新解禁邊境生態遊 (Part.01)

貳零壹叁年拾貳月捌日 - 新解禁邊境生態遊

Part.01 - 大頭嶺村,松伯朗村,江夏世居,天光甫,塱原濕地,雙魚河,河上鄉

參加左海濱文化既新活動,名為新解禁邊境生態游,之前聽過邊境開放一直都想去睇,但自己去就懶得搵而且亦相信有關資料唔多,所以海濱開導賞當然就想去啦,但就唔係去多數人睇既沙頭角而係落馬洲,行程非常之長,十點係上水火車站集合,一路行行行最後係落馬洲皇巴站解散,要行足成日,不過好多係我未去過既地方(未開放前既地方都係未去過),所以有得做後補仲要去得成真係非常好彩

新邊境七月先開放,主要係開左馬草壟,信義新村等等地方,其實我無咩concept,但睇圖又真係開左好多地方,無論最後結果係點,都係新地方,點都要睇睇

一開始十點由上水火車站經彩園村行,首先到左大頭嶺村,見到石上河,兩旁有大樹景觀唔錯,之後行左入松伯朗村,仲有農田係度,不過睇黎好多已經荒廢,當中見到真正既牽牛花,原來係粉藍同粉紅色,都幾靚wor,講講下先知原來佢叫morning glory,嗯

前少少就見一條圍村,門口幾特別,似係環抱既設計,印象中第一次見,圍村名叫江夏世居,係客家圍村姓黃,由門口望入去,一整排屋保存得唔錯,睇睇下咁岩有村民番黎,有個團友膽粗粗話想入去睇,講完我地係咩組織就比我地入去,仲去埋祠堂介紹,非常幸運,祠堂既樑非常有特色而且好靚,村民好勞氣地講政府一直係度拖,唔肯幫手保留圍村,聽左陣就行前少少睇荒廢左既書室,仲係木樓梯加閣樓,之後上埋碉堡睇,可惜內裡無咩特別,睇左陣就走了

再前就係一d舊石屋,d外牆幾古舊,經過一度門就出左空地,見到一排幾間既石屋,寫有劉氏陳氏宗親等等,前少少就係博文學校,已經荒廢,但佢既教堂有個校徽,幾靚

之後行去沿石上河行去天光甫,係村口停留左陣,睇左門口爭d取代洋紫荊既大花紫薇,佢d果實好硬咁,之後介紹左天光甫既侯姓家族就行去塱原濕地,係一大片綠色草地,雖然有d地比較濕爛,但望落都真係幾靚,而且好多雀同打雀人,仲有一d小朋友同大人係度參觀,介紹左塱原濕地既保育(長春社同觀鳥會運作,種禾比雀食,總共有二百幾種鳥類,係第一批復耕稻米)

再前少少就係雙魚河,由塱原濕地望過去既山就係排峰同大石磨,穿過雙魚河,睇左陣雀就行左去河上鄉食lunch,地點係河上鄉鄉公所,食既野還可,最緊要飽肚因為仲有排行,食完個快lunch就係集合時間前去行下排峰古廟,可能岩岩整過,所以太新,無咩特別,再行番去村口既居石侯公祠,依度就古色古鄉d,仲見有舊時既灶同生鐵獲,而且有少少舊時耕田既工具睇下,睇左陣就走了,其他人呢有d就去左食豆腐花,聽講一個價錢任食,唔知係咪真係咁好食呢

To Part.02

[08/12/13]

Photo Link <<<<<<<<<<<<

太平山,盧吉道,龍虎山郊遊徑,松林廢堡

貳零壹叁年拾貳月柒日 - 太平山,盧吉道,龍虎山郊遊徑,松林廢堡

本身諗住行大嶼山東澳古道入大澳,但因沙螺灣封村,所以搵左第二度行,不能太heavy但又有d景睇下,而西貢交通比較難安排,所以最後揀左龍虎山行山徑,行太平山,松林廢堡同睇界石,依條路其實好耐之前行過,不過就係夜媽媽行,條山路同廢堡其實睇唔清,日頭再行一次當然係好啦

大約11點左右係香港站集合,搭van仔上山頂,係凌霄閣後面既盧吉道行,但雖然氣溫陽光非常好但維港一帶仍然係唔多清,不過叫仲見到少少藍天咁啦

行左無耐就見到反對盧吉道起酒店既簽名運動,其實咁清幽古舊而且窄成咁既盧吉道真係唔識合有酒店,聽講仲要行車,真係好破壞環境,所以我都簽名支持一下,再前就有更闊既維港view,海面非常繁忙而且好多貨櫃船,夜晚依度個view應該仲靚d既

行無耐就到大榕樹,算係景點之一,枝葉都仲幾豐富,係香港黎講依個古樹都叫健康,不過唔知可以last到幾耐

由起步行左一個鐘度就到龍虎山郊野公園既入口,唔難搵而且路亦整得非常靚,行左一小段樓梯就到松林廢堡,原來都幾大,再落少少樓梯既廁所都幾特別,仲有非常多黃絲蟻係度行黎行去,交通非常繁忙,睇左陣就走人了

係山路一直行去旭穌道方向落山,好快就見到界石,1903年仲保存得幾好,再直落經過d好靚既屋就行到落大學道附近,本身個plan係行香港大學走,不過最後決定行去西環食野,其實唔算太遠,不過落斜隻腳就比較睏,去到西環食完野就搵地鐵走人lu,唔錯既天氣,行下港島還不錯啦

[07/12/13]

Photo Link <<<<<<<<<<<