q"._."p

06 December 2011

因唔中意買野既關係,一早一條友7點幾起身搭8點正自強號去桃園,去到桃園就半個鐘搭的士到第1站大溪老街睇下舊街舊牌坊,因車唔易搵既關係,同司機講好行程答應喂錶收錢所以confirm左2個鐘後接番我

因為係星期一既關係,去到大溪老街都冇咩人,首先到左和平路,之後就轉左入中央路,依度係街市,好熱鬧,求其搵左d野食就開始繼續行,行行下去左中山路(亦即係新南老街),d舊牌坊d舊建築仍然保留得唔錯,我覺中山路商業味少d,而且圓形既建成商行非常搶眼不錯

行左陣去番番左和平路睇下野,食下野,食左光餅又食左奶油餅,人比之前多左d,但都叫做行得好舒服,之前聽司機講,假日好多人,好彩我撞唔正

去左福仁宮,都算幾大而且幾多野睇,再去左中正公園陀螺大溪橋大慶洞等等,大溪橋下既河加埋d排列特別既石非常正,行行下已經過晒鐘,最後約司機12點幾係番和平路等,當中等佢既途中入左間古舊既鋪頭食左個豆花,天氣非常好但又真係好熱

同左半個鐘去到第2站三峽老街,依度比大溪老街簡單,只有一條民權街,一整條舊牌坊都算幾壯觀而且行得比較方便,去左德福宮,興隆宮同清水祖師廟,又係幾靚同幾多野睇,我其實都幾中意睇廟,特別係門神,哈

係民權街睇左老製茶山房,食左康喜軒牛角雪榚又食埋仙人掌口味既雪條,基本上都飽晒唔洗點食午餐,差唔多3點就出發去機場了,總共用左1300蚊,比想像中既1500蚊平,睇左舊街又咁岩一個大藍天,算係唔錯了

Back To Part.01

<24/11to28/11/11>

Photo Link <<<<<<<<<<<<<<<

05 December 2011

台中,奧萬大,清境,合歡山,桃園老街 2011-11-24to28 - Part.04(27Nov)

台中,奧萬大,清境,合歡山,桃園老街

27 Nov 2011 Sat 合歡山,埔里,台中,台北 Rainy day

一早起身仍然好大雨下,D雲仲好厚,應該冇咩機會睇到日出,所以都係訓多陣算了

9點起身食完早餐見雨細左就出去行下,3度幾可以冇咩風所以都唔算太凍,但就好大霧好多野都睇唔清,有另一個感覺,之後D霧就見下唔見下,所以山又睇清左少少,仲停埋雨添,感覺都算唔錯

11點幾check out完司機黎到接我地走,天氣都唔算太好,但叫做冇咩雨落,落山時因咁岩係星期日,一路見好多人查車上山,落到去萬大水庫開始散左d霧,但都係冇上山時咁好天色,所以水庫d色冇咁靚lu

開車落到去埔里要成2個鐘,去到已經1點,因天氣一般而且要趕番台北食飯,所以只係去左南投紙教堂skip左廣興紙寮同埔里酒廠,因未係肚餓加上撞正12年一次既埔里清醮,整個埔里都係食齋,所以只係係紙教堂度求其食左個包就算,諗住去台中食台鐵便當好了.間紙教堂真係流流地(聽講日落先靚),不過佢出面既稻田唔錯,影落幾靚

去到台中烏日站咁岩係清明上河圖展出,所以塞左少少車而且高鐵站好多人,幾班車都full左,食完個便當後(我唔中意佢膠盒既包裝,都係中意佢舊紙盒整張粉紅色紙巾可愛)

番到去台北已經5點幾,咁岩係magic hour,個天非常靚,而且仲有條大彩虹,都算粗所以出到好多色,係西門町見到都算有緣了

夜晚行左陣就去天母區既金蓬萊食台菜,野食真係唔錯,仲要幾大碟價錢又唔算貴,幾好,之後行左陣誠品(本身係我想買書但最後係我本書賣晒而fd就左一袋又右一袋,哈)就番酒店了,張床係king size,成間房比佢霸左3分2,我一邊睇相個fd係另一邊上網真係完全好似隔左成間房咁,真係好大張床,哈

To Part.05 - 台北,桃園,香港

<24/11to28/11/11>

Photo Link <<<<<<<<<<<<<

04 December 2011

台中,奧萬大,清境,合歡山,桃園老街 2011-11-24to28 - Part.03(26Nov)

台中,奧萬大,清境,合歡山,桃園老街

26 Nov 2011 Fri 清境,武嶺,合歡山 Cloudy day

一早起身諗住睇日出,民宿條友明明話房個方向岩可睇日出,但等左陣覺唔對路出左門口睇,不來係另一邊,即刻行出去馬路睇,只見少少日出既光之後就可能雲厚既關係睇唔到了

影左陣就番房訓8點先起身出去食早餐,但唔多野食,所以我主力都係食番麵包同沙津

番房執好野就出發去清清草原睇綿羊,買左d糧比佢地食摸佢野d毛好厚,怪不知唔怕凍了,表演尚算ok我地仲執左d毛影下相咁,之後我就同d fd失散左,所以自己行自己,行晒上中下路去埋睇馬表演(都幾悶),睇左陣仲落雨,所以走人,咁就撞番其他fd一齊出發向前行去紙箱王食野

係出左清清草原度食左個生蒜山豬肉腸,非常好食,途中見到d爬虫同兔仔放係度比人睇,又睇到少少紅/黃葉,行前少少又食左煎餅,百香果(依個好正,多汁酸酸地愛上了),仲見到當歸菜(聞落真係當歸味),仲有好大棵既高麗菜

去到紙箱王比台中果間大,多少少紙製品,但野都係唔多好食,不過附近真係冇咩好食所以將就下

開始出發上合歡山,當中會經左武嶺先,雖然只係1個鐘車程,但車路比想像中吸引,山連山又有雲又有霧,而且非常非常之高,又見古木松樹等等,單單依程車就值回票價,但因有朋友有高山反應,所以我順手搶左個車頭位置,所以睇多好多野同影左d相,哈

去到武嶺有3275尺高,加上雨又大風,好凍,丫途中仲見有人踏單車,又有人去camp,佢地應該都幾辛苦下

去到松雪樓已經差唔多天黑,司機車左我地去尖山前少少睇雲海,好正,可想而知如果日出時加上雲海會變成點,非常期望第2朝日出時行去睇(因我地住松雪樓,所以行出去非常方便),我地可以揀行上尖山睇又或者係同一個馬路邊睇,但望上尖山條路都幾直下而且又濕滑,加上天黑應該都幾危險下,所以多數係馬路邊睇算了,個位其實真係唔差,司機先生張1000分既日出就係同一地點影,嗯

入到房個view非常好,對正山又有雲海,而且依度比滑雪山莊方便,樓下已經有野食,唔洗行10幾分鐘上黎食,怪不知得咁難book房啦,影左陣相另一個fd又有少少高山反應,叫佢訓左陣先去食dinner,好彩訓左半個鐘已經好番了,可能又車又走黎走去先有高山反應,本身4000以下應該唔會有的,嗯

晚飯都叫做食下西餐,3千幾尺都有得order下野都算唔錯,雖然之前尼泊爾都係咁,但有得食都可以,傾下計食下野fd突然講又落雨又大風又凍,加上松雪樓9點後所有工作人員都會離開走另一座buliding度,就忽發其想話好似金田一咁feel,如果山路封左一班人被困又幾似既,哈

食完野沖完涼仲好早所以就走晒黎我地間房傾下計食下野咁,丫,薯片因氣壓問題上山途中3包已經爆開左2包了,但食落又唔覺林,嗯,岩岩係金馬獎,所以一班人就係3千幾尺既松雪樓睇電視睇到11點幾,幾過癮

但天太厚雲睇唔到星,仲有時落下雨咁,睇黎第2朝都唔大機會有日出睇了

To Part.04 - 合歡山,埔里,台中,台北

<24/11to28/11/11>

Photo Link <<<<<<<<<<<<<<

03 December 2011

台中,奧萬大,清境,合歡山,桃園老街 2011-11-24to28 - Part.02(25Nov)

台中,奧萬大,清境,合歡山,桃園老街

25 Nov 2011 Fri 台中,霧社,奧萬大,清境 Sunny day

台中車站 - 好古舊,差唔多100年歷史,係台灣仲用緊最舊既車站,入面有個小小既展覽地放左d舊既火車野,而旁邊既行李房都好舊下,好似舊式游泳池放袋既地方差唔多,但有個先進少少既借書櫃,但有休息時間,哈

20號倉庫 - 車站旁邊既藝術地方,但時間太早冇咩野睇,地方唔太大而且D作品聽講流流地

台中第2市場 - 又係過百年既舊街市,見好多街坊食緊野,比較多傳統野食,不過太油我頂唔順,魯肉飯朋友極力推介,不過咁岩冇開,哈,另有幾檔抆緊豬毛,原來係賣緊黑毛豬,真特別

買左幾個包食過味道好好既饅頭就出發去霧社,去到司機請我地食左個夾心豆干辣辣地非常好食,不過如果唔中意食芫荽陣味就應該唔岩,但講真真係好食,連佢地唔食得辣都覺得非常正,係SEVEN買左D野後就開始上奧萬大,中間順手走左去莫那魯道紀念碑影左幾張相,亦即係岩岩做緊果套賽德克巴萊發生霧社事件既起源地

之後出發上山去奧萬大,中途經過萬大水庫,d水加倒影非常靚,但中途冇停車好難影,之後上高少少停低左影相,但景就真係冇咁靚了,對上有間別墅,真識揀地方,上到去冇咩紅葉,司機話天氣太熱而且又落左幾日雨,係岩岩先至叫做停雨但葉唔係未變色就係比雨打到落晒地,所以紅葉好少,行左兩個鐘度去左奧萬大大橋非常長但都叫穩陣,行番轉頭一直都好好天,司機比我地睇3月既相好多紅葉又見合歡山既七彩色日出,非常非常靚