Uzak

~~Uzak(遠方烏扎克) - [2002]~~

比較靜態的電影,畫面很多時充滿寂寞沉悶隔離的氣氛,在經濟困難時刻生活在不同環境下的兩代人中間所不同的價值觀及處事手法,男主過於抽離保護,男配又顯出不太務實而帶點窮心未盡色心又起之渴望,人物描寫及演出比較立體而自然,就是鏡頭有過於刻意之感,總感覺太過頻繁的空洞美麗但欠缺自然

<08/05/12>
Photo Link

荃灣荃錦拗camp

荃灣荃錦拗camp

好耐冇黎過荃錦拗,本來就係去佢隔離既扶輪公園camp但因之前一晚落好大雨,所以地下好多積水而且camp site比較細仲係最落果格,驚夜晚落雨d水會沖晒黎營,最後都係行番去荃錦拗會大少少,去到中間果隔都叫幾好環境,最上有人最下好似好多蚊,雖然去廁所又或者羅水會遠少少但都叫可接受,但真係好大霧

夜晚係bbq,7點開始因d炭唔得又係慢燒,暖後攪到12點先食完,但大埔既羊真係幾好食,雖然最後埋單有d貴但都算ok,而且d野食預得岩岩好冇咩食剩野,實在太好了

即晚可能係星期六,好多人鬥車,夜晚d飛車聲好嘈,我估最少嘈到2點先靜d之前去依度camp又好似冇咁既情況,丫,我冇帶吹氣地席,所以訓時地氣好勁,所以我用左一塊地席再加垃圾袋再加報紙同防水袋,最後仲有背囊執rain cover都用埋鋪左係背脊位,加埋裹屍布同埋個營本身既地席,真係有7層先得,唔係真係凍死

半夜去廁所時因唔想行太遠,所以用左近果個廁所,雖然聽講好污糟(佢地日頭時一打開個廁所門就有成百隻蚊飛出黎,真係半個山都聽到佢地既慘叫聲),但夜晚去又冇咩,可能打開左隻門好番d,去完廁所見到仲係成個山頭都係霧,唔知係熄左燈定點,好似仲大霧過之前

第2朝一早又黎鬥車聲,嘈死,但我地都訓到成10點先起身,早餐又係咸牛蛋包,食完野pack好晒野就又食lunch,餐肉麵加五香肉丁,可能天氣唔太熱所以個個都可以食到,唔係平時多數熱到冇胃口食lunch,所以今次好多野都食晒冇咩剩,非常好

<05&06/05/12>
Photo Link <<<<<<<<<<<<<

坑下莆-北大刀屻(牛牯嶺行山徑)-大刀屻-嘉道理農場

坑下莆-北大刀屻(牛牯嶺行山徑)-大刀屻-嘉道理農場

因好少行大埔,所以襯住五一假期就行下,起點由林村附近既坑下莆開始經牛牯嶺行山徑去北大刀屻到大刀屻,本身諗住行落元朗或粉嶺,但因d小路已經密林,望落應該難行同迷路,所以都係行番大路由嘉道理農場走

一開始預計要6個鐘,同埋知道要大上大落,因有雷暴關係,前一日都覺可能行唔到,8點起身聽到取消左所以就安心出發,去到沙田見陽光諗住ok,點知去到太和落大雨,但11點半出發時又冇晒雨仲要出太陽,唉,行山最甘莫過於落完雨又再出太陽,d熱氣晒番我地就變晒蒸包,而且氣壓勁低又悶熱翳焗,仲要一開始就行水泥路同埋好斜上山,其實都幾辛苦,而且成條路都充滿大水沖過既痕跡,好多沙石同埋草,行完2600米既牛牯嶺行山徑去個亭度就見番泥路,個人即刻開心晒,雖然個北大刀屻觀景台真係乜都睇唔到(比樹遮晒),但上去時沿途都見到大埔同元朗景

係亭坐左陣食過包後就再出發上北大刀屻,明顯有番d風而且有樹蔭,所以好行好多,但我最憎既樓梯都有唔少,去到最高點就係566米,由零上去其實都幾甘但比起之前去camp行山既full gear其實又唔算係咩,只係天氣太翳焗同埋太耐冇行山所以先行得咁慢,行下行下都用左3個鐘(唔計休息時間),丫,仲有朋友個朋友唔知係咪著錯褲定點,行得比較慢,相黎講好似永遠都係得2個人係我前面,但其實我地係4個人行的,哈

係北大刀屻坐左陣見到居然有兩隻燕子飛到咁高,而且其實好大風,佢飛左好多次比都風吹番轉頭,真係睇見佢就辛苦

再行所見既景就更多,但又落下雨又出下太陽咁,明顯係玩我地,anyway,再上多10米左右係大刀屻而且見有圍欄,原來係懸崖,算係幾高下,怪不知要欄住,本來諗住行多3個路口就落山點知d草密得濟過晒都唔知,所以最後行大路落嘉道理走,因為咁落完少少山後就又上番個山仔,又係樓梯而且都幾直下,所以行得慢少少既新朋友就頂唔緊爭少少中暑,要上到山丘上面除鞋換短褲再休息同飲保礦力先掂,我呢就係烈日下冇咩做就又訓左陣,休息左一排就再行,落斜因之前落完雨都幾冼下,要小心慢行,唔係就真係會冼低,最後5點左右到地面,唔計休息5個鐘完成,比想像中易行(但睇相番就真係幾險要咁),如果唔係落過雨應該就更易,而且一整條路都幾多植物同山o念,熟左應該成個山頭都有山o念,可以擇黎食,應該幾唔錯

<01/05/12>
Photo Link <<<<<<<<<<

鼓浪嶼 2012-04-19to22 - Part.04(22Apr)

鼓浪嶼

22 Apr 2012 Sun 鼓浪嶼,廈門 Sunny day

又係一個陽光既日子,因last day又行左好多地方既關係,所以訓到好晏先起身,食過早餐後pack好行李成12點先係酒店走人,羅住行李行左去一間叫林記魚丸既地方食野,好似幾出名咁好死多人,不過d魚丸都係唔夠第一晚既隨意小吃店好食,丫唔記得左講鼓浪嶼d鋪有印仔,d人買左本書仔就係每間鋪頭度級印仔,我係好迫既魚丸店都一路食一路比人係隔離級級級

走人時既星期日真係劇多劇多人,見好多人坐船入左黎,真係唔可以同佢地一齊所以我地趕緊走人,係船度已經比入黎多左好多人好多,隻船企滿晒人而且好嘈,我合埋眼就咁聽感覺有最少5-60人係度講緊野,真係坐多陣都頭痛死

 去到廈門既中山路,果真好似廣州上海咁既步行街,去左老鋪黃則和食下花生湯,果度要買一張張細細既票先至去小窗度買野,找既又係一張張摸多兩摸會爛溶溶既票,都幾得意,求其買左d野食就出去周圍行下,去左橫街見到一度叫第六市場既地方,係一座都幾舊既大廈,佢對面就係都係舊式既舊樓,感覺有d似九龍城寨既舊樓,行多陣去搵左間冇咩人既cafe又坐下飲下野咁,夠鐘就走人了

感覺鼓浪嶼同我想像中唔同,可能真係唔夠hea而且都唔算多cafe,不過舊野就好岩我,有機會會再黎

Back to Part.01

<19to22/04/12>
Photo Link <<<<<<<<<<<

鼓浪嶼 2012-04-19to22 - Part.03(21Apr)

鼓浪嶼

21 Apr 2012 Sat 鼓浪嶼 Sunny day

一大早就有好陽光,但因係星期六既關係,酒店多左其他人住,一早就已經有條細路係度嘈,爭d我就起身小爆佢,後尾食完早餐後見佢行過就兇狠咁望實佢,見佢眼神避開應該知咩事了

9點幾出發,去左筆山公園,原本酒店後面去筆山公園條路好靚,果棵榕樹真壯觀,加埋d陽光,好靚,影左一輪相去左筆山公園搵舊遊樂場,去到得番d石柱同石做既迷宮,冇左好舊式既滑梯同d搖搖板,可能已經比人整爛晒,可惜

跟手又係周圍行,上到去半山既地方,d風好涼好舒服,難怪咁多貓都係度休息曬太陽,真識揀,落番山又見到好多其他既舊屋舊巷,真係求其拍埋一幅牆就有寫真牆寫真窗寫真門,怪不知咁多人中意黎依度影相

見有時間想搵左間cafe坐,但因已經係星期六,一街都係人,真係冇咩地方可以安安靜靜坐低休息下,所以就走左比較遠之前夜晚經過一間係巷口叫海怪先生既cafe坐,果度仲有lunch食真好,間cafe叫,我地搵左3樓坐,都幾舒服而且d野幾好食,特別係一個叫香蕉奶油培根意粉,見餐牌時感覺怪怪的,但原來好好食

再行亂咁行多陣就番酒店,放低野就玩下uno休息下先出去食野,飲啤酒買左街邊既雞腳食,原來又係好好味,飲下野玩下咁幾寫意,見天色好好,研究下影日落既可能性,到左差唔多時間就上天台影,正呀有咸蛋王而且仲幾大個,不過個magic hour就唔係好好,顏色太淺,但天台環境同景色相當唔錯,仲望到陸仔成日講既多人到插針都插唔入既光明頂(即係日光岩頂頂果舊石)添,玩左一大輪就番落去坐多陣就出發食野

又係唔知食咩下經過一度山坡仔既地方,有幾張木台又係食小菜既地方,感覺都幾有氣勢但環境都幾黑下,我當然咩地方都食得但其他人呢可能想再搵搵但行前少少都冇咩野,所以就係依個黑蚊蚊既斜坡食野,小菜唔算貴而且都算幾好食,食完野又行左陣出左去買杯奶茶追加左一個花生捲就番酒店,又係玩uno飲下酒既生活,第2日走人了,好快又完一個trip,有d唔捨得時間過得咁快添

To Part.04 - 鼓浪嶼,廈門

<19to22/04/12>
Photo Link <<<<<<<<<<<<<

The Art of Negative Thinking

~~Kunsten å tenke negativt(The art of negative thinking,逆向思考的藝術) - [2006]~~

一開始什麼的残障協會如何積極如何面對就令我想起教會人士永遠唱好的感覺,此電影會令想起幾樣東西,究竟誰是不願面對現實的人?坦承與包容究竟誰最重要?打破缺口置之死地而後生,沖突過後才是真正考驗的關口,positive thinking是否單一的解決方式?正如前些日子看過一句"别說你感同身受,世界上根本没有感同身受還回事"殘忍而真實,但這就是世界上某一種現實又存在已久的運行模式,正如不說出來是否等於不存在?過於包容亦也是偽善的一種,逆向思維也是一種打破缺口的方式,成或不成也是一種方式,我們不能去否定他的存在意義,故事就是這樣了

<30/04/12>
Photo Link