潮人盂蘭勝會食品祭品講座

之前聽過盂蘭講座,知道大約香港盂蘭既來源,種類以及某些盂蘭勝會既流程,但因長春社攪既潮人盂蘭勝會講座爆左,而第二場我又唔係香港,所以聽唔到太多詳細既講解,而今次依個呢就係潮人盂蘭勝會食品祭品講座,當然講得比之前既盂蘭講座更集中,而且香港既盂蘭勝會印象中應該係潮人最落力同最有系統(當然有錢同團結亦有當中之原因)

今次既講者分別係胡炎松(潮州商會青年委員會副主任)同楊子儀(貴嶼仔潮式餅糖糕飽專門店負責人),前part由胡先講,原來潮人盂蘭勝會係由4-50年代移民潮開始,因當時既潮人隻身來港而且窮既關係,如果死左亦好簡單咁攪葬禮,但因潮人本身比較團結,所以後來就開始係7月搵僧人超道亡魂(潮人盂蘭以佛教為主),就將依個盂蘭勝會由中國帶到香港,另因潮汕(粵東)遠離中部,所以傳統保存得比較好

講明依個係食品祭品講座,所以講過下少少引子後開始講解盂蘭勝會入面既祭品,唔講唔知原來都幾講究,當中分為大祭(祭祖),祭神(一般神靈)同路祭,所用既物品各有不同,大祭要用五牲即豬,雞,鴨,魚,豬肝,而祭神用三牲即豬肉,雞,魚,而路祭就用小三牲即小片豬肉代替成隻豬左大舊豬肉,用雞蛋代雞,魷魚代魚等等,而配套就冇咩指明,不過潮人多用紅桃果.而盂蘭勝會前兩日呢就係用齋黎拜,所以後黎楊所介紹既餅糖榚包就有好多係為左前兩日既祭台用,而第三日係最多最齊既,因街頭坊會自己帶備豬,魚,鴨等等真肉放係祭台上,所以如果主辦單位有錢,係會放左好多野係上面

而奉佛酬鬼又係另一d,奉佛五果十供,五果有蘋果,橙,香蕉,菩提子,芒果等等,十供有花,香,燈,塗(水),果,茶,食,寶,珠(佛珠),衣,而酬鬼祭品係飯山,麵山,通菜山等等,因鬼不知數量,所以山為無限,酬鬼大部份係山,胡講解時順手講埋招魂施食前先有個五支幡幢咁上下既東西,即豎立五支幡(東南西北中),用以保護以維持秩序方便僧侶儀式施行,稍後亦講解左神棚祭品,因頭兩日要用齋,所以以潮式榚餅(棋子餅,壽麵,糖獅塔等等,至於點解係獅,其實好講主辦既主席如有相沖可能所擺既野會唔同),五果,福品(福祿壽像,金器,名酒等等),而酒具係以十二(地支)或廿四(節氣)所放,並唔係亂來的,擺位黎講呢,楊講及以美觀舒適為主,除避開相沖物外亦以環抱式擺放,多以山字為主,7月去睇時留心下先

之後講既係紙紮祭品,係我好有興趣既東西,13種祭品當中,以頭二及尾二為重要,中間既係其他角色,順序為神袍(天地神三件神袍),帝冠腰帶長靴,大士王(即鬼王,維持秩序),紅色神馬(帶信眾的願望上天),值符使者,白馬(值符使者係帶關文伸請通行證開關而白馬就係送佢落去既),金色馬(係完成所有儀式完結後化為此馬功德圓滿永福之意),金童玉女(最後一日和尚會羅住佢黎做一個散旗儀式,即叫番晒所有遊魂要回地府),仙鶴(用黎報告每一儀式完結),樹高燈,幢幡(和樹高燈一樣用作招魂用),金絲吊(用黎點綴比較靚既東西),冥鏹衣紙,真係唔講唔知咁多故事係後面

最後一part係由番楊講潮式榚餅祭品,全部都係餅糖榚包做,所出黎既造型有好多,除左山珍海味,福桃外(包類)仲有其他糖塔,齋五牲等等,好多好多,楊除播左段片講糖塔造法外(用白糖做比較白同埋打空氣入內可發脹,時間要用1個鐘右左,做出黎除外型靚外仲要夠薄先叫好),佢仲帶左實物比我地睇,仲分享左一個用花生糖做既豬頭同埋一盒餅黎,花生糖豬頭呢入面係米通食左少少好甜而餅我就食左個白皮綠豆沙餅,口感唔錯但又係甜死

聽完依個講座後7月去睇盂蘭勝會就會有趣得多了,哈

[11/08/12]
Photo Link <<<<<<<<<<<