貳零壹叁年拾壴月拾伍至搭柒日 - 大嶼山3日2夜camp(東涌昂坪羌山龍仔大澳)
因環境太舒適,本來話6點起身7點出發最後攪到成8點起身,煲完水食埋早餐後就出發了(今次只係食包,因想早少少落大澳食芋頭魚)
由萬丈布行經龍仔落大澳,之前一晚因天黑睇唔到路,原來有牌寫左前面有水池,行左陣搵下,只係見到一個大少少既池,但都幾難落去,唔知個牌寫既水池係邊
好快行到龍仔個交界,有張石椅雕左字,仲生埋青苔,但年代久遠,只清楚見到龍仔兩個字,前面既就睇唔到,可能係此路經龍仔,研究左陣就算了
今次以落山為主,當中經過龍仔悟圓,已經荒廢,但望落幾靚,行前少少仲有個荷花池同九曲橋,睇門口簡介話私人起黎靜修,1962用左五年時間起,曾經開過比遊人參觀(後尾同屋企講起先知原來依度我都黎過,好有印象係非常之多鯉魚),依度無車路,當時都幾工程浩大
前少少又係一個平地,有幾張石椅,雖然地方唔大但環境清幽,開舒服,無幾耐去到一個瀑布,都幾大下,佢地話細過黎過,見d水咁清,所以落左水玩陣,再行無耐就見到一排山,睇到360同大佛既所在,望番原來我地行左好多個山頭,唔睇都真係唔知行左咁遠
再落就係更斜既山路,無耐就到大澳,經過梁屋村附近去東方小祇園,但時間太早未開,問過要12點半,所以我地行鹽田條路出番大街,依邊我從未去過,但環境唔錯,有好大片紅樹林,而且見拉晒布話反收地,丫,本身我地有條路plan由分流經二澳落大澳,好在無行果邊,我地入到大澳先知原來二澳比村民封左,依排行山真係多災多難
番到大街未算多人,首先去左餐廳飲咖啡,醒起打電話訂雞,搵到電話打去話原來要訂位,即刻講我地岩岩去過未開門,所以最後都比我地食,如果唔係一早知我地係附近,我估佢地都會唔比即訂位,攪掂order飲完野就行陣街,出左去飲支紫貝天葵茶,10蚊大支,佢地極力推介,飲落似山渣水但無咁租,清清地唔錯,仲買左兩包豆豉,10蚊兩包,佢地話好味wor,前少少見有魚子買,又係好似好好食咁,60蚊一大對,食落似咸蛋王,一d都唔腥,好食wor
番到東方小祇園門口已經坐左幾台人,我地入左冷氣房,除左雞同芋頭魚仲叫左魚肚羹同菜,真係好耐無見魚肚羹咁多料,芋頭魚個so皮無索番d油,感覺好清同埋d芋頭亦唔溜,連我平時唔食芋頭都食左兩三舊,雞亦夠味而且滑,三個人食晒成隻雞都唔會飽飽濟濟,依度既水準真不錯
講講下點解由昂坪既茶園執左食唔到芋頭魚再落番大澳東方小祇園食到芋頭魚,發覺可能係一個陰謀,難怪最後都有芋頭魚食,所以我地最後定名依個camp係3日2夜芋頭魚之旅,哈
食完野好飽,加上係昂坪3個半鐘既山谷迷路用晒d力,所以最後我地決定由大澳坐車番東涌(本身plan大澳行涌澳古道落東涌),番到屋企先知原來東涌沙縲洞又比村民封左,依排行山真煩,不過好彩我地避開晒
好耐無行過夜山,亦原來我未試過3日2夜camp,雖然係山上食得好簡陋但感覺幾好玩,唔錯
[15to17/11/13]
No comments:
Post a Comment