長春社 - 新春 屏山遊 盆菜宴

貳零壹参年貳月貳参日-新春 屏山遊 盆菜宴

參加左長春社既屏山遊,盆菜宴,屏山之前去過好多次但屏山文物徑呢真係好似未行過

2點係聚星樓集合,首先梗係睇左聚星樓先啦,聽講原本係7層但後尾霖左得番3層,本身係以紫薇星為主陪以北斗七星(即聚星樓共7層)再以凌漢為星空既鄧氐吉祥建築物,雖然外表好新淨但至今已經有600年,有比較明顯既五嶽朝天建築,但講者話以新田蕃田村比較正宗,有機會去睇睇,而塔入面既格局就比較簡單(雖然只可以係樓下睇),但一睇已經唔係近代建築,所以我比較喜歡內籠多d

之後行左去附近既地方,有個大池塘,睇落又係風水野,再前少少就有一個社,因為岩岩過完新年,所以布置尚算相當新淨,見到最基本既土地公公婆婆,上面有五福臨門(5張紅色條,即長壽,富貴,康寧,好德,善終之意),而且燒爐(圓型洞)亦係同一社內,所以睇落都有番咁上下歷史

之後行左去最近既上璋圍(屏山共有三圍六村),門口有個古時既糖較(用黎整庶糖既)係度,再前少少有個水井,入面仲有水,之前係比上璋圍,坑頭村用,已經好多年歷史,古時會係女人既社交地方,一路洗衫洗菜一路傾計咁

再行就係楊侯古廟,正中間既侯王廟,左邊金花娘娘(十二奶娘),右邊土地公,依間古廟原來好有建築特色,首先係旁邊既班虎(定班府呢?)聽講係關於魯班既,應該係一d意頭既野,一條白色唔斷既係佢既特色,另外門樑上既雕刻,非常細緻,而門頂上有既門板,用黎遮住最主要既門樑,唔比佢風吹雨打太陽曬,真係唔講都唔知原來咁講究

再行去仁敦岡書室,途中經過一間舊屋,又講左一D建築既東西,原來門柱同門面(即門頂)係講依家人有無錢既,如果越厚,即越有錢,另牆既砌法亦有特別,分順同丁,順即橫丁即直,交叉夾雜咁砌就會做到清涼同隔聲效果,古時D人真聰明,再前少少有間頂有特色既屋,講者蘇SIR話如果有功名既人(要秀才或以上)先可以起一間有耳仔既屋頂,原來係咁,去到仁敦岡書室,都幾有氣勢,神台都好靚,但神主牌已搬走,樑上既雕刻亦精緻,佢既公仔亦有佢既意義,不過講完已經忘記了,哈,再前少少係鄧達智既屋企,門頂好大,係有錢人家既屋,而且都好古舊好靚下,最後行左去五桂書室,門已經關左,而且蘇SIR話入面己經改建既無咩特別,最有價值係佢好似樹葉既窗,比較少見

因時間關係,首先去左坑頭坑尾村既鄧氐宗祠同愈喬二公祠先,所有舊建築,應該先睇柱,樑,門等等,鄧氐宗祠既樑非常靚,話得係香港四大家族,祠堂當然係三進式先夠氣勢,有個牌扁寫住壎篪翕翕,前兩個字係樂器,蘇sir比左個實物我地睇,後尾兩個字解和陸既意思,之後過左隔既愈喬二公祠,柱係天圓地方,而中間有祝壽賀帳亦大有來頭,唔詳細講了,順手去埋聖軒公家塾,雖然維修緊,但蘇SIR介紹左地下既厭勝渠口,用黎壓制烏糟野,都係古時既風俗

去到覲廷書室,十分值得睇既地方,相當有特色,首先係耳房,佢既門口,窗等等都十分精緻,而且夾雜西方既彩色玻璃,幾特別,再行前少少,亦係中西合壁,不錯既地方,仲順手介紹埋古時既廚房,煙囪上窄下闊用黎防止燒柴時火種跌番入爐,而門既閘亦係有機關,用黎防止小朋友入廚房,仲介紹埋咩係灶罅同點用添,哈

最後去左塘坊村既述卿書室,地方都幾偏僻,而且已經比人拆晒只剩低好高既門樓,但柱同樑亦有保留,加上有個好似閣樓既東西,可以近距離咁睇d雕刻,唔錯

時間去到5點半,到左一間叫屏山盆菜既地方食野,未食得前睇下佢地既相,傳統村落既盆菜真係大堆頭,利害,到左6點零鐘,有得食了,原來只係小盆菜,反而其他野仲多d,好多未食過既食送,相當好味道,不錯

[23/02/13]

Photo Link <<<<<<<<<<