play list

18 December 2011

水浪窩camp2011

水浪窩camp應該係最舒服既camp site,因為有車可以到而且都算近馬路,除左行上果條斜路比較吃力外,基本上非常方便而且地方亦算不錯

食過lunch係將軍澳買完野後3點零鐘到左營地,因比較晏左少少,所以最下一層已經冇左,要再紮上少少,不過地方大而且平地多還可以,食過tea後冇咩野做就訓番個晏覺,7點左右起身就燒野食,天氣唔算太凍但因打開左個camp入風,我個羽絨睡袋頂唔住,好彩仲有張裹屍布,應該冇咩問題,雖然有14-5度但outdoor就冇風ok一有風就凍果種,野食唔係預太多所以冇咩食剩野,仲有燒左個洋蔥,原來好甜好好食,下次可再試過,但炭呢就唔多得,都係惠康果重圓形炭好燒d

食到12點零就訓,執好野後玩左陣火花(用石頭掉落炭度),原來都幾靚下,嗯

第2朝8點幾比人嘈醒左,起身諗住用水點知水袋爆開左,要再落山羅水,發覺條斜路都真係幾斜下,食完早餐就走人,冬天早上天氣唔錯,陽光下曬下被曬下羽絨就真係一流了

<17&18/12/11>
Photo Link <<<<<<<<<<<

17 December 2011

something about Florence and the Machine - Lungs

雖知我聽歌一直都不太喜歡研究或者是聽歌詞,我喜歡只是某些對味的節奏意境或是感覺,但有次聽到一首florence and the machine的cover song.留意到唱者那種歇斯底里咬牙切齒的表現(她當然比Florence Welch誇張多了),所以就留心一下歌詞到底在攪什麼東西,原來她的歌詞非常有趣,某些是比較明顯但某些不明所以你只能自己領會,像極聽歌看戲,不一定人人的感受也一樣,她的歌詞就是黑暗暴力言之有物總之就是喜歡,試試從我的理解去嘗試說說她是什麼東西


Dog Days Are Over = 酗酒去逃避某些東西
Rabbit Heart (Raise It Up) = 吸毒者發展至年華老去,開始想究竟誰是利益者,想抗爭想脫離
I'm Not Calling You A Liar = 自我掙扎在愛上一個不應愛的人
Howl = 潛伏於男人當中的獸性
Kiss With A Fist = 充斥兩人之間不合常理的傷害但極為享受的快感
Girl with One Eye = 對情敵的仇恨及傷害
Drumming Song = 對愛慕者的爆發心情
Between Two Lungs = 快將死亡的愛情
Cosmic Love = 剛失戀的人在沉溺及起步逃離掙扎當中的心情
My Boy Builds Coffins = 一個不懂表達自己的悶蛋在默默努力他自己的藝術,極其自我中心之人
Hurricane Drunk = 發現第3者時的心情
Blinding = 家暴/愛情中的受害者差不多絕望的心情
You've Got The Love = 愛上一個不應愛上的人

p.s. 新碟還未有時間精力去留意歌詞even歌也只聽了一兩round.所以還未作出評價,哈

<14/11/11>

13 December 2011

旺角砵蘭街 - 奇華閣咖啡餅店


最後番落旺角,去左砵蘭街奇華閣咖啡餅店,佢係一間舊式茶餐廳,果度有位於樓梯下既卡位,舊式既燈等等,我幾中意條樓梯,可惜因夜晚冇開到,有機會再幫襯睇下樓上係點既先,嗯

<11/12/11>
Photo Link <<<<<<<<<<<<<

12 December 2011

民間生活館 - 「叮囑一百年- 電車故事展」


睇完飲食文化遊就番左去民間生活館睇岩岩先做既叮囑一百年- 電車故事展,展品有一大架仿電車,另有電車票,打孔機,路軌,最得意係由電車壓平既錢幣,佢用左d舊相放番落去依加既原址,之前上網都見過人咁做,個感覺幾得意

生活館其實我第1次入去,參加左咁多次function都未入過去真奇怪

<11/12/11>
Photo Link <<<<<<<<<<

灣仔 - 『惹味』遊街『Guide』 - 飲食文化遊


今次係民間生活館既『惹味』遊街『Guide』 - 飲食文化遊,首先介紹既係係文化館對開既車仔麵檔,出現係50年代,依加既檔口當然係已經冇左,再行左去比較遠既進教圍睇睇德如大牌檔,因今日係星期日所以冇開檔,開業係4-50年代,類似蘭芳圓既鐵皮式大牌檔,香港只剩番29個,80年代後已經冇再發牌,所以只會越黎越少,搵日去依度試試先

第3站係快樂餅店,位於皇后大道東,開業於70年代,好中意d古老式磚仔

第4站係船街既合源建築公司,依度係政府既2級建築物,後尾租左比人做私房菜,叫鴛鴦飯店,門口同樓梯都保持舊有既建築,可惜係好似好貴,無緣欣賞了

去到第5站係莊士頓道既和昌大押,建於1888年,去灣仔成日經過,後尾又係政府收購左,依加租左比2個食店,又係中價東西,地下有客人冇得入去睇,頂樓咁岩冇function,所以可以搭lift入去,牆身用左一隻舊船既木板建成,感覺比較古老,但除左頂同柱頭外都冇咩睇

第6站去左春園街既新景園,6-70年代開鋪,本身係交加利太原街,出名既係乾牛河,由大牌檔變身為入鋪,搬左去依加個地址,聽講野食仲保持到水準,所以都幾多人幫襯,星期日都唔洗開鋪(忘記左影相,哈)

第7站都係春園街既楊春雷涼茶鋪,專賣24味,唔講真係唔知已經有90年歷史,依加係第3代,香港依種既鋪真係唔多

再黎係前少少既金鳳茶餐廳,1954年開始做,原名金鳳冰室舊鋪係太原街,7-80年代先搬左去依加既地址,就咁睇都好多人,聽講係街坊式既招呼,所以冇咩service可言,出名係冰奶茶,不過好貴,我冇試到,導賞順手講左卡位既起緣,原來係因舊時既女士少出街食野,有個叫威靈頓既人定係威靈頓餐廳為左增加私隱就開左卡位,本身仲有布遮住後黎先得番d位,都幾有趣

再黎就出番莊士頓道同太原街交界既雙喜樓,開業係30年代結業係90年代,依加已經係kfc,果時樓下賣餅既,仲有張相睇到舊時賣粽係吊晒出黎,好得意,導賞又講左關於添茶打開蓋同手指點木台既故事,前者原來因一次意外,有個有錢人覺得隻雀太嘈,將佢掉左入茶壺度,點知伙記唔知入面有雀,加水就熱死左佢,引起打官私仲要賠錢,後黎有人就放d死雀入去想要酒樓賠錢,段以後黎就要打開個茶壺比伙記見到先添茶,哈,而手指點木台加水既故事係來自乾隆,有次下江南見倒水好得意,就要幫自己既下屬加水,下屬因唔方便叩頭,就用手指點點,後黎d人就開始咁做,有趣

前少少係龍門酒樓,開業於1949年,舊名龍鳳酒樓,後尾由其中一個老闆擁有改名做龍鳳酒樓,佢係第1間安冷氣既茶樓,結業係2009年,依個之前有印象見過.原來茶樓同酒樓係唔同既,茶樓就係飲茶,而酒樓就要羅酒牌後要黎夜晚擺酒,所以龍門茶樓改為酒樓

前少少既同一條街既敏如茶室,係比較平民化既茶樓,開業於30年代結業於80年代,係傳統既地茂式茶樓,而前少少依加大有商場位置既係英京大酒樓,睇相同保留左當時既彎型設計,開業於30年代結業於70年代,係當時最出名既酒樓,比較高尚,如果有喜宴就可能會係對面樓拉開掛起炮仗,相當熱鬧

最後係菲林明道同軒尼詩道角既新亞怪魚酒家,現即恆生銀行果個位(冇行過去影相),當然係第1間活水養魚池,所以食客可以見到d深水魚新鮮咁遊黎遊去,亦有美人魚潛水員裝飾,所以叫怪魚酒家

<11/12/11>
Photo Link <<<<<<<<<<<<<<

11 December 2011

尖東月全蝕

係尖東食完飯後走左去海旁睇月全蝕,時間係十點半但我仲未行到佢已經食左,抬頭望天只見紅紅地色既月亮(係camp都睇過紅月亮,不過果d應該係因為空氣差既折射形成),係人來人往既尖沙咀抬頭望天既人唔算多,但亦有人發現佢既存在,睇左陣就趕緊過海旁睇,始終彌敦道太多燈見到個月亮一定冇咁靚,過到海旁都有d拍友已經set好晒野係度拍緊,風未算好大但個天就非常之清,對面既海景亦不錯,係尖東都係第一次見到咁多星,北斗七星隱隱約約見到5粒,而且木星金星都非常清楚,月亮由朦變慢慢由邊走出光,親身睇係第一次,但因冇帶相機,只係雞手機影得相當之核突,但肉眼見已非常不錯,途中有架飛機飛得非常近個月亮所得出黎既效果非常之靚,當時海旁亦相當多人忍唔住發出歡呼,當月亮走番出黎時d海浪突然變得好大,原因係月光既引力,依d天文現象真有趣

<10/12/11>

08 December 2011

大東山2011(18號屋) - Day 02(04Dec)


6點左右起左身出去睇日出,風都算幾大但colour不錯,可惜係有雲係中間出唔晒成個圓形

睇完日出訓多陣9點零起身食早餐,都係食面包火腿蛋焗豆咁,但生命面包呢就因變晒形要塊塊做下massage同物理治療咁先食得,哈

見有大把時間陽光又好就出左出面玩下啤牌,因風大都玩唔到咩game所以又係潛烏龜,懲罰呢就係assign工作例如洗碗掃地揹垃圾落山等等,最後我卒之輸左要揹垃圾,本來諗住落山食左d野會輕d卒之又係差唔多重量落山,唉,之後又玩下非洲話事啤彈下手咁,其實屋既草地對出好多人行山,我地坐晒係地玩人地望落都幾悠閒下,不過一班人係溫暖既陽光下玩下飲下野咁又真係唔錯既

到左12點左右就食lunch,因有專人負責,所以單單腸仔餐肉蛋都有幾款,加上今次食夜晚冇食過既烏冬,感覺唔錯,好過次次食肉丁面啦

2點幾就走人,又係行番南山去梅窩走,行左3個鐘6點幾去梅窩食晚飯,空檔時打電話搵司機(朋友早落山已call左台知道搵到我個電話),約好左第日係大嶼山羅番個電話,唔用買過個真好,一如以往食完野又係8點船走攪到10點幾先番家,嗯


<03&04/12/11>
Photo Link <<<<<<<<<<<

07 December 2011

大東山2011(18號屋) - Day 01(03Dec)


又係一年一度既大東山之旅,今年住既係最好環境既18號屋,實在太愛依間屋個天窗了

因一早已分配晒各人買野既關係,唔用係東涌浪費時間同挨貴野,10點左右食好晒早餐就搭的士去八公拗上山了,但我唔小心留低左個電話係的士車尾箱,同台聯絡左留低電話但上山時又唔係收得好好,加上我做好心理準備會搵唔番個電話,朋友非常開心地要我投入iphone行列一齊用whatsapp,依個當然就唔係好想啦,我成日跌電話落地,iphone應該好易比我跌死而且我最憎咁死大部電話,唉,總之就煩啦

不過雖然有d唔好既事情發生左,但天氣呢就非常之好,個天好藍但冇咩雲所以就冇我第一次上山時咁靚但都非常不錯,上左一定高度過左d烏糟空氣之後仲第一次望得非常之遠,之前只係望到2-3個島但今次冇霧外仲可以望到對開4-5個島,而且烏糟空氣同藍天對比非常明顯,有趣

係小山坡休息左陣又玩左陣大字型訓草地後,雖然爭d曬死,但一大班人無無聊聊灘晒係草地上影相又真係幾好玩

上到大東已經2個鐘度,因冇霧景色非常開揚,望真d仲見到三支香同icc,嘩,望得咁遠真係嚇一跳,清成咁夜晚應該睇到星了

入到屋保養得非常不錯,但牆就比爛頭營義工團寫左一堆字叫人點做點做,幅牆冇再白雪雪真係有可惜,但廁所就非常乾淨,依間屋真係首選

因今次我羅雞蛋同麵包,壓力非常之大,好彩unpack後雞蛋冇事只係生命麵包好似經過車禍咁再冇生命之外其他還ok.食過熱狗就出發行天池,一出門口陽光非常好,影左一堆相後就開始出發,貓草生得好高,加上隻腳好番冇幾耐而且就快去旅行,所以行得極之小心,攪到行行下影影下相就甩左大隊,入左叢林入面,有d草仲高過人,加上落斜行得都幾辛苦下


到左天池清水加上藍天同金黃色既山波非常之和諧,玩左陣草龍(今次唔多見和味龍,唔知係比草龍食晒定喱埋左)影左陣相就走人睇日落了,日落一如想像有幾種色加下望到一堆島嶼,很好,係屋外坐左陣傾左陣就天黑了,氣溫比上年凍但還可以,只係有時風大左少少,但未至於要入屋避冷咁緊要,所以我地係戶外既時間仲算多

打邊爐呢就最方便,9個人買左5磅肥牛,羅出黎果時成舊磚咁真係嚇死人,都唔知食唔食得晒

因氣壓問題水唔係太易燒滾,打邊爐呢就真比d耐性,所以食食下就羅左副牌出黎玩潛鳥龜,罰呢就一定有既,第1個就係出去浸冰水10秒仲要唔比抹手一分鐘,雖然天氣唔算太凍,不過應該都係10度左右,所以玩時我地都笑得好開心,第2個game就係輸左要入廁所開窗(因岩岩有人痾完屎既關係,加上廁所窗係要係出面加入面一齊先開到,所以就有人諗左個個變態懲罰出黎),好彩唔係我輸,哈,之後既就係洗碗呀咁,都唔係我,我卒之都唔洗洗碗了,真開心


食晒野洗好碗就出去睇星,月亮走左天還算幾清,但就冇我第1次去滿天都係咁多,但上次因太凍所以睇左陣就要入屋,今次呢唔算太凍所以可以睇多陣影多陣相

因有幾個人都唔係幾舒服所以12點度就訓覺,第2日睇日出所以我都早d訓,之前次次都訓死左都未試過大東山睇日出,希望今次可以見日出啦


<03&04/12/11>
Photo Link <<<<<<<<<<<