緬甸
08 Feb 2013 Thu Mandalay,Kyaukme Sunny day
晨早三點起身執好野就出發去火車站,只係十分鐘路程,所以還ok,去到車站已比前一晚探路時多人,counter已開亦有人買票,旅遊中心已寫清楚月台比我,所以好易搵到我架火車,好在有英文同阿拉伯數字,火車亦有分ordinary同upper class,去左upper既車卡(緬甸政府規定遊客只可坐upper class),搵到自己既位置,好在都真係我先前要求既左手邊窗口位(睇鐵橋),仲係單邊位,不錯
上車後放好野換好拖鞋就影下相咁,唔係太多遊客以本地人為多,佢地一上車就捲起對腳就訓,開頭我以係係因習慣先係咁做,坐坐下先知原來因為木地板有蚤咬所以佢地收埋對腳,但因坐位好窄,我只係收到一隻,另一隻就要比蚤咬,好慘,對面係一個當地阿叔,我就比張車票佢睇係咪依架車(上車時忘記左clarify,好險),但阿叔唔識睇,就比左張飛比驗票阿叔睇,阿叔英文唔錯,問岩左係依架車就ok了,settle好晒所有野就等開車,聽到車外好嘈,原來有一大排犯人mou晒係地下等上火車,係同我地一架車既,不過唔知佢地去邊,攪好晒等多陣4點左右就開車了
本身同預期時間差唔多開車,出車時有個阿叔帶左隻狗上車,係咁吠仲唔比人坐佢旁邊,隻狗係車入面吠車外d狗又吠d雞又係咁叫,仲有賣早餐既叫聲,非常熱鬧,而且仲有好多人羅d蔬果上車,攪到架車有好多唔同味道一齊,哈,至於車入面無想像中咁黑,起碼仲有燈,車開左真係好凍,好快我就頂唔順要關窗,雖然隻窗甩甩地但都叫穩陣,行左一陣我都訓著左,到左5點幾6點就起身,見車外開始光,但仲係無咩特別,之後到左個細站,有班學生搭火車番學,一車都係小朋友聲,熱鬧,好快佢地就落車,依個時候天亦開始光哂,終於睇清楚架火車,有唔同顏色d光打埋去,都幾靚
之後,火車開下又停下咁,卒之到左彬烏倫(Pyin Oo Lwin),依個站係大站,亦會停耐少少,所以就落左車睇睇,亦行左出去見到好多馬車,睇書講依度係歐陸式建築多,睇過佢酒店平過曼德勒少少,但其他好似幾高消費又其實無咩特別,所以我skip左依個地方,買左d野食就上番火車等出發
火車去到依度因車軌大細唔同所以要人手更換,攪左一輪先再出發,亦發覺多左外國人上車,睇睇錶已經比預定時間遲左好多,所以一定delay,不過無所謂啦都一早預計到的,而且火車時速非常慢,由十幾公里至三十幾公里不等,唔太快但影相黎講就幾唔錯既速度,當太陽曬埋火車度就開始熱,開車時還可但一停車呢就會好熱,有d大少少既站就會落車睇睇,有d細站基本上一停就開車,坐我對面係一個德國遊客,係車無野做時亦係睇緊gps,同佢講左幾句最後佢仲比左個free map address我,太好了(緬甸地圖好難搵而且好簡陋,但睇佢果個幾多資料,唔錯)
車到左Gokteik viaduct station(谷特高站),可以落車影下橋(當然係只有遊客先會咁做,停左陣就趕番我地上車了),丫,d犯人係早幾個站已落車,仲有好多揹槍既軍人係度,而且仲走上車睇有無犯人走甩,唔知果個站係咩地方係咪有監獄呢,之後有兩個軍人上左車,對面既德國人同我講machine gun,原來佢地揹左支機關槍搭火車,睇落真係好重,仲因為太長,擺黎擺去都唔知放邊,地下又太長坐位間又頂住,最後有個法國遊客叫佢放係牆同椅背中間,支槍仲要係個乘客個頭旁邊,真係好古怪既經歷
火車開就開始過谷特高鐵橋了(Gokteik viaduct bridge,1901年英國人建造,當中會經一個峽谷,高318ft,全世界第二高鐵橋),因高架鐵橋非常古老,所以火車行得非常之慢,因1990年重修,所以橋比想像中新,感覺上又唔係太高,只係某一度有條河既地方就相對黎講比較感覺險要,但景色唔錯,值得我專程過黎睇依條橋
之後再用左個幾兩個鐘先到早緬(Kyaukme),睇錶已經遲左兩個幾鐘,係緬甸搭火車真係要非常多時間先得,我呢就當然ok啦,本身都無plan到依日有咩做,只係搭下火車睇下橋,早既就多d時間行下早緬,遲既亦無咩所謂,我最中意慢條斯理既旅行
係火車站有都有人擺地攤賣野食,不過相對黎講比較小型,係車站出面搵左架tuktuk叫佢車我去唯一一間接待遊客既guest house(A Yone Oo Guest House),要左28us既房(有25us既不過要share bath room,另doom要8蚊),入到房都唔錯,仲有水煲廁所亦有熱水,放低野就打電話reconfirm曼德勒同蒲甘(Bagan)既房,仲要打電話搵早緬既行山guide,但佢唔得閒(接左個3日2夜既job),所以就叫GH幫手搵guide,價錢唔貴連油錢都係25000ks,好平,同佢講左陣,guide自己都話收得平,不過又係電單車,倦死
之後行出去搵左野食就四圍行下,都幾鄉下地方但幾多中國人,而且有人講國語,local market呢就4-5點都仲有(平時果d多數係早市),感覺有d似中國既街市多過當地market,anyway,行下睇下就番GH想攪埋後日巴士ticket,但GH話仲有時間所以第日先幫我攪,坐左陣就出去影下日落食下野咁,最後係街邊食左個麵,味道還不錯,老闆仲同我講國語,依度果真多中國人,見時間尚早(6點幾就食晚飯),所以買左面包以防夜晚肚餓,之後呢就係GH hea下慢慢咁休息下真係唔錯,咁先係旅行嘛,日日都趕行程我真係會死的,嗯
To Part.10 - Kyaukme mountains & villages
[31/01/13 to 16/02/13]
Photo Link <<<<<<<<<<<<<<<<
No comments:
Post a Comment