長春社-訪古講古煤氣鼓.土產土制土瓜灣

貳零壹参年零月伍日-長春社-訪古講古煤氣鼓.土產土制土瓜灣

又參加左長春社既活動,今次係去土瓜灣(曾經工作過的地方),名稱叫訪古講古煤氣鼓.土產土制土瓜灣,主要既目的係講述土瓜灣既曾經工業,基本上所有舊東西我都有興趣,所以又參加左

首先集合地點係唯一大廈,由霖簷蓬開始講到對面既益豐大廈(金錢牌熱水壺),再到天后廟(1840年),龍母壇(1965年)海心廟等等,聽講坐小船既經歷又幾得意喎(本來係海,要坐小船到海心石,只收去一程番果程唔洗錢),至於海心石同同土瓜灣呢又好似有少少關係,講述既舊街坊話,土瓜灣點解叫土瓜灣有兩個可能性,第一因之前有條叫土家村既地方,所以就有土家灣既名,而另一個呢就係海心石過少少有舊叫土瓜石既東西,所以叫下叫下就有土瓜灣依個名出現

之後呢行左去海心公園,show左幾張新舊對比既圖片出黎,填海真係可以變得好利害

係海邊呢再講左偉恆昌個名既來源(偉倫紗廠,恆生銀行,大昌建築),卑利船廠(卑利街,涉及1949年中共爭鬥,兩航起義事件,最後係1955年強行清拆),鶴園發電廠(1940年,之後1941年被炸毀搬到海邊,即海逸豪園原址,講者仲分享左粗電幼電既分別,亦講左中電既英文名由來,即粗電用作廠即power幼電用作燈即light,但之後因要供電比青洲英泥而由100vot到200vot同最後既220vot電),青洲英泥(即卑利船廠舊址)

再之後呢行前少少去左海旁,講及第一場鴉片戰爭之地(有圖片比較,山既形狀果真同現場一樣),亦講左九龍城三代碼頭既由來同地點(第一代18xx年龍津橋附近,第二代啟德濱附近,第三代1956年現址)

之後呢行左去偉恆昌,講左香港火柴廠(1970已停業,舊址即偉恆昌對面),又順手講埋林過雲事件同東方報業舊址既故事,再行過興華中心(五羊電磁),利華中心(利華布廠)去到新山道(當時真係有個新山,不過已填平,即土瓜灣體育館現址),係果度呢再分享左少少關於捷和電筒廠(打撈沉船金屬,本來做電筒之後做軍事用品起家),香港膠鞋廠(即二人俱樂部位置),中華書局印刷廠(主要幫國民黨印宣傳品),香島製柴廠,三江布廠既故事,土瓜灣當年既工業某部份同國共內戰有所關係

再行左去煤氣鼓(1850年),屠房(1887年紅磡火車軌附近,至1901年搬至現址,介紹左某一斜台係比牛車卸牛用,真係唔講唔知,而且我未入過屠房,原來裡面既建築都真係幾靚)

之後經過土瓜灣六街(定十三街),講左東方紗廠(飛達中心附近,三級歷史建築但現拆剩一牆),大同汽水(東方紗廠隔離),屈臣史汽水廠(即飛達現址),牛骨廠/牛皮廠(即天廚舊址,現傲雲峰位置),仲有港萬隆炮仗廠(即炮仗街位置)等等

行前少少到左北帝街,分享左北帝廟(聽講北帝街真係有北帝廟),二王殿村(已拆,聽講關於宋帝昺宋帝?),聖山(即香港飛行總會附近,已被日本人炸平用黎起機場,宋皇台舊石亦原本亦係聖山),邵氏片場舊址(即北帝街42號,因近新山聖山所以用左黎做片場),大觀電影公司(香港早期導演關文清之大觀電影公司,開初主力拍攝抗戰片,電影公司名稱由來因暫借大觀旅館一間房而製作電影)

最後講埋聖三一堂(1936年第三次搬到現址,原來係中西合壁教堂建築,仲講左原來內街有個位唔知係咪因隔雜大廈所阻,有白鴿無左個頭同埋龍口向牆既奇怪建築)

講左咁多,原來土瓜灣曾經係一個咁多樣化既工業區,而且頗多厭惡性行業(發電廠煤氣鼓既煤,紗廠,牛骨/牛皮廠,英泥廠,屠房,仲有炮仗廠等等),難怪舊街坊導遊話有時集體回憶不一定係好回憶,哈

[05/01/13]
Photo Link <<<<<<<<<<<<

香港史學會-長洲導賞團 - Part.02

貳零壹貳年拾貳月拾陸日-香港史學會-長洲導賞團

再去左鶴佬巷,東莞公祠,長洲醫院等等,仲睇埋個古代石雕(之前真係無留意過有依樣野),再去左水月宮再去埋關公宗義祠,入面既設計幾特別,神像上既天花居然係外國教堂式design,比較少見,再行左去長洲公立學校(二進式設計),中華便利會(城堡設計),旁邊仲有個佐治五世既郵筒

再去埋大社壇同埋長洲方便醫院(建於1915年)隔離仲有個殮房(民國36年),感覺相當破落,再去洪聖古廟(香港唔多),門口有張好大既石台,而旁邊有個好舊既大新街路牌,再去多間天后廟,入面係依山而建,神壇見到d石幅,而出面既樑有d斜左,再去埋大石口碼頭(已經無用好耐同埋填海填到個海都見唔到咁濟)個tour已經完晒,大約4點半,係見天未黑再自己行下

首先當然係想搵番海星別墅仲係唔係度啦,我記得係上圓桌村條斜路入,但行行下已經唔係度,應該比人剷平左起樓啦,未到圓桌村見到有執石碑,不過睇唔清no幾,聽講長洲都有好多界石係度,所以我除左海星別墅都想搵下有冇界石既,無幾耐見到義塚條路,整條路其實無人行既(得一隻狗係度好好奇咁望住我),依度呢夜晚就行過,日頭真係未上過去,原來入黑前個感覺都幾陰森,雖然我驚賊多d,上再去見到兩至三個亭(墳場依類送別亭係會比較多既),上呀上見到一大片地一層層咁仲有個石像係度,我就認得依個地方,當年仲係依度聞到屍臭味添,望番出去真好景色,經過我不多不少行墳場既經驗,依類比較舊既墳所望既地方係相當好風景的

之後落番山去左圓桌村,上左頂既三角測量器附近睇風景,再落番圓桌村某一家門口睇睇,個view真唔錯,再行又見到界石,寫住no.1,前少少又有一舊no.1,所以我懷疑唔係界石(聽講有舊係長洲醫院個廚房入面),anyway,再行呢就係美經援村(當年我地成班人係長洲墳場夜媽媽行番出黎時嚇親個細路仔同佢老豆,哈)同埋西灣天后廟,再前行係去緊張保仔洞既,我基本上只係想行去五行石(其實我記錯左方去,我要去既係明輝營果邊既人頭石先岩),行行下見到日落,當然就睇埋先走啦,爬左出去d石度睇,個日落好正,個太陽落山後再行前就去左張保仔洞,真係好鬼細而且都幾黑(但我有電筒)

出左去又係海,見到仲有人影緊相再行前少少就係石邊,好似唔多似樣,但唔想行番轉頭就直去,落左海邊有條繩梯,上左去又落番條鐵梯,再爬上石邊就係路行行下去左邊呢,有個海灘仔,好細而且d沙一般(後尾先知依度係白鰽灣),對上呢就係墳場,天開始黑,我一個人就唔多想上墳場山路所以就行另一條路仔,見前少少有街燈即係正常路唔係山路啦(行山路可能行行下入左樹林,我唔想係入面過夜,哈),行多兩步就見有人跑步行過,問佢條路係咪出碼頭,佢話岩喎,所以就再行啦
,好快出番村,仲坐低食左少少野,但睇錶就快到搭半(慢船搭半,假期快船好死貴),所以又好似上次坪洲咁一路趕路仆番出碼頭,又係岩岩好,呼

Back to Part.01

[16/12/12]
Photo Link <<<<<<<<<<

殭屍

~~殭屍(Rigor Mortis) - [2013]~~

之前一直1516想看此片,原因是juno首次執導(香港轉幕後的我多數會想去試看),加上所參展場地也是穩陣之類別,而且演員表全是比較實務演員,最後因清水崇是奇幻電影常客,有可能是比較偏鋒電影,所以想看,當然最後速成的原因是信得過的朋友之好評價及香港舊電影感覺,最後入場看看

如果曾經經歷過香港殭屍片年代的觀眾,戲一開始已經令人懷念不已,雖然我不愛看特技,而且片中色系以及女鬼是日本感覺,但收鬼收殭屍的動作,村民間的對話及場景充滿舊香港味道,懷舊夾雜新派特技畫面不見老土而過份造作(雖然殭屍自由活動後明顯跌watt),而故事及整體感覺而言,頗為悽美及疏離,片內四段人物穿插,充滿濃濃的念舊感情,是純粹而簡單直接,借助殭屍說出除了要懂得放手之外亦表達了此片極為重要的傳統感情文化智慧己被遺棄淡忘倒數,實在有夠唏噓無奈,可見導演之用心及誠意,加上八十後的juno有著如此的情懷及視野執著,完全值得入場觀看,當然,粗口版本是比較地道而令人感覺更為親切真實

p.s.後話一個,話說我除了電影節外,很久很久沒有純買票入場看戲,剛剛看過儲存多年的戲票,最後一套是08年的烈日當空,再前就已經是2004年的電影,原來已經有差不多十年非常很少入場,看到04,08年的票尾已經差不多全退色了,反而2000年前打印的或手畫的(最久一張是1986年)還狀態良好,舊的繼續念舊新的已經走了不知多遠,這個或多或少和此片有著相同的感覺,哈

[31/10/13]
Photo Link