緬甸 2013-01-31to02-16 - Part.04(03Feb)

緬甸

03 Feb 2013 Sat Pattupauk>Htitain>Kyauk Su>Nanyoke>Thang kha mauk>Indian,Inle lake Sunny day.

一早起身見太陽未出，行左出門口影左幾張相，路上面既人唔算多但可能d村民煮緊早餐，所以周圍都有煙加上少少既太陽光，感覺相當寧靜，同房既四人組又有人病左了，佢地係參加3日2夜,問過之前果晚好凍，所以我之前一晚已見一個病左係咁包鼻涕，加下第2朝又見另一個又病到成塊面紅晒，睇黎外國人都真係太睇少緬甸既夜晚(眼見只有日本人同我有羽絨),食完早餐後8點先出發,行既路唔特別,可能係太遲太陽出晒黎有d大霧所以無咁靚而且2月好多農作物已收割,所以其實無咩睇,guide話十一月會好好多,但依度既泥有好多唔同顏色,而第二日既路又好多光滑石頭,幾特別,但山景真係非常一般,可能3日2夜會好好多,9點左右見到d農民羅住晒d工具行過,問guide佢地係開工定收工，原來佢地係去緊開工，我問咁幾點完，佢話4-5點，我就笑同我地香港office一樣都係朝9晚5wor,哈，仲同佢講中國既係未天光3-4點就已經落田，好早就收工番家，仲心諗怪不知佢地夏天唔耕田啦，咁晏先開始落田

行左陣就係大樹下休息，雖然d泥係紅色，但我都唔理咁多訓係度休息下，日本人好有興趣我guide對鞋，佢話好似好舒服咁，問佢係邊買，佢又要買一對wor,佢真係去旅行都去到鞋都著爛埋，我好羨慕佢地既長程旅行，德國人呢就用d樹枝整野，見佢整左個棚又整左間屋出黎，我地笑佢個棚一定要黎養豬的，哈

之後一路行一路傾下計咁,同日本人講左好多野，仲問佢印度可以點玩法，又講左我去過既地方比佢參考，之後行行下見到有人壞車，有幾個人幫手整緊，行過既車都停低幫手，端典人就影低佢地，仲話依度既人見到有人有困難都會幫手，佢話如果係端典壞車就唔會有人停低幫，佢話佢地好自私，真係唔講都唔知原來係咁，之後仲順道去左個士多,d打火機掛晒係度比人用,幾過癮,而同行既端典人係護士,佢睇到士多掛有護士畢業証書,就問士多老闆娘係邊個黎,透過guide既翻譯,原來係老闆女黎既,老闆娘仲好開心咁講佢個女叻,而且之後會由仰光番黎依度既鄉村幫手,因醫療實在落後,我地聽到就覺得佢地真係好善良同好心地,仲讚佢個女好偉大讀完書都番黎自己鄉下幫手,老闆娘個樣就非常開心同自豪

最後行左去到Indian已經係12點，見到有人擺買，原來依度岩岩係5days market，所以比較熱鬧，食野既地方又見到4人組(之前唔諗住食野所以行到大半時我就行前唔同佢地一齊)，見有時間就一齊食，又傾下計玩下筷子咁，外國人有人識有人唔識，我話我既筷子都唔正宗，日本人就非常正宗既手查法，咁佢地又學下咁，之後講到生肖，緬甸係以星期定生肖，就用我電話check番究竟係星期幾出世，原來佢地個個都只有二十幾，真年輕,食得咁上下say bye後就問guide邊度有船遊inle lake,佢就話載我既船夫可以,本來要去Nyaung Shwe搵boatdriver，但去Nyaung Shwe後再番resort又要搵船番一來一回要錢又要時間，所以問過價18k+12k Sunrise(之前網上睇過住Nyaung Shwe大約加加埋埋都要25k)就用indian個船夫好了，唔洗煩

入inle lake要US5蚊,買左ticket後又買左d類似沙翁既油炸東西就上船了,d船都好大隻,條河又窄,都真係幾考功夫,見好多人都係5人一船咁真係平好多,不過我想自己自由d玩所以就無join其他人,好彩唔係大太陽,所以都幾舒服,係途中見好多村民係河邊行過,又有好多人係河度沖涼,跟手就見一d寺廟係河邊或河中

去到Resort只係2點（Shwe Inn Tha Floating Resort USD 127包早餐，在我黎講好貴，不過黎到inle lake一定要住下floating resort），所以有好多時間，但天好多雲，好彩日落前清左少少，見到少少magic hour,算係咁啦，而我間房呢，係其中一條巷既最後一間，比想像中大，而且非常近河可以睇到好多小船經過，仲有漁民，似係入inle lake既必經之道，雖然有時嘈少少但景觀都幾唔錯

夜晚食tradional food,14.5k都還可以，雖頗辣但味道還不錯，夜晚唔太多星可能係雲厚同依度太多光，之前一日係山都唔算一天都係(柬埔寨就真係一天都係),影左陣相就入屋了，夜晚既緬甸仲要係湖入面都真係幾凍,無咩做好早就訓了

To Part.05a - Inle Lake,Nyaung Shwe

[31/01/13 to 16/02/13]
Photo Link <<<<<<<<<<<<<<<