貳零壹参年貳月貳拾肆至貳拾伍日-粉嶺圍太平洪朝
Day.01 - 24Feb2013
第一次正式參與太平洪朝,位置係粉巔圍,之前去過影相記得佢個門樓有d特別,今次呢因咁岩星期日,所以就一早去希望可以睇晒成個流程
基本上粉巔圍係每年都會攪太平洪朝,為期兩日,我首先係希望8點去到可以睇到貼平安符既儀式,可惜係我8點2去到己見住戶既門口已經貼好左新既符,咁即係依個儀式我無緣睇到,都真係唔知幾早開始,唉
去到場地唔算太多人,只係有村民陸陸續續拜祭,上祭品等等,木台面上既多數係一d紅色同吉祥之物,生果等等,另比較特別既係有一隻已煮熟去毛既大生豬放左係台,有別於盂蘭所放既豬肉又或者係燒豬
時間到左九點零鐘,燒過爆仗後就開始做儀式,主要係由道士帶同八個朝首(由村民問杯而選,會著深色長衫,代表村民拜祭)一同拜祭,仲有生雞一隻,經過一輪拜祭,祈福,潔淨後就開始下一儀式,人亦相當之多了
以我所知粉巔圍依個搶雞毛儀式係獨有既,首先會由數個年輕既村民捉住剛才做過祭祀既生雞一齊登上圍牆上既閣樓,因粉巔圍既門樓有幾個細窿,咁岩岩抆出黎既雞毛就會由依幾個窿放落黎,下面呢就有好多村民去搶依d雞毛,係吉利既意思(聽講有幾百年歷史),依d雞毛稍後就會放落隻船度同d穢物一同送走(所以我都唔明點解d街外人搶黎做咩,一來係人地既地方,觀賞就好了,二來羅左d雞毛又會點處理呢?都唔知人地個用途同用法真係唔知搶黎做咩)
搶完雞毛好多人都走左,場地呢又開始準備另一儀式,我呢就有村民請食生果同米餅,而之前果隻生豬就開始比人斬開,跟手要黎分番比村民同內臟係用黎煮粥既,而下一儀式要用既紙船亦準備緊,我見貼緊兩張紅紙,寫有送往海洋,迎回百福,神台既用品用綠油葉水潔淨而新年仔即裝緊身,頭包紅巾腰縛紅布,差唔多到左十一點半就開始扒船,打鑼打鼓行頭,由2個朝首抬船,後跟其餘朝首同新年仔,每家每戶收集碳,豆,衣紙,雞毛(如有的話)等等,放入船內,再比利是新年仔,跟手燒爆仗就成了,主要用作送穢之用,隊伍會行好多家新年仔要跑來跑去(有時利是係放神台的,要入屋羅),整個儀式要差唔多個幾鐘,睇見都倦,之後會行到公園入面既社作最後儀式(本身依個公園亦仍粉巔圍之地,但時間變遷後變左公園,但儀式係會照做的),除左搶雞毛,依度亦有比較特別既儀式,先拜神再係燒穢物前有個?釘儀式,要有特定既方位之後由道士打木釘入泥固定位置,然後就開始燒之前收集番黎既東西最後再燒爆仗,日頭既儀式暫時完成
我係7點左右番到場地,已經好熱鬧,場外好多人賣野,有賣食物,有賣玩具亦有賣炮仗既檔口,池塘對開近公園位置既大空地好多人玩緊煙花同爆仗,好熱鬧
係場入面呢就要8點先開始有儀式做,首先係啟壇,由三位師父帶領,朝首係後面等,之後一輪儀式後就開始去拜井神(水係古時重要既東西,所以有依個儀式,而粉嶺圍有三個古井,用意潔淨井水)
番回場內就做緊誦關文,會讀晒所有村民既名,大約一個鐘後讀完晒就由師父用生雞做儀式,用雞血點寫晒名既捲軸同關文(一整條要一路點一路捲個捲軸),用以通靈驅邪既意思,最後會放係馬曹上面一同化左佢帶上天庭,儀式後亦有放爆仗既動作,不過依個實在大得可怕,好長好長既爆仗,耳都聾
場內儀式未有,而場外熱鬧非常,除左空地既煙花利害過維港煙花外,場內亦有人賭錢,不過最後因太嘈,卒之有警察黎左
到左差唔多十一點,就開始祭煞既布置,有一大布條,用黎迎神歸位用既,擺好晒要用既工具就係壇入面先做祭煞,有一個號角,一個剷,一支鐵叉既東西,仲有5支唔同顏色既旗,一路做儀式一路唱住歌咁,但睇流程未到唱麻歌,因之前未睇過,我都唔知佢地唱緊係咩lu,插好旗後就開始迎神歸位,所有祭品,香爐等等會經條白布番回神壇,另外唔洗幫手既村民就食緊豬雜粥,村民亦好好客,我亦唔例外食埋一份,取其意頭,睇睇時間已經係十二點幾,村民準備緊下一項儀式
貼人緣榜基本上係差唔多第一日最後既儀式,人緣榜係一大捲紅底黑字寫有全村村民名既榜文,即表示有作功得有份酬錢做洪朝既意思,一頭一尾貼有畫上龍虎圖案既紙符,由朝首貼上牆,要小心貼好唔可以斷,貼好後朝首拜神師父用生雞血啟榜,亦要由師父每個名讀一次通知天庭,所以個儀式都要做成個鐘,有d村民係貼好榜後已經好緊張咁睇下有冇自己名,而我呢係依個時候仲諗緊有咩車可以番屋企,因為已經係夜晚一點幾了,最後番份壇睇完師父念左陣經儀式已完,時間係一點半就走人,粉嶺無車要去上水搭van仔,番到家都好晏了,不過第二日仲要早起睇儀式,嗯
[24to25/02/13]
No comments:
Post a Comment