play list

31 May 2011

長白山 2010-07-31to08-07 - Part.05(04Aug)


因南坡既路已經被雨水沖爛晒,為左安全同順利既關係,我地取消左原定由松江河鎮>長白>沿鴨綠江到白山>輝南既路程,雖然過唔到去睇中朝碑界同埋上埋南坡,但無辦法啦,加上已經睇過好天既天池,已經算係咁了,聽領隊講前一隊早我地兩日出發因天雨關係去左南坡先點知困山泥被困兩日之後出番北坡,5日只係去左1度地方就番長春了,真慘情

所以我地一早起身就出發番回二道白河同敦化市,去番回北坡附近行全新行程,當中原本比水沖爛左既路已經整番好,所以由二道白河去敦化唔洗再兜路,當中經過d比水沖過既村落,真係咩都爛晒,油站燈柱所有既大樹屋等等沖霖晒,每處既河水亦有9成滿,相信一落雨就會滿潟,怪不知溫總都到左東北啦


講番行程,我地首先用上兩個鐘去到某看台睇長白山火山口,再去用多成個鐘先去到第2站峽谷浮石林,起初以為又係森林,但行落其實係同之前唔同的,但因佢既路用木頭整,有d凹凸不平,所以頂唔順食左粒消炎藥同止痛藥,但藥力未發作前行落都幾痛架,講番入面既景色,有怪岩石有河同埋有好多橋,格局幾有趣而且又行過火山岩等等,有趣仲見到獵人屋,捕獸陷阱同埋知道火山既河床同平時有d唔同,有趣

之後再去左長白山虎林園,其實入面得4隻老虎,不過因係另外題材,而且仲係純正東北虎,所以就都幾想睇,未去去時導遊講左少少關於長白山既猛獸,雖然依家既野生獸不多,但講到原來威猛既東北虎係長白山採人參既村民黎講,只係排第3,第1位原來係香港都常見既野豬,因佢係癲既,見人就係咁撞即使爬上樹佢都會一直撞,做到唔係佢死就係係跌落樹死,所以採人參既人最怕見到佢地(我地行山都好怕見到野豬,因為佢真係乜都撞,驚又撞,餓又撞,嬲又撞,如果冇高既地方避避真係幾得人驚),第2位就係熊,因為愛玩,所以長白山既人係唔會拍人膊頭,因熊係會拍人膊頭咁話,你一轉身就比佢條?(有勾的)拉走塊面皮,恐怖,但原來可以轉身反方向走就可以,因為熊轉身困難(唔知揀左定右,哈),所以有時間比你走,相反扮死就分分鐘比佢拍死或坐死,哈,而老虎列入第3,因為佢唔會主動襲擊人,加上佢地當虎係天神,所以傳統係每個採人參既人都會載帽,遇到虎時掉帽虎第一個接觸既帽既主人就要留低比虎食,傳統係傳統咁聽,但相信長白既野獸已經不多了,加上受保護,所以應該只係故事咁聽好了


入到虎園發覺原來唔止有東北虎,而且見到梅花鹿黑熊小野豬等等,而東北虎雖然唔多願郁,但毛色亮麗,比泰國或其他動物園見到果d靚得多,而且黑熊亦好有趣無咩臭味,感覺依個虎園管理得不錯

番回敦化已經5點多,依日係坐最多車既一日,差不多8個鐘,其實都幾倦下,加上天雨既關係(雖然落車既地方全部冇雨)但人總是懶懶的

食過飯後行左陣supermarket,夜晚敦化市都幾靚,影左少少相就番酒店訓

p.s.用左支領隊幫我買既雲南白藥噴霧,可能因紗布,加凍水浸腳加long起腳同埋食左一次消炎藥後,情況已經好左好多,只要唔跑就冇咩事了

Photo Link <<<<<<<<<<<<<<

30 May 2011

長白山 2010-07-31to08-07 - Part.04(03Aug)



8點出發去到西坡景區已經9點零鐘,再轉搭環保車多半個鐘度就去到第一個景點錦江大峽谷,其實依個大峽谷,都係d樹呀咁同之前既地下森林差不多但就比較細,而且多左d火山岩石,奇形怪狀同張家界d石有d相似,但我就係依度既高台落級時一野叉左地面既木棧道既爛位度,拗柴了 >_< 而且下晝仲要行成千級上西坡,唉

因成日整親腳既關係,知道岩岩整親其實只會係有少少痛,所以就唔多理佢去食lunch了,依度係buffet,雖然簡陋但其實食物尚可,加上我地11點幾就食避開晒d人流,所以感覺冇導遊講到差丫

食過飯後就開始上西坡了,雖然全樓梯而且我極憎行樓梯,但發覺冇想像中咁差,可能因早段幾級就一平地加上級寬差不多,所以唔覺太難行,共一千二百三十六級,就算我跛跛地,都只係用左半個鐘左右就上到頂了

但因天氣唔太好既關係,冇太陽亦當然冇藍天,只有灰灰既天加上好多雲,但因開揚既關係,幾實幾好view的,而且因唔太清楚地型,見人行過左條線我就行埋上去右手面既山坡度,後尾先知原來果度已經係北韓,落山後聽領隊講平時有軍人註守,但我到上到去唔知去左邊(後尾諗唔知係咪因大雨水災關係去晒救災),好彩冇事者 @@

落山後因視野開揚,見到好遠既火山口,但就好多黑雲,大雨黎緊了

快快手去左梯子河,因未係季節,所以花唔多亦唔覺一般,但梯子河既流水就好大,流得好快聲響都幾大,影過幾張相後因對花興趣一般,反而走左去路邊睇下條路睇下d雲同山比較有興趣,好有山雨欲來之感,有氣勢呀

六點左右去到松江河鎮,但因整路既關係,我地搵左好耐都入唔到酒店,後尾要佢地搵人帶我地先由後門入,間酒店比人前後都堆左泥,領隊話佢地可以得罪左人,哈

後尾因好多男丁去左救災,所以冇晒bell boy,所以我地自己羅行李,其實我都幾中意,錢問題唔大反而係要準備散紙同埋等行李先煩

松江河鎮係一個幾繁榮既鎮,我地入去時都好熱鬧,所以部份團友自己出左去食dinner,但其實依日既晚餐不錯,感覺幾好而且有個冰鎮情人果甜甜地,幾有趣

之後出左去行,但行左陣就覺幾痛,就去藥房買左紗布包腳,但因市中頗熱鬧既關係,我地都行多左陣先番酒店

沖涼過後浸過凍水發覺隻腳都腫得頗利害,所以要long起隻腳訓,其實最怕係腫晒著唔到鞋,係就麻煩了,拖鞋受唔到力,行唔到就幣了,希望第日消腫就好了

Photo Link <<<<<<<<<<

29 May 2011

長白山 2010-07-31to08-07 - Part.03(02Aug)



因係附近既關係,好快到左長白山北坡既入口,首先去左聚龍泉,因之前落大雨,所以果兩條瀑布好壯觀,領隊話之前只係兩條小水柱,粗俗d講,佢話好似痾尿咁弱喎,哈

發覺內地人真係乜都得,不停咁用泉水洗面又用溫泉水洗腳,仲有人用樽羅走,人地封晒都要走入條河度,仲要趕極都唔走,真係千其百怪

之後因有人要浸溫泉,咁熱仲浸真係咪攪我,所以我地又好無聊地周圍睇下,而我就梗係訓番陣啦,當中仲食左所謂既溫泉蛋,十蚊四隻都幾貴,不過佢地真係唔識整,溫泉蛋浸到過晒時,真係黃都熟埋,渣

之後去左有小天池之稱既銀環湖,整體望就一般但d倒影幾靚

到左食飯時間,因突然停水停電既關係,我地只好坐近門口食,真係幾黑而且去廁所真係咩都睇唔到,不過我都慣了,哈

飯後開始上天池,因坐四驅而且山路多彎既關係,仲要加埋強勁既音樂加響晒馱,真刺激

上緊時好大霧,以為睇唔到(因聽講天池天氣變化好勁,山下好天上到去會落雨or鳥雲處處,正因為咁我地揀依個團,有得上天池3次,由北,西及南坡睇,咁都睇唔到無法了),點知上到去就好好天,而且仲藍天添,領隊再一次話我地好彩,佢只見過2次好天睇到天池,嗯,佢咁講我地咁聽啦


天池北坡其實幾細,而且圍住晒以免d人飛落去,死硬,但d韓國人唔知係咪見到天池好開心,佢地好勇咁行晒出去,仲要企得好邊咁影相,我見有個爭一步就跌落去,仲要影團體相拉下推下咁,仲佢地望都唔望.危

因我地好多時間既關係,影左成個鐘先走,走時又開始大霧,點知落到集合地又勁好天,加上d木屋又好特別,整個感覺好大好開揚,氣氛一流,就咁望真係好似外國既地方

落山後都有少少耳鳴,因天池都有成二千五百幾米,所以落到山都幾係野

最後一站係地下森林,好大,行晒要2個鐘,岩岩下午3點幾至4點零既關係,太陽冇咁猛,日光打落d樹或葉度,好靚,當中經過一條河,流水好勁,而周圍既樹亦好raw好大棵,去到最後既原始森林,遠景壯大,感覺不錯

之後就離開景區,見周圍都係藍莓,先發覺原來當地都盛產藍莓,5蚊一個小杯,幾甜,聽佢地講香港果d係酸既依度就好食好多,嗯

之後食過晚飯番回酒店又走左出去行,夜市還算熱鬧,食左幾支串燒(10蚊5串,價錢還可不過攪左好耐),幾好食

p.s.四驅原來都幾貴,成80幾蚊一個人,不過值既我覺得,總之第一日就見到天池,仲要藍天就開

Photo Link <<<<<<<<<<<<<

HON9 KON9 ART(UN)FAIR & Filme Happy Shooting- Kodachrome Photo Exhibition & 中上環



熱死人既星期六下晝,去左太平山街既展覽,HON9 KON9 ART(UN)FAIR一個地灘既東西,運作模式係以物易物,但我冇帶野去換,嗯

另就係Kodachrome菲林展,d相不錯,但就比較少,地方亦比較窄,但有小禮物羅走,哈

中上環


因時間尚早關係,加上差不多黃昏,又有相機係手,所以係中上環周圍影下相,印象中附近有條街好多拜神既祭品賣,但行左幾條街都冇,就亂咁行亂咁影算了,有d地方又比幾年前唔到左,香港真係.......


有時轉黑白比彩色更好

<28/05/11>
Photo Link <<<<<<<<<<

28 May 2011

長白山 2010-07-31to08-07 - Part.02(01Aug)



食過早餐後第一站到達松花江,因早幾日大雨既關係,有幾千桶有毒化學廢料沖左落松花江,之前係香港時已經知道,攪到成條河都出晒煙,我地去到時就已經係尾聲,雖然一街消防車,但河面已經再見唔到有膠桶亦尚算乾淨,只係因大雨既關係,水比較黃泥色而且水位好高,導遊話本來有隻船係度,但我地只見浸剩幾支杆,真係唔講都唔知本來係隻船

之後再搭車去左敦化食lunch,還可啦,不算太辣但油呢,對我黎講仲可接受既

丫敦化既火車站幾有趣,外觀好有童話感覺,哈

之後去左今日既第一站,正覺寺,因岩岩布工程既關係,好似去左地盆咁,但其實佢入面既神像好靚,而且又係比較恐怖果類既造型,我最中意睇既,哈,但因專重既問題,無影到相只可用肉眼欣賞only
p.s.入面有一觀音像,我一望就覺佢似汪阿姐,唔知係咪依下心存不敬既關係,我幾日後就整到腳了,嗚

之後因天雨既關係,由敦化到二道白河有段已經沖爛左,我地要兜路經延吉再去,路程多左兩個零鐘

延吉由於係朝鮮(即北韓)自冶州,所以除路牌外,其他鋪頭都係中韓字眼,幾有趣

最後黃昏時候去到二道白河,睇左一個鹿場,食過晚飯就番酒店了,之後出左去行一陣買左幾個好貴(成7-8蚊一個)既梨,之後就訓準備第二朝上北坡睇天池了

p.s.領隊千叮萬囑我地要check清楚酒店既用品,因為d員工唔多老實,唔想我地比人屈錢同浪費第二朝既時間,嗯,原來長白山入面既酒店係咁的


<31/7to08/07/10>
Photo Link <<<<<<<<<<<

27 May 2011

長白山 2010-07-31to08-07 - Part.01(31Jul)



整個長白山之旅共8日,但其實第一日搭下午5點幾機last一日就搭朝早11點機,所以頭尾其實只有6日咋

第一日三點幾到機場,因我一直都冇執行李,只在當中早起少少12點零先開始執行李,但要因之前填稅表填漏野既關係,比阿媽捉住攪掂晒(等14日而我又去8日旅行所以攪好先走穩陣)先走得,卒之飯都冇得食,沖沖執好行李,著過拖鞋(整日都搭機所以拖鞋最好)就行人了

去到機場攪好晒d野,就過T2食茶餐,老實T2多野食好多,所以有時間既去果度食最好,可憎我張CARD留左係公司,所以食唔到員工優惠,哈

之後去左gate八十幾(如果冇記錯既話),因搭南方航空既關係,多數唔係搭無人列車就係巴士了,今次個地方係去無人列車果度再行多幾步,印象中未去過,等左陣就搭車上機了

去到廣州白雲機場已經7點幾,沖沖過關後就再上番原本架機,印象中白雲機場比較殘舊但今次去發覺原來幾靚,唔知係咪整過定點,感覺比多年前靚左好多,雖然都係無咩開燈黑鬼蚊蚊,不過過關有趣,首先有個label同另張ticket係出機時派比我地,我地貼好個圓圓label後就行去過關,但唔知點解個關唔知去左邊,直行直過最後先搵到,之後過左關就去到另一處有個空紅check ticket(感覺有點簡陋)過埋x-ray就要趕上機,真係去廁所都冇咩時間
去到長春已經係凌晨12點,出去上左旅遊巴要再搭多成個鐘先去到吉林既吉林皇家花園酒店,去到已經差不多2點,不過間酒店其實幾靚,大堂向上望亦有型非常,不錯,而且我又自己一間房了,哈哈哈

p.s.現代既領隊阿wil話我地非常好彩,因為次次由廣州出發去長春班機都會delay,輕則個零鐘,重則幾個鐘,佢話試過攪到朝早7點幾先去到酒店,攪得黎都要開始出發了,聽落都真係慘情


<31/7to08/07/10>
Photo Link <<<<<<<<<<<<<<<

25 May 2011

Umberto D.

~~Umberto D.(風燭淚) - [1952]~~

講述一個自重有傲氣有自尊為人井井有條為社會付出一生但最後落得無處容身的老人家的故事,不如意不願意但周遭總是為世所迫的事情,沒錢欠債每件事也總要向現實低頭,鏡頭總是顯出老人流離失所掙扎求存但落得失望收場,沒太催淚但總是簡單中見無奈,小狗和老人演技尤為出色,尾段的章節及互動也拍得相當好看,此片很多時有老人及年青人相互出場,更突顯出老人在社會上如同流浪狗如同螻蟻般受人厭棄,值得一看的電影

<25/05/11>

24 May 2011

Varjoja paratiisissa

~~Varjoja paratiisissa(Shadows in Paradise,天堂孤影) - [1986]~~

草根階層生活態度之掙扎及愛情故事,喜歡不時出現充滿典雅及浪漫意識的配樂,在勞動階層營營役役被壓迫被岐視時加上充斥淒冷抑鬱疏離的鏡頭中得出有趣的感覺及對比,除感覺外片中的簡短生硬目無表情的對白也很有味道,喜歡此片的感覺,很不錯的電影

p.s.此乃郭利斯馬基勞動階層三部曲的第一部

<24/05/11>

22 May 2011

Leave Me

~~Leave Me - [2009]~~

5分13秒的短片,簡單小巧而動人

<22/05/11>

Leave Me from Ryan Dunlap on Vimeo.

貝澳camp2010


因要番工既關係,下晝2點幾先入到貝澳,加上暑假既原因,所有營地已經爆晒,好彩仲可以比我地係草地扎營,仲個campsite就真係成個難民營咁款,好多好多camp,第一次見咁精彩

起好晒營換好晒衫就出去掘蜆,人就真係好多,而且一家大細帶晒登仔咁去掘,好開心,但唔知係水脹左,時候唔岩定係太多人掘蜆既關係,蜆比之前少亦細隻得多,但人人都好開心咁掘,其實多唔多收獲都冇咩所謂既,有趣在d人掘到個地成個地盤咁,一個個洞冇忽靚,有趣

之後因未食lunch而且收獲不多,所以掘左個零鐘後已經番回營地煮野食,本來想沖沖身先食野,但人太多,所以咸住咁食左個late lunch之後又冇所事事咁休息左陣,等到9點幾齊人先開始bbq,今次比較豐富,有乳鴿食,還不錯,哈

第朝因太陽曬入營既關係,太熱訓唔到覺所以就起身,本身附近d人(好似有個教會攪function,聽講有百幾人)可能唔係去開camp,所以好早好早已經起晒身,係度嘈住晒,不過我咩都訓得著既關係先唔多理佢地,唔好話我對教徒有偏見,佢地有時真係比其他一般人更自我中心唔多理人,後來走時垃圾周圍都係睇見都唔順眼,仲掛教徒之名真係不知所謂.

太陽曬得利害,風亦比平時少,真係好熱好熱,連我一個成日周圍走唔多怕太陽既人都比佢曬到怕,第1次要搵地方避開佢,太陽大到連蜆都唔掘,執好晒野就走人了,不過第1次見到太陽既曜光(HALO),好似彩虹咁,有趣

本身要去大浪西support下d示威人仕,但因攪晏左又加上太陽太勁曬到個人好睏既關係,所以最後都冇入西貢,但個心係絕對支持的,希望大浪西keep到啦,如果唔係個個有樣學樣,整個西貢又比有錢人玩晒了

<24to25/07/10>
Photo Link <<<<<<<<<<

浪茄Camp2010


好好天既71回歸日,去到壩時已經好靚,行入浪茄時CAMP既人唔多,而且CAMP SITE整大左,果時只可3-4個營加下我相信7-8都可以,第時可以多D入去CAMP唔洗怕冇位了

食過LUNCH後就出去游水了,水仍然係好清雖然係公假但遊艇總比之前既SUNDAY少,都叫做有D位遊下,之後四點左右有人要走所以得番我一個係沙灘,所以就襯住冇咩攪周圍行下睇下,去左海灘既左手面,第一次發覺原來好靚,個景影埋去完全唔似香港,正

之後日落人亦好少好少,相當寧靜,不

夜晚食過DINNER後出左去睇星星,因為個天冇咩雲而且月亮係早期時見唔到,望到好多好多星,可惜係海中有幾隻漁船,攪到有少少光,如果唔係全黑就正了,後來月亮出黎左,打上水上面,又係靚的,不過因冇帶腳架,所以攪好耐先影到一張半張滿意既相,仲比人話我好似戰地記者咁成件扒左係沙灘,XD

第2朝5點幾起身睇日出,可惜比個山遮住左,所以只見太陽光打上天同埋D雲度,但都其實幾靚

之後訓左陣又遊多左次水,海就真係比之前一日更靚,真正做到海天一色,開心極了

食過LUNCH後見到一班人係西灣過番黎走,因為之前帶左幾L水入去後尾雖然條喉關左但都搵到水源,所以走時D水用唔晒就問下果班人要唔要水,到我fill比佢時見知佢地行到冇咩水,後尾仲有人行錯路,幾個鐘冇飲過水, 仲問我地浪茄有冇士多 @@ 真係唔中暑都偷笑,最後我地自己留番每人1L其他就比晒D水佢地

其實再之前我地收營時見到2公婆,又係西灣行過黎,見到我地CAMP已經好好奇咁望望下,之後聽到個老婆同老公講前面好似冇路喎,個老公依依餓餓研究係咪行番轉頭 @@,我忍唔住要stop佢地千其咪係12點行番上西灣山,叫佢地晏少少再行番出壩搭的士

oh god!!!! D人真係好危險,西灣山真係成日死人架喎,不過好在D樹高番D而且收到電話,所以依2年死少左人,但都要小心D先得架大佬

之後3點零鐘就開始走人,天氣真係好熱,行左少少已經流晒汗要休息,但上高少少浪茄真係好靚,好耐冇試過望得咁遠,忍唔住講晒粗口,好L正呀

<01&02/07/10>
Photo Link <<<<<<<<<<<<<