盂蘭勝會(初六) - 鹿尾村惠州同鄉

貳零壹貳年捌月貳拾貳號(柒月初六) - 鹿尾村惠州同鄉

放工趕入西貢,去到黑蚊蚊問人都唔知係咪有盂蘭勝會,但既然山長水遠黎到就上去鹿尾村睇睇,行左陣就聽到有聲,原來都有不過就係非常小型的,而且係惠州所以擺設同之前睇過既有d唔同,大士冇紙紮冇畫像只有神牌一個,而福德老爺城隍老爺等等都係

得神牌一個,感覺好唔同,但都有三件神袍同男女浴室等紙品,馬呢就非常細隻,而且唔係紅馬而係兩隻啡色既,我唔知佢係有咩角色,而孤魂台我只見幾個紙紮既東西,唔知係未整好定點,經施棚呢就見應該係道教,但未見有儀式,因地地太細人太少所以睇左陣就走人

[22/08/12]
Photo Link <<<<<<<<<

盂蘭勝會(初六) - 李鄭屋麗閣潮籍盂蘭勝會

貳零壹貳年捌月貳拾貳號(柒月初六) - 李鄭屋麗閣潮籍盂蘭勝會

下畫食飯時間去左長沙灣睇初六既盂蘭勝會,場地方面見大士王係深藍色面而且個樣有少少唔同,總之每次睇盂蘭我都慣左會留意大士王亦會睇下神壇既祭品,去最入面睇下D酒杯等等,不過無想像中咁多祭品但岩岩好可以睇到祭好兄弟,所以梗係睇埋先走,首先見佢鋪沙再放酒餅入沙(應該係助燃用)之後放五色豆(咩都有)再有木,炭,仲有好多食得既野,聽理事講全部都係好意頭既野,咁岩撞到中大既助教帶學生黎做考察,問我係學校定做研究既,另又有人以為我係記者等等(真係次次都係咁),總之去盂蘭勝會就成日都有機會同人傾計咁啦,見有d時間,所以又去左食留碗潮州粥啦梗係

等左陣,經施棚做緊瑜珈焰口,今次睇得清楚少少,見佢既手印好多好特別,都幾好睇,再後黎就見有鏡照照下,之後見酒水落放生龜度,應該都係潔淨或頌經之類既東西

另一邊睇番祭好兄弟,插晒d香上沙加埋點晒d蠟燭咁,由長老總理裝好三支大香後d人就開始點香再周圍插,又有人洒水(真係360度係度用氣毛巾飛水,聽講係依個場獨有既,果D係碌友葉水,所以都係好野,但我部相機都中左小小水,所以係冇影到依個360度旋轉飛水依個動作既)再有人洒米咁非常熱鬧之後再燒熟煙洒燒酒洒通菜咁,非常有趣,雖然真係好大煙,但幾好熱鬧,遲下月尾再去長沙灣睇多次先得

因要趕番工,瑜珈焰口未做完就趕住走人了

[22/08/12]
Photo Link <<<<<<<

盂蘭勝會(初五) - 順天街坊盂蘭勝會

貳零壹貳年捌月貳拾壹號(柒月初五) - 順天街坊盂蘭勝會

入到順天村已經八點三,岩岩做緊儀式,開頭我唔知做緊咩,後黎先知係普門品(全名叫妙法蓮華經觀世音菩薩普門品),有少少街坊睇緊我就周圍行下

係村入面做又唔算太細起碼主要都算有齊,有小型神棚,神袍棚同福品祭品放埋一齊,亦有大士台馬棚而孤魂台同附薦台放埋一齊,當然亦有經施棚都算樣樣有啦,只係理事處得一張台仔咁,但大士台果邊拜神既位唔係好夠,有d花糟頂住,但感覺小型有小型既特別,而且街坊親近d

有人好奇問我影左d乜又有人問我係咪記者,同街坊(定理事呢?)講左陣野,我話好有興趣睇佢就話小型既經費有限,好多野都係街坊自己整既,我就覺佢d用衣紙摺既紙品好靚亦有好多款式,街坊話佢地唔係叫衣紙但我又唔記得叫咩名,anyway,依個街坊話佢都想學下點摺因為真係幾靚,佢話出面果d係買既我都同佢講係外面睇左幾個都好似冇咁多咁特別,依度街坊真有心

睇左陣見先生們做緊普門品結尾,儀式將d花同水交比工作人員再將佢地酒上大士台既神位,睇左陣就走人了,遲下去埋順安睇先得

[21/08/12]
Photo Link <<<<<<<<<<<

盂蘭勝會(初五) - 慈雲山竹園鳳德潮僑街坊盂蘭勝會

貳零壹貳年捌月貳拾壹號(柒月初五) - 慈雲山竹園鳳德潮僑街坊盂蘭勝會

首先去左慈雲山,太耐冇黎過已經完全唔認得路,好彩係巴士站隔離好快搵到,入到去好大,感覺比東頭村更大,基本東西有齊,人唔算多,但大士王係黑色面有少少唔同,而且神袍亦有少少唔同,中間有條龍而且八仙唔係放中間,祭品台方面我卒之見到齋魚了,不過唔算太似要睇一陣先知,仲有雞同埋兩種祭品但太遠望唔清係咩,睇左陣戲班開台,但我興趣不大所以就去下一度順天村了

[21/08/12]

Photo Link <<<<<<<<<<