大嶼山3日2夜camp(東涌昂坪羌山龍仔大澳) - Day.02 (16Nov13)

貳零壹叁年拾壴月拾伍至搭柒日 - 大嶼山3日2夜camp(東涌昂坪羌山龍仔大澳)

16 Nov 2013 Sat 昂坪營地,木魚山,深屈道,姜山,萬丈布營地Sunny Day

9點半左右先起身整早餐,都係輕便為主,米粉加二個罐頭,不過因要體力,所以多左個即食湯包,飲完咖啡收好營十點就起行了,先去左心經簡林,第一次睇都真係幾靚,排位有計過而且幾有氣勢,加上一早無咩人,所以感覺唔錯,經奇趣徑行番市集,見到有2隻牛係度,完全唔怕人,同佢一齊左陣再番出昂坪市集買少少野經過大佛開始多人,見有d狗係度訓覺,聽講係士多養既,雖然唔夠彌勒山附近既狗長毛,不過都係厚毛為主,見佢係陽光下訓覺,幾舒服咁,後尾因有人要去廁所,我係市集既舊亭度訓下,原來陽光下加埋涼風真係好正,怪不知d狗咁嘆

買完野行番心經簡林,睇清楚途中間舊屋,見有隻窗開左之後比d樹根纏住,睇黎都荒廢左好耐咁,anyway,上左心經簡林,諗住行山路過羌山,點知行行下已經無左條路,沿途既絲帶都唔見埋,但見gps條路係岩既,地圖係實線,應該係有清楚既泥路,唔知點解會行行下無左條路(後尾check番原來睇左點點線條路,而本身要行既應該係要由石壁郊遊徑接鳳凰徑4段先岩,難怪係心經簡林度行入去時有牌寫前路崎嶇啦)

我地行左個幾鐘d草越黎越密,但明明聽到有聲,電話亦有connection,但好似真係唔多對路,見前面好快就係獅子頭石,整條路都係一公里,只爭一百米度就可以有條古路出番大佛後面,一係就行番個幾鐘轉頭,諗住得一百米而且聽到人聲應該唔遠,番轉頭既路都其實唔好行,d草好高又有荊棘,行左咁耐遠望見到大佛側面,唉,真係逃唔出佢既五指山

最後我地決定前行,但就越黎越密荊棘亦越黎越多,卒之明白荊棘滿途係幾咁淒慘,最後行多左兩個鐘先見到條石路出番文明,當中有60米我地用左成個鐘行.短短既一公里路我地用左3.5hrs,唉,因途中其實不停咁聽到人聲,我地感覺係係市區入面既森林迷路,好奇怪既經歷

時間已經成三點,用左好多體力流晒血咁實在辛苦而且肚餓,就咁係路上食包之後就行番出昂坪污水廠,再過番市集seven買水,真係白行一場,太過份了

最後我地要行馬路,經昂坪路入深屈道羌山道入鳳凰徑5段,見到個羌山真係高到呢,唉

係亭度坐左陣就起行了,由馬路上觀音山434m,跟手要落60m再上番羌山459m,因一條山路睇清楚既,明顯要落谷位再上山,感覺真難受,係觀音山頂好多蘆葦草,而且岩岩日落都幾靚,但睇左影左再行,一見蘆葦草就大風到暈,真係少見多滋味多見就想死,係某一山峰見到鳳凰山,岩岩開始magic,加埋個月亮,幾靚

無幾耐上到頂以為係羌山頂,原來仲要轉彎再上,咁岩聽到d烏鴉係度叫,聲音就係笑緊我地咁,佢地忍唔住係山度大聲鬧佢地,哈,苦中作樂,

差唔多到頂見到彩霞,係山頭大聲嗌頂埋果十幾級樓梯卒之上到頂,雖然好大風但風景不錯,影左幾張相快走,就快吹到頭暈而且成身濕晒一停低就好凍

半個鐘度就落左山,係黑暗中睇地圖搵路,再行多半個鐘先到萬丈布營地,去到當然無人,咁遠咁荒蕪既地方,而且太黑只可以係路邊好似坑渠既河仔度羅水,雖然睇落都幾清下,但水都係要煮多陣穩陣

 又食完麵同罐頭9點幾就訓了,朝早既3.5hrs既迷失叢林真係用左我地好多體力,研究過就算行長既路由石壁郊遊徑經大浪分流二澳入大澳條路都應該唔洗咁睏,今次既短途揀左行山路唔行馬路真係錯晒

To Day 03

[15to17/11/13]

Photo Link <<<<<<<<<<<<<<<<

大嶼山3日2夜camp(東涌昂坪羌山龍仔大澳) - Day.01 (15Nov13)

貳零壹叁年拾壴月拾伍至搭柒日 - 大嶼山3日2夜camp(東涌昂坪羌山龍仔大澳)

15 Nov 2013 Fri 東涌,東昂棧道,昂坪營地 Sunny Day

卒之行大嶼山了,依次係3日2夜既camp,不過因無咩假,所以放半日星期五下晝先開始行,但fd由市區入到黎買埋野pack好晒野行得黎都成4點先係東涌出發,未上山前經過逸東村,先有人曬緊果皮同洛神花,排得好整齊下,印象中上次行都好似有見人係果度曬野,應該係佢地慣左既晒果皮既地方

經過侯王橋,見有人捉緊魚,睇到有條大魚游緊,又睇左陣先行,去到360救援徑已經4點半,本身依條路係起360時用騾仔幫手揹野上山起吊車,5.7公里但由零上五百幾米,揹晒野咁行都其實幾倦,不過因我share營,所以可以用細背囊,雖然要揹番一部份罐頭糧食,但都無平野咁重既

行呀行,上到半山見到吊車既鐵架已經開始日落,個景唔錯,雖然有d朦,但還可啦

之後行東昂棧道,雖然用實木整,但因我地揹重野,所以都唔敢一齊行,一個行完先一個,踏落去除左有少少搖外d木都陷左少少,始終都係日曬雨霖而且佢中間無落釘,所以都係安全d好

岩岩係舊曆十三,月光好圓好光,而且個天都幾清,加埋吊車都真係幾靚,但入夜同係山頂d風好大,企定係度都幾涼下,影左陣相就唔停繼續行

未夠6點半已經黑晒,去到另一吊車架,有強光打落黎,配上差唔多全黑既棧道同埋都幾辛苦既上山之路,我地笑見到白光,哈

再到彌勒山轉向站,依度係中途地方,多左d機器同鐵架,見到有幾隻狗係度,佢地既樣同平時我地見既唔同,雖然都係唐狗但身上好長毛,好似著左mink咁,不過山頂咁大風咁寒,佢地d毛又長又厚一d都唔出奇

經過依個鐵架就到左彌勒山附近,行緊既係彌勒山郊遊徑,因整左樓梯而且又係有少少向下斜加上潮濕,地面有d冼,揹重野行真係非常辛苦,佢地一路咀咒依d斜落樓梯係仆街斜外仲話依度係五星,我都真係幾同意佢地既講法,咁既路真係比佢攪到腳抽筋,整乜鬼樓梯丫又唔係整得平過人,又滑又難行,多此一舉,難怪側邊有人行shortcut,可惜太黑我地揀錯左正路行,比佢玩死

行完晒果d仆街斜後一個鐘度就上到昂坪市集,但太黑所以都搵左陣先行到營地方向,見巴士站有好多牛係度休息,d牛都幾大隻,仲有d細牛仔幾得意

之後再行左一段路,9點行到營地,有幾班人係度,我地快速起營煲水煮麵開罐頭,食完隔離都未起好個營,飲咖啡睇下星,但月亮太光d星真係睇唔得多,而且營地非常濕,加埋風坐坐下都幾寒,無咩攪就入營訓覺了,不過附近d人好鬼嘈,一個營就嘈到3點另一個就未天光就開始起身羅水煮早餐,又係嘈死人,我都唔知有無訓左3個鐘,唉

To Day 02

[15to17/11/13]
Photo Link <<<<<<<<<<<<<

八仙嶺

貳零壹叁年玖月捌日 - 八仙嶺

講左好耐加下卒之行八仙嶺了,由新娘潭出發行晒八個峰再係山坡剷林落山接番山路行一圈番到起點,預計4-5個鐘完成,但當然好睇天氣,因山上無咩樹,而且又上又落大熱頭都會幾甘,我地呢,就揀左個以為已經踏入秋天但原來都會曬死熱死既日子行八仙巔,呼

[八仙嶺自然教育徑新娘潭段>仙姑峰>湘子峰>采和峰>曹舅峰>拐李峰>果老峰>鍾離峰>純陽峰>山徑下山>橫七古道>八仙嶺自然教育徑>新娘潭 (新娘潭 (Z) > N > B > C > D > X > Y > G > N > 新娘潭 (Z)]

食完野差唔多成11點先開始,岩岩上山時見到既山溪d水好清,仲見到蠑螈非常生猛,而上山既路邊見到一堆堆既泥,應該係屎甲蟲整出黎既一堆堆野,哈,至於天氣,當然係熱到死,而且多暇氣,唔多清,唔係應該會好好風景的

另因我朝早未訓醒著錯左條褲唔多透風同埋拆唔到褲腳,所以一開始行完段長樓梯後已經想死,特別係第三個采和峰,爭d熱死,後尾開遮休息左陣先叫好少少,再行過曹舅峰,飲左個利賓立仔仔就正常番晒,著錯褲真係慘

一直都係連錦既山路,上坡落坡不停,卒之用左3.5hrs就行晒八個峰,係純陽峰再行就係屏風山去大尾督或鶴藪,都係一系列既山,要用多2-4個鐘度,而我地呢就行shortcut由山坡落山,因夏天岩岩過,所以未有咩人行依段雜草叢生既路,開始比較難搵亦係密林,旁邊就係沿崖,所以一定要小心行,唔係就會飛落山,行左一段路就好一d,雜草同樹少左,但就有高過人既竹林,過左竹林就係比較細同窄既山路,但就因之前太多雨水,加上一整個夏天都無咩人行,所以成地青苔,基本上好少落腳地(即無青苔既地面),斜路石頭固之然要小心行,而平地亦會冼低,慘叫聲此起彼落,我因有pole所以好一D,只係跌過一次,仲要係泥地軟著陸,而FD就慘了,印象中最少有2次硬著陸係石頭面跌低,聽到都覺痛,最後本來用半個鐘就可以落山既路,我地行左一個鐘

出左青苔地,行左一段路就接番本來既八仙嶺自然教育徑,見到有d爛屋,路面已開揚,但一路都係落山既路,好似行極都未完咁,都唔明白上黎果時點行的

anyway,過埋橫山腳再行無幾耐就出番新娘潭,落山都行到腳痛,最後用左足足5個半鐘先行晒,比原先既多左半個至一個鐘,氣溫加青苔累事了,嗯

[08/09/13]

Photo Link <<<<<<<<<<<<

書評:天讎 一個中國青年的自述

又是一禁書,如同之前所看的來生不做中國人一樣,只好在這裡寫吧,關於這本書,基本上是我在網上問人"hey!基於逆向思維,也基於這時不看之後可能沒有得看之想法,有什麼禁書值得找來看看?" 就有人推薦了這本書給我,網上找過現在看來比較難買到,幸運地,圖書館找到不過只有一本,但可能我想看的時間尚早,輪侯位置不多(我預約時是第四位,不知什麼原因很快就見到有四十多人在輪侯)

說回此書,之前看過嚴家其的文革十年史,對於當中的歷史和人物有了初步認識(此為好書相當值得一看),而此書是以另一角度掀露同一段歷史的故事,雖然我對作者自我敘述的好人形象及某些逃脫情況帶點保留,但不難看出當中人性,奴性以及種種心理上的轉變,亦可看出當時中國社會上的不同地方平民百姓所經歷的種種,而且對於實際想法的掀露,行為模式在亂世下的修訂演化等等,真實而殘酷,特別在看過有關歷史或人性探討的書藉後更覺當中的真實成份仍是相當的高,值得一看的記事書藉

p.s.平時看書時看到某些特別的段落或會記下再放豆瓣上,現那裡寫不了就這裡記下吧

[04/01/15]