play list

30 June 2007

Offside

~~Offside(越位女球迷) - [2006]~~

柏林影展06年得獎作品,伊朗電影有得出港版質數一定有番咁上下,故事講伊朗謝絕女球迷入場睇波,女球迷們因總總理由千方百計混入人堆中入場,但好多都失敗收場,淪為只有聽沒份看的下場,電影全以圍外旁觀者手法,輕鬆帶一點誇張地講及好多伊朗守舊不平等的思想,當中同士兵辯論及ending上街一場相當不錯,可以一看的電影

<28>

28 June 2007

The Good German

~~The Good German(柏林迷宮) - [2006]~~

很特別的cover design,很懷舊看似不錯,電影一開始已用上4-50年代的拍法,無論背景,音效,攝影以及過鏡的畫面都很舊式的手法,相當有趣,故事講上二次大戰後既德國,老實講我睇完成套戲都唔知點解依套野叫the good german.成套戲入面個個都有自己目的互相欺騙隱瞞,GeorgeClooney遊走於三國之間但處之泰然膽色非凡只為一個女子,故事好似好豐富但睇落又冇講到咩,可能導演太注重連貫舊式拍法而忽略左故事本身的敘事,睇完好似冇睇過咁 @@

<26/06/07:夜>

27 June 2007

Dejavu

~~Dejavu(時凶感應) - [2006]~~

娛樂性不錯的電影,Danzel Washington一出場已很有台型,老實講我未睇依套戲前唔知咩叫Dejavu,聽人講過但並未深究,開頭以為係一般第六感應之類既戲,原來並非如此,Danzel做番一貫幹探聰明果段,身型亦keep得很好說服力不錯,相反韋基馬肥腫難分慘不忍睹,演技亦係一貫的渣,故事一開始已緊張非常,爆炸,抽絲剥繭,danzel單人匹馬續層調查,之後慢慢演變為十分high-tec的調查,再睇睇下原來係時間空間之類的東西,ending有點兒怪怪的但女角幾靚算係補番少少數啦~哈

<24/06/07:夜>

25 June 2007

The Fountain

~~The Fountain(超時空.愛) - [2006]~~

聽人講幾好睇,所以明知愛情片都暫且一試,整套戲分為三段,橫跨幾千年的愛情故事,講女主角快將死去,男主角對愛情的執著,當中有幾段次序係重複發生,但尚算清晰,古代男角為與女角永生不死,不顧一切的找生命之樹,落得化為大地的下場,現代男角忽視垂死妻子拚命研究解藥及對於失去的介指過於執著,痛苦不已,ending未來男角經過多番回憶思索,領悟出妻子死前的一番話,垂死星星到達冥界得到重生

整套戲故事簡單,但左穿右插,華麗燦爛場面看得令人眼花,而且太過於著墨於三個故事上,沒太多男女主角感情的交代(加上女主角不太靚=P),很難令人投入當中至死不喻的愛情觀,我不太欣賞

<24/06/07:夜>

24 June 2007

上學路上

~~A Unique Schooling(上學路上) - [2005]~~

幸福是必然嗎?好老土的開場白,哈哈,但上學路上依個故事正正表達左幸福唔係必然的,如果幸福唔係必然,咁又可以點做呢?故事中主角王燕選擇努力爭取,電影改編自法國相當出名的馬燕日記,故事中小燕為左下學期的學雜費,為左免去做小媳婦,整個假期東奔西跑,賣蛋賣筆賣羊只為賺取10蚊的車費去採拘杞,整天跑呀跑為著目標前進,係一片風沙的荒蕪黃土中努力不懈一分一毫的賺錢,雖然中間有著很多很多不如意,但辛苦過後總算成功,電影中除小燕爭紮求存外,其他的村民亦不見得如意,但全都正面積極面對,以努力賺取成果,少見憂慮抱怨的表情,效果來得相當討好,24.8對於我地黎講不值一哂,但對小燕意義相當重大,幸福是必然嗎?

<23/06/07:夜>

23 June 2007

Children Of Men

~~Children Of Men(末代浩劫) - [2006]~~

真想唔到依套Oscar多項提名,影評一致讚好既電影係香港會落入Direct To DVD既下場,可能係主角係香港冇咩叫座力,真可惜.

故事一開始報導全球最後生既人去世,對於我地依家報導全球最老既有著相當明顯既衝突,看似荒謬但其實一切都有可能,由依點開始,故事亦走向原本的設定,人類絕種所帶出的種種社會現象,電影中放左好多反諷既場面,例如政府會發放自殺藥比市民但大麻仍然違法,聰明既專家圍埋開會研究絕種既解決方案,但首個baby竟然係難民政策下的難民所生,象徵未來既救生運輸工具tomorrow,竟然唔係太空船,而係你我大家都見過既一隻普通不過既船,導演為左增加真實感及觀眾既投入感,未來很貼近現實,無論係時間既設定及場景,同依家沒大分別,拍攝手法亦放左好多手搖鏡及幾個1shot直落鏡頭,一方面看得令人頭暈眼花但另一方面亦增加左代入感,末世可能很遠亦可能好近,究竟到時我地要如何面對?如何適應呢?好多野未來可能消失,對於現在所擁有既,我地是否要加把勁去珍惜及愛護呢?影片故事簡單但有著好多好多open questions.看時有點沉悶但過後諗番,發覺背後有太多空間去自由發揮,不錯

<22/06/07:夜>

21 June 2007

星級大改造

~~Star Reformer(星級大改造) - [2006]~~

有時幾中意睇一d類似依種輕輕鬆鬆的電影,加上織田裕二同柴崎幸我都幾中意,所以揀左黎睇,故事講目中無人高高在上的織田裕二被派到一所平民超市度學習聽取市民心聲,撞正實事求事的柴崎幸做佢上司,當中所引發出的一連串衝突,全片織田裕二由頭帶到尾角色及外型說服力不錯反而柴崎幸表現相當普通,故事冇想像中咁戲劇化,但不過不失

<20/06/07:夜>

20 June 2007

再遇SUZUKI

0下!!!唔認得?!?
哈哈,很騎呢的廣告
每次睇番都覺好好笑

18 June 2007

From Dusk Till Dawn

~~From Dusk Till Dawn(殺出個黎明) - [1996]~~

見Grind House 就黎係香港做,係時候羅番隻from dusk till dawn出黎重溫一下先了,套戲不知不覺已經過左十年,之後隻vcd斷左市,想搵都搵唔到,期間亦冇係任何地方重睇過,前排無意中係葵芳見到,即買,正如平時一樣,買左好多時只會放係度擺,好少的起心水去睇,但近日見個projector好耐冇開過,加上一套Grind House既原因,今晚即羅出黎睇睇,雖然話只係十年前睇過一次,但當中個別的場面仍然非常深刻,例如一開場george clooney同tarantino係士多度大開殺介,tarantino用穿左籠既手黎望george clooney,依個動作仍然好記得,著晒火既無上妝酒吧,非常靚及身材好既吸血彊屍salma hayek,一一係十年後我仲好記得~哈,講番套片,可以用極端變異,面目全非黎形容,前後兩part分別非常大,但對白及手法依然有趣非常,令人懷念非常的一套很濃很濃tarantino作品

<17/06/07:夜>
Photo Link

17 June 2007

好耐冇遇過.......

真係都好耐冇撞過d神怪事了,前個禮拜又再一次比我遇到,
對上一次應該係幾個月前係公司遇到,遲下再寫,講番今次既事件經過

分享番少少經驗,其實有時遇到係突然而來,全冇徵兆,過左諗番唔對路先知,

另有d係會有怪怪感覺,跟手就會遇到了,而今次係後者

話說有晚食完飯行緊番屋企,時間不太早亦不太晏,應該係點零鐘咁上下

我行到差不多到屋企附近,一轉彎,已覺唔多自在
轉彎後係一條大直路,因果度唔係主要既大街,夜晚時間係會比較靜,
今次亦都唔例外,轉彎後又係得我一個行,行到4份一咁上下,
經過一個樓梯口,聽到有把女聲係度講野,但講咩係聽唔到既,
聽唔到既原因唔係唔清楚又或者係聽唔明佢既語言,
而係任你點留心,你都唔會知佢講乜,只分到係女人加埋係度講野,
依d情況就係人地所講既鬼食泥,因我之前已遇過,
所以冇乜點理就繼續行,之後就聽唔到佢講野lu

雖然今次經歷比較短,亦冇咩特別,但記得既就寫住先啦

稍後會寫番多少少自己既經歷,keep record又好點都好
襯我仲有印象,寫番多d先 =P

11 June 2007

Au Hasard Balthazar

~~Au Hasard Balthazar(巴爾塔扎爾的遭遇) - [1966]~~

影片一開始已用單調沉鬱的鋼琴調子道出了Balthazar所行的前路,中間配上刺耳的小提琴聲,似乎象徵驢子將要面對痛苦的一生,影片很快很快已將小驢無憂無慮的孩兒時期帶過,急轉直下Balthazar已換過很多很多的主人,由抗爭到低頭鏡頭下的腳步越見沉重,當中和兒時主人數度重逢,但每每只是置於一旁的旁觀者,驢子每每被欺凌虐待利用及忽略,雖當中曾以智者身份出現,但仍目空一切及以純樸之心到達終結,ending以綿羊及首尾呼應的鈴聲結尾,看後令人感到一種平靜但實在的震撼力.影片包含太多太多的象徵意味,當中的審判反思贖罪比比皆是,發覺當時的手法快速而隱含的道理頗深,很難捉準當中的節奏,看時頗感吃力

<10/06/07:夜>

10 June 2007

大澳

第一次真真正正用dslr影日景,好多相over了,白白浪費了一個藍天白雲的大澳,但很清很清日落已足夠補番數了 =)

發覺影落好多好多相,但未有時間upload,依家先up到上年年底既相,哈哈,努力呀

<31/12/06:日>
Photo Link <<<<===========

07 June 2007

常常拜訪的blog

其實除左自已hold既一兩個blog外,好少好少會習慣性地上去其他人既blog度睇野,even我落左RSS既blog都係會幾日甚至個幾禮拜先上一次

但幾個月前係photo版見到mandy影既一張相,驚為天人,雖然依家搵唔番,但好記得張相係一張closeup一個大叔既半身相,佢佔左成張相既大半空間,背景係已經封左既石峽尾村,而依位阿叔眼神及氣勢相當凌厲,當時已覺得如果係男人又或者唔係靚女操刀,影完張相後一定會比人打死,哈哈

由依個時候開始,我斷斷續續上去佢個blog睇佢寫既野同所影既相,發覺佢好中意影snap shot,而且好多時角度及創意都認真不錯,snap shot最緊要既觸覺及感覺佢好多時都可以做到,相信不止我一人覺得佢好有天份

知道佢最近係黃埔開左個
個人影展,雖然我仲未有時間去睇,但因為咁令我再一次慣常地去睇佢個blog

係度貼一兩張佢最近post既相,希望將來既我都有咁既觸覺就好了

p.s.相來自Mandy Starz

今晚早d訓

依排忙到飛起,加上電話又壞壞地(題外話,前幾日發覺部電話只係供左3期但已壞左2個幾月,由本來只用得handfree聽電話到個handfree得番一隻耳仔到依家d電話唔係個個接到,哈哈),基於以上兩個原因,令我last sat已失蹤左一次,今次佢地約打邊爐,點都要死出去見下面,如果唔係一定會以為我死鬼左 =P

去到旺角已八點幾,打邊爐既地點幾偏僻下,切仲帶我穿過黑蚊蚊既冷行過去,真係行行下都唔知去左邊,但入到間鋪,有種似曾相識既感覺,諗諗下原來我黎過,間野既豬骨湯底不錯,經過個幾兩個鐘既食食食同係咁吹水,卒之食到個個飽死當場

見時間尚早,去左附近既Y house飲野,上到去得番一個大肚婆同條0靚仔,d枱又好似有d唔同左,又唔見左條褲就甩就甩既妹妹,以為轉左老細,點知又唔係,吹下水,玩下有2隻梅花Q既啤牌,再玩下爛溶溶既Uno,又過個幾兩個鐘,落到街,諾仔講原來12點幾,我地覺得都算早了,雪榚無lala爆句"好,今晚早d訓"哈哈,我問佢"半夜12點幾先講今晚早d訓,係咪過份左少少呢?發神經你今朝講就差唔多" 我地研究過佢應該講遲左十幾廿個鐘,哈哈

經依句說話,令我思考過如果12點幾旺角走一番到屋企即刻沖涼上床訓,真係會早過平時喎,原來"今晚早d訓"依句野係work的,當然最後我都係睇埋洗冤錄上左陣網先訓啦,又係三點幾lu ~_~

<05/06/07:夜>

04 June 2007

我們倆

~~You and me(我們倆) - [2005]~~

一年四季簡簡單單的一兩個場景一兩個人,卻帶出令人深刻的故事,真摰感人但並非刻意營造,一切一切有著這般自然的感覺,租屋小女孩一踏入老婆婆的四合院已跑過不停,此舉亦令婆婆一向孤獨平靜的生活有著大大的改變,戲中婆婆雖然口硬每每講錢,但第一場租屋定價單單數句已知她內心並不如外表,但春去冬來,婆婆口中的小女孩亦慢慢改變,雖然心裡有著關心但處理手法不同,老婆婆責罵太狠心而心痛那一句真的幾到,ending有點兒無奈,但時間始終不會停留,片中所居住的四合院及兩代間的關係正慢慢遠去,屋仍是屋兩代仍是兩代,但當中的靈魂會否一一失去?

<03/06/07:夜>

03 June 2007

尼斯湖水怪

見近日謎咁hit,我又開過label寫一寫mystery既野,自問對神秘既事,都係選擇性地有興趣,UFO,超自然與鬼神,我比較中意後者,可以稍後分享下自己既經歷#注1及睇法
至於謎,只睇過一兩集,當中既謎女郎及貽興王相當on9但亦係cult,佢地出場比起所謂既謎精彩好多倍,謎女郎野人造型真係笑鬼死

講開mystery thing,近日尼斯湖又發現水怪,但個人不大感興趣#注2,看來又係另一個騙局,但反而對前一排威爾遜醫生死前表白更感興趣,原來咁經典既水怪圖片,又係自己做出黎,又話張相比過好多美國郭門及機構check過既,又係假的,吹脤
「 經 典 」 騙 局 : 玩 具 潛 艇 扮 水 怪

尼 斯 湖 水 怪 的 「 真 面 目 」 , 最 先 於 1934 年 拍 下 的 一 張 照 片 出 現 過 , 牠 把 小 頭 、 長 頸 探 出 水 面 , 這 張 「 經 典 」 照 片 被 認 為 是 尼 斯 湖 水 怪 存 在 的 最 有 力 證 明 , 但 後 來 證 實 只 是 一 個 大 騙 局 。 騙 局 要 從 1933 年 說 起 。 當 時 《 每 日 郵 報 》 找 來 韋 瑟 雷 爾 ( Marmaduke Wetherell ) , 要 他 尋 找 尼 斯 湖 水 怪 , 他 遍 尋 不 獲 , 於 是 在 湖 邊 自 製 腳 印 , 訛 稱 是 尼 斯 湖 水 怪 足 印 , 後 被 揭 穿 是 假 造 , 他 名 譽 掃 地 。
「 那 就 給 他 們 吧 ! 」
韋 瑟 雷 爾 的 繼 子 斯 珀 林 ( Chris Spurling ) , 於 是 找 來 英 國 名 氣 醫 生 威 爾 遜 ( Robert Wilson ) 合 力 炮 製 這 張 照 片 , 並 通 過 威 爾 遜 之 手 , 將 照 片 公 開 , 重 新 掀 起 尼 斯 湖 水 怪 熱 潮 , 算 是 為 繼 父 挽 回 面 子 。 韋 瑟 雷 爾 當 時 笑 稱 : 「 他 們 想 要 妖 怪 , 那 就 給 他 們 吧 ! 」 1994 年 , 90 歲 的 斯 珀 林 彌 留 之 際 , 才 道 出 照 片 中 的 尼 斯 湖 水 怪 , 只 是 裝 上 海 蛇 頭 的 玩 具 潛 水 艇 , 這 個 騙 局 轟 動 全 球 。 探 險 家 和 科 學 家 也 曾 組 隊 大 規 模 搜 索 水 怪 , 大 大 小 小 潛 艇 和 光 纖 水 聽 器 出 動 , 有 時 會 探 測 到 湖 底 下 出 現 巨 大 生 物 , 但 始 終 未 能 證 實 是 尼 斯 湖 水 怪 。 英 國 廣 播 公 司 2003 年 用 了 600 個 水 底 音 波 探 測 器 , 結 果 一 無 所 獲 , 並 宣 稱 尼 斯 湖 水 怪 並 不 存 在 。

注1:可能好多人都聽過了,但之前寫低既好多都冇晒了,寫係blog度keep番住又幾好既
注2:話就話冇興趣,但我都click過入去尼斯湖24小時online既link架,係咁睇住個湖果時真係幾無聊

02 June 2007

柔軟的貓毛

Tiger應該係我摸貓以來擁有最柔軟的貓毛,好似落左柔順劑一樣~哈
咁耐冇見依舊的怕羞^^

聽講,夏天既貓好中意擺出依個pose,果真係喎,睇見佢真係嘆咯


而下面依隻係花花,毛色特別,依家應該好大隻lu


再黎係一家大細(影漏左貓媽媽 @_@)

老豆阿包,佢細細個已經話想探佢,但一日拖一日,第一次見面時佢已做左人地老豆了,真係有少少過份,哈哈

再黎係卒卒,佢黑蚊蚊好難對焦

之後係分唔到既其他小貓(聽講依家一d都唔少了)
我姑且叫佢兩點眉

一點眉(剛剛遮左睇唔到 =P)

無眉


再黎係大寶(影相後第二日過身了T_T)

同埋(希望無記錯佢個名啦)


之後果d係街識既

依隻係串到爆既士多貓阿寶,聽人講四蹄踏雪加上白鼻哥係好叻既貓,事頭婆講佢之前既主人移民去左新加坡,留左佢係香港,之後因為掛住佢想接佢過去一齊住,點知佢居然望都唔望前主人,幾有性格呀


而依隻係藥房貓,我唔知佢叫咩名,睇張相好似好惡咁,但其實好乖,任摸唔嬲


最後不得不提涼茶鋪阿寶,雖然佢唔係貓,但深得我歡心,好乖好乖的金毛犬