play list

28 May 2007

三點零鐘的黃雨

今日一早起身,落街時見個天又係咁好,心諗陽光的海灘真係離我很遠,唉!

食完早餐嘆完報紙後,急急腳番屋企做功課,平時既慣例係開住電腦聽住mp3,但因部機死鬼左,唯有羅番舊時燒落d mp3係部amp度播,因我冇labelling,基本上播咩歌都唔知,經過幾次換碟後,聽到隻舊少少既hk碟,聽番好多好耐冇聽過既歌,感覺真不錯,過左陣,出面街突然落好大好大雨,歌亦岩岩播到太極既小雨落在我的胸口,嘩,真係好夾,感覺一流.

記得有次去fd屋企,睇碟後走時都已經半夜3-4點,個fd住西環,因為果度係舊區,半夜既感覺已經好好,咁岩天又落起毛毛雨,抬頭向上望,原來我剛剛好企係路燈下面,毛毛雨加埋d燈光,真係好正,係果一刻唔知點解會諗起家強既冷雨夜,哈

又有一次,成班人探險後無無聊聊去左會展附近既金紫荊廣場吹水,諗住天光後去蓮香飲早茶,老實講身為香港人果度基本上我成世都唔會去,但果晚既感覺真係一流,到依一刻我仍然好記得,話說我地成班人去到時已經3-4點,果度基本上冇咩人,我地有d吹吹水,有d就係度踱下步,我記得仲有人係度洒太極,半夜三更洒太極,哈哈,突然間落起大雨,個個只好lee番埋一齊吹水,過左陣,好多人已頂唔順,訓得七七八八,當時我就未眼訓住,坐係地下度望住出面,d雨打落下地再反彈,令到離地面2-3吋既高度有一層薄薄似霧又似莎既水氣,好靚好靚

雨有時真係好掃興,但有時又幾可愛既,哈

No comments: