顯走位唔同(開始時見四眼叔叔同打鼓阿姐講左輪野,應該係話佢知要加長版掛,丫順帶一提,從德除左好多後生仔有氣有力之外,打鼓同唔知彈咩琴既兩位阿姐功架十足,極有氣勢)動感更多,幾好睇下,但我企錯位,撞著個超前阿姐,攪到太近又影唔晒,太遠又見佢隻手係鏡頭正中間,最後我放棄了,無咩點影相同拍野,係咁易算了,下次小心d好了

最後係送神,聽講係最後一年係山上兜圈,但一來太夜二來好似冇人跟車,我都係算了

Back to Part.01

[15/09/12]
Photo Link <<<<<<<<<<

盂蘭勝會(三十) - 長沙灣潮籍盂蘭勝會Part.01

貳零壹貳年玖月拾伍號(柒月三十) - 長沙灣潮籍盂蘭勝會Part.01

最後一日盂蘭勝會,差唔多成日都係長沙灣渡過,所以我亦相當街坊裝束,anyway,一早10點零鐘到左保安道,因今日係第三日,所以應該好多街坊忙於擺放自家祭品拜祭,依個有個特色,就係要用繩又或者粉筆畫圈用黎圍住自己既祭品,好別緻,唔知係咪人太多驚比人用左個位呢?但眼見又唔算係太多人者,有趣

見冇咩特別走左去食早餐,番到黎時做緊十供,依度既供同之前既荃灣有少少唔同,不過當然都係果十樣野啦,不過所主持既佛社唔同道具都有少少分別既,而且儀式完左都冇急住羅走,可以比我慢慢睇下影下相咁

再之後就係五福連,之前睇過幾次,雖然冇留意係咪同一間,但因睇多左而且又上網check過下,所以卒之睇到有五場了,嗯

大約一點左右開始擺放祭好兄弟d野,鋁片沙碌油葉水亦唔少得,至於其他食物祭品呢,可能冇左d大隻冬菇山髮菜山,所以好似冇咁好食咁,哈,但個24支燒酒陣都幾有型而且經大會開始後d街坊好落力插香而且d值理又差唔多咩都掉晒落去(眼見有茶葉,燒酒,熟煙,飯,米,豆腐,麵條,菜,汽水等等),熱鬧得黎比d煙煙到眼都盲埋,真壯觀,但依度洒碌油葉水仲可以避開下,唔似得第一場保安道既李鄭屋麗閣咁三百六十五度轉圈,部相機真係極難避開

而另一邊呢就做緊瑜珈焰口,因睇左幾次,而且位置唔係幾好,所以只睇無咩睇拍movie又或者影相,反而係多左留意儀式既手印,有d睇得明有d睇唔明,見先生們既書有d寫上手印點做,幾有趣,不過呢就見到一個打醬油既先生,雖然另一個都明顯係生手,但佢咁隨意,唔知係當日唔舒服定點了,好眼訓咁喎,anyway,專心睇手印真開心,希望有書可以講究竟d手印代表咩就好了,至於姑雷果呢,我冇參與了,一來唔係太多都係留番比人二來我都係中意食慈善閣既多d,哈

丫當中仲有放生,有兩羅龜,不過如果放落海呢就....嗯

To Part.02

[15/09/12]
Photo Link <<<<<<<<<