拖網漁船 - Part.01

貳零壹貳年拾貳月拾肆至拾伍日-拖網漁船


自從上次去fd大佬隻船燒野食後,一直都講話搵日要跟佢大佬出海羅魚,本身呢諗住4-5月出去,但唔知係太大浪定近休魚期定係點問左兩次都好似無咩日子fix到出黎,所以以為佢大佬唔得閑理我地之後就無再問,但近來居然又再提舊事,原來個船牌要年底前交番比政府,一問之下老死都要出去啦,揀左星期五夜晚出海

我地快快手食完飯後就由大埔搭van去近比華利山既大埔魚類批發市場,隻船就泊左係度,當時船唔多(唔夠上次係三聖村既密),依度只係3-5隻船,聽講有d半夜出左海lu,而我地呢就會係度等埋另一個fd半夜三點先開船出海,開初以為會去好遠,但原來都係香港海內,雖然係咁,但成日暈船浪既我當然一定會準備左暈浪丸先啦

上左船其實好早(未夠9點),放低野後叫大佬係咁易介紹下隻船,依隻船呢唔同之前燒野食果架,上次果架拍左係旁邊,另一個大佬已經訓左覺lu,所以開初我好驚太遲入去會攪到佢地訓覺,始終三點就要出船,真係要好早訓,好在大佬間房係樓上果層,我地行出行入都唔會嘈到佢地,哈

講番隻船同上次睇既差唔多,不過個漁網呢就放左係地,拖網黎講兩隻一齊拉住個網,總有一隻係拖番d魚上船,上次果隻唔係拖魚上船果隻,而今次我地跟出海睇羅魚,所以上既就會係拖魚上船果隻,所以我地見到有漁網係地下,網上面呢仲有一d魚既全屍或者殘骸係度,而地下都會成日發現到有魚仔係度,至於味道黎講,當然有d腥味但我完全接受到喎,除左網仲見到好多繩同埋浮波係度,當然仲見有一大舊機器要黎見到拉網啦,仲見到係部機附近掛左兩支鐵既野,一邊係尖一邊係平既,問大佬係咩黎,原來係用黎解魚網既,有時kick住左,可以穿黎穿去就解得開,咦明白了

機房呢,今次無再落去了,上左船頂去睇下夜景,天上太多雲,而地面太多光,所以唔多見星,影左幾張相,但船本身搖緊,所以點都有震,另船上有兩隻狗,之前燒野食時都見過佢地,異常活潑既小狗,睇左陣因怕嘈住大佬訓覺,所以我地落番樓下,係船倉影下相就番入房,房出面係船員們訓覺既地方,有6個人,聽fd講細個時就係自己一家人做,但加下好多都上哂岸,所以係請大陸船員做,佢地係度睇緊電視,而我地呢都算叫做有個房訓下,原本以為要訓地下,所以我帶左地席同埋睡袋原來用唔著,我地四個有一間房,兩個訓上床兩個訓下面,但都有床褥同被,比想像中環境理想得多,原來以為邊有咁多地方比我地訓,點知都安排左,哈

丫,臨訓前阿嫂比左d魚排我地如果悶可以釣下魚喎,我就麻麻地釣魚,但就對佢裝魚排既膠袋極有興趣,係好耐之前既黃色惠康膠袋,不過後尾係網上check番,可能係大陸老番野,anyway,當年既黃色既惠康背心袋,真係年紀細d都未見過

講番間房,當然係船倉入面,加左防火板係度,打開牆上既掛畫,仲見到圓型既船窗添哈,雖然係細同迫少少,但感覺幾有趣,房入面居然仲有張按摩椅係度,上面有部細電視,牆上有兩口釘,排左dvd係度,真別緻

十點幾另一個fd終於到左,其實果時我已經差唔多訓著,不過比個fd叫醒左出去睇星,入夜後d雲散左,天上面多左d星,雖然無我去camp時咁多,但係城市黎講都算叫做多了仲比我地見到粒流星添,雖然我都知其實係黑既地方幾分鐘就會見到一粒,anyway,吹左陣水我就番入去訓了,佢地就係出面釣魚同繼續吹水啦

三點鐘左右就開船了,聽講第一網大約6點上水,但我地聽到d船員起晒身,所以我地都起身睇睇,見到個網已經落左水,至於出面既景色就仲見到少少岸景但好快就出左黑蚊蚊既地方,除左另一隻船都見唔到有d咩,睇左陣就番入房再訓

To Part.02

[14to15/12/12]
Photo Link <<<<<<<<<<<<<<

Monsters Crash the Pajama Party

~~Monsters Crash the Pajama Party(妖魔鬼怪大派對) - [1965]~~

我看的是網上版,只有31分鐘的短片.故事開始Mad Doctor單人說話已佔了兩分多鐘,說的是無聊東西,恐怖電影開始前多數有的嚇小孩的說話,可以不理,之後就是說了四分多鐘的opening credits,對所有角色及工作人員的名字也是說出來的,畫面就是影著一隻大猩猩表演啞劇,加上音樂,感覺相當趣怪,之後就是無聊故事男男女女舉行睡衣派對撞著怪獸,從片名已知大約故事,大部份無聊胡鬧但某些還輕鬆攪笑,成員比想像中多但演技對白可以不理,亂七八糟故事很快就完了,其實此片只可當一個觀賞電影,反而dvd內收錄的Spook Show Spectacular頗為精彩(從youtube看了少部份,Pajama Party中夾雜美國經典恐怖角色,非常Halloween感覺)而且口啤不錯,有機會要找來看看

[28/10/13]
Photo Link

日本大阪京都 2012-11-21to12-01 - Part.11(01Dec)

日本大阪京都

01 Dec 2012 Sat 大阪香港 Sunny day

因last一日搭6點9飛機,所以都幾多時間,訓到11點先起身,check out後一身輕鬆去食野high tea,本身plan去既outlet都係無去,無無聊聊咁hea到3點幾先搭車出關西機場,十一既日本旅行又完左了,雖然好趕仲有幾日雨但見到最靚既楓葉時間,而且價錢仲係in budget,共用左萬七蚊,還不錯啦

Back To Part.01 - 大阪

[21/11/12 to 01/12/12]
Photo Link <<<<<<<<<<<<

日本大阪京都 2012-11-21to12-01 - Part.10(30Nov)

日本大阪京都

30 Nov 2012 Fri 白濱和歌山大阪 Sunny day

半夜比個鐘嘈醒左(應該係之前一日酒店個住客較既鐘),所以就起身去個廁所,點知見到露台既景色非常之靚,個月亮好圓好光,反射番落海,幾正,所以影左陣相之後先番訓因行程唔再趕,可以7點幾先起身浸多次溫泉,朝早人仲少,浸下溫泉都唔錯,原來個海邊溫泉有女湯,雖然間住但行出去時好大段路都係露天,究竟點浸呢?唔通要著埋衫定就咁圍住又或者好似男人咁赤條條就咁行出去?嗯

食完早餐後10點幾就出發番和歌山車站再去搭貴志川線睇貓車站,本來可以去埋和歌山城但又要轉車好似好煩咁所以skip左,搭車由白濱去和歌山(搭特急,貴少少,本來都分唔清點分日本d車種,最少有幾款,價錢唔同,研究左一輪應該係停站多少既分別掛),途中經過好多鄉下地方,令我諗起上次去川越既柔閒之旅,嗯

一個鐘度去到和歌山站再轉車到貴志川線,買飛既係第二層,但因貓車整緊,所以無得搭,買飛係全票650yen,d飛幾特別,係挖挖卡,站長用筆挖開當日既日子,幾有趣

因第一次搭,唔多識點攪,所以miss左一班車先識得上車,但好彩地居然比我地見到貓車係度試行中,所以同佢影左幾張相,外面好多貓幾靚入面d登都好特別,同我地坐既普通車爭好遠,嗯

之後呢由第一站搭到總站落車,去到時見到有一團香港人岩岩走,所以之後得番好少人係車站,可以比我地容易d影相,而貓站長呢就係個玻璃箱入面訓覺,都費時理我地d人,佢既辦公時間由9點至5點,有一日休息,會由附近另一站長貓替更,不過睇佢d相個樣都幾串下,所以訓緊覺唔理人係好正常的

入左旁邊既咖啡室睇左陣,有少少貓站長既展覽品,之後就出左去影下個站既外觀,都係貓形狀既,再去旁邊既買野地方睇左陣,當中隻貓醒左,係度行黎行去睇天,唔知係咪等收工呢,不過正如我所想,一貫的串樣,嗯

之後就搭番車走人,丫,仲咁岩見到士多啤梨車,無貓車咁靚但d登都有特別既

之後去左另一個站,叫伊太祁曾站,好細同幾舊式既車站,而且原來係替工貓既工作地點,但過左辦公時間,佢休息左lu,去左附近既伊太祁曾神社,已經差唔多天黑,所以好靜下,睇左外圍同埋一舊穿心木,感覺依舊木頗邪門,感覺非常古怪同唔舒服,所以望左幾野就走開左,好快睇完就走人了

係番車站既途中仲見到貓van仔同埋架貓車拍左埋站,而且見埋架兒童車,貴志川線既特別車都比我地見晒,嗯

跟手5點幾搭車番大阪,番到去已經8點半,放低野再搵食,今次係食烤肉,間鋪抽氣唔多好,我坐果個位為甚,煙到眼都盲,難為係度做野既人日日係咁吸,不過間鋪都幾好食,而且價錢可接受,食完野就番酒店,第二日走人了

To Part.11 - 大阪,香港

[21/11/12 to 01/12/12]
Photo Link <<<<<<<<<<<<<<<<