灣仔唐樓團,荔枝角醫院&青山公路日落及夜景(Part.01-灣仔唐樓團)

13May2012-灣仔唐樓團,荔枝角醫院&青山公路日落及夜景

灣仔唐樓團

再次參加左香港故事館既導賞,今次係講香港既唐樓,一個我非常喜歡既題目

雖然冇得上樓參觀,但今次有趣地係由二十年代唐樓一直講到七十年代既舊樓,建築風格,居住環境等等都有提及,當中亦展示左一d內部既相,知番幾多當時香港人既生活,有趣

第一站當然由藍屋開始,佢本身係華佗醫院之後改建於1922年,果度除左做過醫館,義學仲有當年唯一一間既英文學校"一中書院",後來亦有加下仲存在緊既林鎮顯跌打,guide指出原來跌打招牌背後仲保留左舊既石招牌,真係唔講唔知,亦好欣賞佢地既保育意識,講番座樓,原來由一個2米磚牆為主,其他就用木材所建,只有露台有鋼筋水泥,另亦解釋左點解藍屋係藍色(因當年政府幫佢油油時最多係剩左藍色,所以就油藍色),而有一part係冇油到原因為果個號數係私人擁有,當年政府想收購佢時搵唔到業主所以就有一部份仍然係灰色冇油到,至於果條木樓梯,原來已經拆左大部份,只留番有號數既係度,睇番之前04年影落既舊相,果然冇左果種原始味道,另仲介紹左支撐露台既石柱,原來只有第2條圓圓地既先係原裝,其他一係比人填平左一係再整過,圓拱型設計比較好力,所以舊時既係咁整,不過聽guide講加下好似冇咩人識整,所以其他果7支支柱都唔同晒樣

當中人未齊晒時講左當時點樣一張床訓三家人(下格床訓4個,樓上另一家人,下格下面即床下底另加一家人),亦解釋左埋點解冇樓梯,因張床除左訓仲要用黎食飯做功課亦要黎做家庭式手作幫補家計,兩張床一條龍咁兩家人坐晒係度整,所以唔可以有樓梯阻住,睇相同想像中已知環境真係好迫

後尾我地亦走左去睇藍屋既後面,原來另一邊都幾靚,睇到房同埋廚房既窗原來係唔同既,房既頂就有長少少既石用黎擋雨,而廚房就只係圓拱型,而廚房既牆亦有一d細洞,應該係要黎通風既

佢旁邊仲有黃屋同橙屋,黃屋都係二十年代既樓宇,1922-23年起既,亦仲有人住,仲見有少少保留既木窗框,而另一邊睇佢就完整多d,其中一度門口有好靚既鐵窗花,而一樓亦有另一個鐵窗花,不過已經用木板圍住,應該係為左保養好少少,另介紹左每層樓外牆既牆線,佢話做少彎上去既設計係為左d雨水唔好係牆身流落地,咁樣就會冇水積,佢指左隔離一座灰色既樓牆線係平既,所以都見有好多水積,原來係咁既唔同,另窗框既外貌,每層都有少少唔同,原因係維修時d師父唔識,一係拆左個框一係填平左d坑紋,聽講d坑紋都係防水積用,不過都係加下又冇咩人識整了

而佢旁邊既橙屋,只係少過50年(實際係1949年左右既樓),本來想拆不過因同藍屋橙屋好近,所以一齊保番左,橙屋只係一梯一伙,而且係針型設計,相當小巧,guide仲比左屋入面既相比我地睇,真係好細,亦有相講左咩叫樓梯房,真係物極其用

到三十年代,去左吉安街9號,佢門口亦係圓拱型,而且有石露台,都幾靚下,樓梯亦見佢係石做,屬於三級歷史建築,而佢對面既2號,係1957年既樓,樓梯風口位就係一條條既design,而地下係意大利批盪,好厚身用雲石整既既樓梯扶手,當年一個親戚都係住依種樓,好高樓底好通風

四十年代要出番去皇后大道東186-190號(即合和對面),加下已經圍左板,當時建築係有大騎樓設計,煙囪等等,而同時亦講埋當年有騎樓行業,除左仲見有人係度整鞋外,當年有人整錶,熨衫亦有人坐係度搣牙菜等等,雖然加下睇唔到樣第時又唔知整到咩鬼樣,但我搵番08年舊相,原來當年我有影到依座舊樓,當時覺得佢既窗好古舊,而背後就係廚房同浪衫既地方,當時我亦有影到

五十年代既係慶雲街17-19號,亦係已經圍左板唔知點整,睇相介紹最主要係有煙囪設計,同埋因街道窄,所以越高越會收窄,主要用黎透光用,當年既環保意識真係比依家得個口講字好得多

六十年代既係堅尼地街11號,都係一大座既舊樓但有凹陷或露台既設計亦有前後樓梯及前後門

最後係七十年代,隆安街5-6號,最特別既係紙皮石既外窗裝飾,窗仲有好多鐵框同舊或既把手,都有一段時間冇見過

當中亦有講及石水渠街既歷史同北帝廟同周圍既街,因之前既團已經聽過所以冇咩特別感覺,但發覺到一個好舊既路牌係北帝廟幅牆度,e類舊式既路牌已經非常之少,希望灣仔既舊街坊可以keep到依度唯一少少既舊區,雖然眼見已經又話起酒店又話起唔知咩咩,保育係香港黎講真係幾咁難呢,唉

最後行番去搭地鐵時經過見到一間雀檔,門口有隻粉紅色鸚鵡係度曬緊太陽,佢個樣好趣怪而且成日抬頭望天,另門口上而掛左另一隻識講野,又講hello又講好叻仔後尾仲聽見佢唱happy birthday to you發音好準.勁呀,係果度睇左陣見有人買雀,個外國人問點分男女,原來睇個鼻d色,同色既就係女,但其實又難分,我見好似隻隻都差唔多色,最後放棄了,哈

To Part.02-荔枝角醫院&青山公路日落及夜景

<13/05/12>
Photo Link <<<<<<<<<