台灣花蓮,蘭嶼 2013-06-20to27 - Day.06(25Jun)

貳零壹参年陸月貳拾至貳柒日 - 台灣花蓮,蘭嶼

25 Jun 2013 Tue 蘭嶼 Cloudy day

一早起身見閃電,所以又睇唔成日出,訓多陣就跟手出去食早餐再由老闆車我地去遠少少既地方行下,途中經過蘭嶼機場,真係非常之細,但外型呢就似足蘭嶼傳統既併板船一樣,比較特別

之後係蘭嶼生活文化館放低我地,因岩岩學校有畢業禮排練,所以入唔到去睇,過左去隔離既達悟(雅美)族傳統屋,因時間尚早而且係平日(明顯假日會多人多車好多)所以無咩人,之後再過左去隔離既蘭嶼文物館,睇左好多蘭嶼傳統既用具,物品,都幾特別

去左漁人部落,首先食左個lunch就繼續行,經過發電站,再經過居民住既地方,某個門口縛左隻山羊,真係有羊咩鬚果種,可能慣左見人,卒之可近距離咁睇清楚佢,另海邊有好多併板船係度,再前少少見有人曬緊飛魚尾,比風吹吹下都幾靚,聽講掛起飛魚尾就即係果個部落已經停止出海捉飛魚(飛魚期係3-6月),再前有個小山丘,望落幾靚,可惜無太陽個海d色爭好遠,再前少少有間吧叫無餓不坐,係蘭嶼似乎都幾出名,有隻貓懶洋洋訓覺,見無咩睇亦唔多想飲野所以就走人

再行呢就係另一部落,叫紅頭部落,首先經過見到有賣假菠蘿既地方,香港黎講依樣野無咩用,但蘭嶼居然用黎渣汁飲,味道清清地還不錯,依度睇落比較多人潛水,好多潛水東西係度民宿又比較多,所以睇黎依度多人落海潛水,行左陣有個海灘,一般般而且都好大浪下,睇左陣走人,仲行左去個球場,見有整緊既拼板船,旁邊有人仲請食飛魚,依度都炸得唔錯,幾好味

再行見到買手信既地方,又有郵局等等,感覺舊式而且人非常之多(佢做埋儲錢匯錢功能),係海邊飲左個芋頭沙冰定奶昔既野,味道一般,仲見到個醉酒佬煩住晒,又見係食飯時間,所以去左附近一間類似私房菜既地方食野(之前行過好多人食緊),去到要等45分鐘,所以出左去木亭睇海,但依度d風好大,難以想像打風時吹成點,而且又好立痴痴,唔似得東清果邊咁舒服清爽,坐到差唔多時間就番去食野,佢d送都幾好味,類似家常菜,而且個飛魚好味道,湯亦不錯

食完野決定由中間行番過去野銀部落,因太陽出番黎,所以個海又有番幾隻色,行上去係斜路,行左一段路先見有車經過,所以就坐順風車番去,仲可以去埋東清,所以唔洗行,經過沙灘,見有隻死海豹沖左上岸,有個人黎左影相話係研究員,估唔到依度都有海豹,仲以為好凍既地方先有添,見有時間,去左買酒等食飯,因一砌都停晒既關係,有個亭都無人用到,所以我地就坐係果度飲下酒睇下d人咁啦,有班人游水又有班小朋友係度玩,仲見到成班羊係度周圍行

睇睇下到食飯時間,食完就又去買酒去番個木亭度等台灣女仔,原來佢都係行路,仲行左8-9個鐘,但未行得晒就天黑,有車都唔查不過其實慢行唔曬都ok的,不過佢話無燈好黑所以其實幾恐怖,電筒都唔羅,哈,講左陣野,之前一晚既原居民又出現番,無幾耐聽到街外d人好嘈,原來係一個送別儀式,村入面既男人會羅住木棍鐵棍,一路行一路大聲嗌,類似盂蘭最後既收鬼儀式,因依度前幾日死左人,依個應該係最後一日既儀式

最後飲完野就番上民宿諗住最後一日可以睇日出

To Day.07

[20to27/06/13]
Photo Link <<<<<<<<<<<