緬甸 2013-01-31to02-16 - Part.12(11Feb)

緬甸

11 Feb 2013 Sun Mandalay,Monywa(South) Sunny day

因巴士站同酒店有一段距離,所以6點車我5點就起身15分就出門口,行去既路一d燈都無所以好黑下,去到巴士站只係5點半,見有時間就係佢隔離既鋪頭食下野,未見有人食野所以都真係唔知食咩好,行左去整野食既地方,有幾碗麵係度,就嗌左一碗,整好左上到木台就發覺好油,見有伙記仔(未夠十歲)行過就指指附近既奶茶要左杯,最後因一大清早碗油麵只食得一半,實在太惡哽了

食完就番巴士站搵車搭,原來係另一邊車站先係,好快咁搵到架車就上,架車未夠6點就開,果然係外地不能放鬆,架車係咁係外街搵人,見佢羅住張list,唔知準時到巴士站既人佢地點搵呢,又唔見佢地講電話,只係識係街周圍兜,攪左一輪先開始出發,架車比之前由早緬番曼德勒果架靚,仲有冷氣,所以比較凍,我揀左第一排位,揀完番去都知出事,隻腳唔可以伸直,好彩架車唔係好多人,所以可以用埋隔離個位,長程車都係有廁所位同食野位,用左3個鐘未夠9點就到左蒙育瓦(Monywa),真快

係巴士站有個阿叔埋黎,問去clock tower幾錢,佢話1000ks就上車,開始時佢問我之後去邊,我話未諗,佢車我去clock tower附近酒店話10us,但去到要15us而且無熱水,因地方比較凍所以要去有熱水既,最後車左我去Monywa hotel,但比較遠,30us有熱水亦有wifi,但因太早未有房,放低行李問阿叔去南邊睇企佛(bodhi tataung)童話寺(Thanboddhay paya)等等幾錢,佢話9000ks都唔貴,再問第2日一早睇石窟(Hpo Win Daung Caves)幾錢,佢話15000ks,睇過d價錢ok啦,雖然之前話左係monywa唔再坐電單車,但因實在平同埋快所以最後都係揀左motor,哈,係hotel去埋廁所就出發,突然間諗起油錢,問阿叔原來係包埋(曼德勒條友都係咁講,好唔老實),見佢包埋就出發了

首先去童話寺,外面一般入到去好多佛像,d小佛放到上天花咁高,好利害,之後去左睇塔(唔識路司機帶我行),但因為只可以係男人先上得去,所以只好係下面睇睇,之後去左第二站睇企佛臥,好大個但因11-12點,所以好熱好晒就暈低,企佛可以行上去,每層都有圖,係地獄圖,再上就係救贖故事,爭d以為要上到頂(424尺),但行左8-10層左右就close左,無得上,望出去開揚但天氣太熱,好朦,再去睇前少少既臥佛(reclining buddha),去之前因太熱食左個雪榚降溫,臥佛都好大但入面好似未整好咁,睇左陣好快就走

再去睇波地塔通菩提園(Buddha Park of Bodhitahtaung),去到周圍都係佛像(記錄係1000個),每個旁邊菩提樹,而且因視野廣闊加一大片草地,雖然好肚餓但某d佛像位好寧靜又有微風吹過,感覺舒服,再前少少上左塔頂,望出去同企佛臥佛連成一線,幾特別,雖然有d位因太整齊好似墳墓咁,但整體感覺不錯,當中因太熱,我睇完佛後就見到司機坐左係大樹下睇緊本野,佢比我睇原來係一本記事簿,入面寫左好多遊客既感想,兩條友係一個比佛像同雜草包圍既大樹下睇過往人寫低既感想,都幾有趣,睇完就開車走,後尾先記起睇漏左A Myint,係英式建築,不過算啦,之前都例左入可睇可不睇既項目,所以無叫番轉頭睇而直入番town算了

番到hotel已經2點幾,卒之有房了,行李仲幫我搬左入去房,間房係獨立式,感覺唔錯,入面亦幾舒服下,放好野沖完涼就覺肚餓(之前只食左半個麵),但因出面太熱而且條路好遠,所以訓陣等太陽落山先算,訓到5點幾起身就出去,問hotel訂後日去蒲甘(Bagan)巴士飛,佢幫我打電話訂話只有9點,但info明明有8點佢死話無,要5個鐘即係成2點先到蒲甘,不過算啦,9點車要8點半到巴士站,話只係book到時再比錢,想叫佢幫手嗌車,佢話酒店門口好多,但入黎時唔多見,只好半信半疑咁行出門口,行到出去只見一架tuktuk同電單車,有條友過黎我話去clock tower,佢唔明比佢睇佢走去問人,開價2000,太貴了,我要1000話遠要2000,最後算了,果然好快就到,佢收完我2000後仲夠膽死問我聽日去唔去睇石窟,傻架

見時間尚早去左市中心既瑞喜宮塔(shwezigon paya),因日落關係所以顏色唔錯,但其實間廟只係一般,有個阿叔隊左本書比我,我以為要錢死都唔要,最後佢話送比我,原來係間廟既介紹,睇左陣就走人了,因有d倦,坐左係門口睇下街發下夢咁,岩岩係其昏時間,寺廟會有僧人開大speaker頌經(其實緬甸好多地方都會係咁,不過之前無留心亦無細心坐係度靜靜咁聽,所以一直都感受唔到當中既感覺),雖然唔知佢講咩不過有一種溶入當地既感覺,不錯

之後行左去夜市,好多野食好熱鬧,亂行見到有檔地灘,賣緊一d類似夾餅既東西,面頭係薄皮入面係即刨椰子,都幾好食,行行下就想搵飯食但依度同之前既有少少唔同,除左好多雞批炒飯(即曼德勒最後一日果d),另就係薄餅,唔知咩粥,仲有炸野食,個炸春卷一支支楝晒係度好趣怪,行左陣去左一檔好多當地人幫襯既食檔,係即點即炒,做出黎個樣好似可以,所以指左個唔知咩豬耳食,之後想嗌飯,聽唔明,起身搵下見幾張台後有人食緊飯,就指比佢睇,卒之有飯食了,食完就行番酒店,一身汗,好倦,好快就訓了

丫,因為我只帶輕裝,所以只帶得一條褲,經過十幾日既路程同電單車風麈僕僕,已經烏糟到爆,但條訓覺褲實在太短,所以唔可以羅條烏糟褲去洗,只好用濕紙巾抹下d塵,下次真係要帶條出得街既訓覺褲先得

To Part.13 - Monywa(West)

[31/01/13 to 16/02/13]
Photo Link <<<<<<<<<<<<<<<<<<