暑期作業

~~暑期作業(summer exercise) - [1999]~~

抄櫃筒搵野時無意中搵到彭浩翔很久很久之前既作品,依套雖然係短片,手法亦見有點點造作,但作為第一部實驗電影,花巧野用多左亦少不免,當中故事過癮,無論起點,中間以至ending,處處流露出幽默及意外驚喜,剪接配樂亦見心思,鄒凱光飾演既王sir,很突出,果時仲未知佢係邊個,已覺佢好有趣,短短11分鐘既短片,竟然有成8分鐘既making of,可見彭導果真誠意十足

因為係短片,up左上YouTube有興趣既可以睇睇 =P

<27/08/07:夜>

Photo Link

七月十四的十三厶

琴晚又去左做左我最唔精通既打牌玩意,但整晚充斥著不如意,首先係話最早到果個居然最後先到,之後個個好似好飽咁,完全冇人有意慾嗌野食,但果時其實我肚餓爆了,卒之我按捺不住一而再再而三係咁話要嗌野食時,佢地話要等多一個鐘 T_T

ok,去到打牌,因為打全沖,相對黎講我係會輸少d既,但都唔洗冇胡食架,全晚邪到爆,d牌全部都係天一半地一半,打出既牌好快又會摸番番黎,果真係沒完沒了,想點先!?!唉,真係輸自摸都輸死人

到左差不多十二點鐘,聽講打牌從未輸過諾仔打左唔夠10鋪,已食出十三厶,佢嘩嘩聲話依d係邪牌,打時都諗過下食唔食,不過有得食我估冇人會唔食,聽佢講一開仲爭4隻就成局,之後摸一隻中一隻,四round後自摸食出,經由佢口講先知已搭入七月十四子時,又真係幾邪喎,哈哈,不過切話連食第三鋪先唔可以食,其實咁難既牌真係唔知出現既機會有幾大

講番我自己,真係一鋪都冇食過,全程陪打,去到北圈我已按捺不住猛嗌要執位,就係我以為輸足四圈既同時,去到last果鋪就有胡食!!!以為有轉機時點知.........執位時我又........又係坐同一個位,西位,shit!!!

後尾既四圈亦理所當然地冇乜起息,食出既牌5隻手指數得晒,我除左借酒消愁同抽下阿喵阿毛既水外,真係冇咩好做

電視做緊陰陽路7,真係好爛,好似我d牌咁,一樣的爛

卒之係眼訓奄悶既痛苦中挨到4點,打完了!!係番歸既途中,我突然發覺我收番既pizza錢少左,原來我除多左一份!!!!shit 除左輸錢外,我又收少左錢,嗚~~~點解咁對我 T_T

七月十四半夜四點鐘既街上,一個人都冇,只有疏落既車駛過,行到屋企附近,居然又係大熱天背脊係咁發涼手臂起晒雞皮,想點先?!?! 不過冇乜特別既 我估 哈哈哈


附上阿毛(我嗌佢黑俠梭羅)既玉照一張,睇佢既pose幾x有型!哈哈

<25/08/07:夜>

竊聽者

~~The Lives Of Others[Das Leben der Anderen 竊聽者) - [2006]~~

果然名不虛傳的電影,故事平凡中見不平凡,東德活在政治監察當中,市民一言一行小心翼翼,審視跟蹤偷聽,故事初期描寫得不錯,及至中段,平板機械式的主角,透過接觸被偷聽者的生活及所看的書籍同化,性格及行為漸漸趨向立體化人性化,由遠遠偷看監視轉變為親身近距離接觸當事人,一首好人協奏曲,明明確確的將主角為人定界,雖然主角面容不變,但看上去已顯然不同,而依種睇住佢慢慢轉變既過程,係故事當中最好睇既地方,特工查屋一幕,主角與被監視者同步的緊張感覺,令到作為觀眾既我亦異常投入,整體故事過程流暢而令人動容,男主角精彩的演出將會永留在觀眾心中, 竊聽者 - 一套不能錯過的電影

<23/08/07:夜>

Photo Link

不知不覺又到了

見到lift入面張貼左張盂蘭節通告,原來不知不覺又到了七月

曾幾何時,盂蘭節對於我黎講十分顧忌,可能屋企人將依個節日放得太大,仲記得一到七月十四果晚一定唔比出夜街,如果冇可避免地要出去,都會千方百計搵個十字架放係我身上先比出街,依家諗番起真係好好笑

又記得出黎做野冇耐,老細同同事好多時都會一齊夜晚出去燒野食,印象中連續3-4年都係撞正七月十四正日,真係好邪,哈哈

再記得前些日子,識左一班朋友,專門東奔西跑,四出探訪香港既猛鬼地點,係果2-3年,真係去過好多地方,仲記得第一次探險就到灣仔船街走訪兩間出名的猛鬼地點,當時正正係七月,過程相當精彩,稍後再另文詳述

再記得上年七月,發生了的士事件,由於篇幅不長,我就簡單講述番當時既經歷

話說當晚12點零鐘左右,係歸家途中望到一架的士停係不遠既轉彎位等轉燈,當時唔明點解會吸引到我係咁望住佢,到轉燈後,的士轉彎後朝我方向駛埋黎,由於我一直望住架車,當車駛過我身邊時,我見到係漆黑既車箱入面有一個人,佢亦同時望住我,我見佢既面倉白得很利害,佢同黑蚊蚊既車箱十分格格不入,到我同佢有眼神接觸時,居然發覺佢眼神空洞得可怕,我立時知道不太對路,由於發生得太快,我一直望住佢而佢亦望住我,直到的士駛離我範圍,我輕嗌一聲"頂"後回頭一望,果真係如我所想,的士車頂既燈係著住既,即係順風車,哈哈

唔知今年既盂蘭節,又會發生乜事呢? =P

<21/08/07:夜>

門徒

~~門徒(Protege) - [2007]~~

一套相當差的電影,一開始吳彥祖著住件軍裝,即時諗起知法犯法,可惜依套差太遠了,其實套戲都出左一排,我冇揀到黎睇,點知細佬唔知聽邊個講依套片好睇,租左番黎一齊睇,睇前仲問我你估依套定跟蹤好睇,當時唔知但未睇到中段已知瀨野了,因為見到爾冬陞,哈哈.果然除左講道理外,依套片既選角及故事亦很差很差,古天樂既大隻佬老同已夠死人了,故事亦屎到痺,東拉西扯冇重心,游離到暈,最後果廿零分鐘仲完全不合情理,一路睇一路小究竟邊鬼個編劇攪到仲衰過無記既電視劇,唉!張靜初 - 一個我期望甚高的演員,我第一套睇佢既居然係依套既野,唉!!有點兒後悔隻孔雀放得太耐仲未睇,唉!!!

<17/08/07:夜>

Photo Link

The Hauntening

Quite funny short film by http://waverlyfilms.com

大灘

雖然好近馬路,但依個fun camp不錯,睇地圖行左上山搵三角測量器,仲走錯路,要係30-35度山波度滑落黎,幾驚直滑出海,但幾好玩

<27&28/01/07:日>

Photo Link <<<<<<<<<<

跟蹤

~~跟蹤(Eye In The Sky) - [2007]~~

杜sir名字果真太大,一不留神以為又係杜sir加游乃海依對金牌組合既片,但事實並非如此,跟蹤係游乃海執導,杜sir只係監製,一直很喜歡游乃海寫既故事,佢編既劇十居其九都非常精彩,係信心既保證,但作為導演就十分意外,另一大驚喜係片中女角徐子珊,全片大部份做得非常自然,可能個角色太岩佢做,係雨中一場表現得太幼嫩,尚要努力,另賊黨cast,各人性格及整體設定十分不俗,可惜重點不在此,至於家輝及任達華表現出應有之演出外,狗仔隊題材亦係港片中少見,整套片都非常不錯,雖然逃不了杜sir影子,但結構節奏都幾好,係邵美琪粗口角色有少少敗筆,半天吊很突兀

<08/08/07:夜>

Photo Link

Paradise Now

~~Paradise Now(立見天國) - [2005]~~

少見的題材少見的角度去探討以巴問題,故事講及兩個稱兄道弟的年青人,於成為炸彈人前後的生活睇法及遭遇,無論打工生活,兄弟情,親情及愛情,影片以超濃縮地飛快描述,但並不失真,事實上主角們的炸彈任務也來得快速,當中的掙紮及不捨描述得不錯,最有感受係任務前錄影的一段, Khaled對母親講及濾水器的說話,簡簡單單數句已令人覺得無奈不已,女主角以局外人身份,第一句就說出life is full of surprises,對生於壓迫及革命使命感的男主角們有著相當的諷刺,電影嘗試以貼身角度去描寫不為世俗認同的一群人既睇法及處景,當中亦涉及身邊人及事的影響,描寫得比較人性化及立體化,至於以巴爭拗的論點,反而描寫不多,可能題材真的太敏感了

<07/08/07:夜>

Photo Link

The Hills have Eyes II

~~The Hills have Eyes II(深山大屠殺2) - [2007]~~

以動作片黎講不錯,對上一集番拍70年代既隔山有眼,我覺得係同類型番拍片中比較高質數的,起碼故事完整,驚顫緊張感做到了,而依集我幾欣賞佢個故事概念,以新丁士兵對抗一班殺人狂,有起碼的對抗性但又不失羅輯性,困獸鬥做得不錯,黑蚊蚊既環境令我諗起the cave,一樣的黑暗環境,一步一步去同敵人對抗,可以一看的動作驚顫片,另女角十分靚女,亦加強了不少可觀性,而男角表情就有d似Evil Dead入面既Bruce Campbell 哈哈

<06/08/07:夜>

Photo Link

久違了的8號波

其實一早對8號波依個term麻木了,因為講左好多次都打唔成,even上次3號仔咁強勁都唔掛吹咩?

食飯時,去留言版睇下d友仔講乜,見到有個人講"8號波,依個係集體回憶",哈哈,原來人人都同我一樣,覺得天文台死都唔會掛8號波,就o係人人以為係既時候,天文台就一個唔該黎一個快掛,飯後不久2:30就上8號,攪到d野亂晒籠,安排晒d野,已經4點了,出到去巴士站仲排晒長籠,心諗準時走果d點算?

去到葵芳已5點,巴士站仍係蛇餅,見個天冇風冇雨,計過都係搭多個站行番屋企算了

卒之,番到屋企都已5點半了,何必呢?唉

<10/08/07:日>

姨媽的後現代生活

~~姨媽的後現代生活(The Postmodern Life Of My Anut) - [2006]~~

很久沒看過許鞍華既戲,對上一套應該係女人四十了,依套亦以女人為題,配上演技精湛既斯琴高娃,以黑色喜劇展示出一個屈屈不得志既知識份子係內地既生活,老實講,依套片人性濃厚,睇時趣味十足,雖然開頭以很誇張的手法講姨媽既生活態度,但喬枉過正只會令姨媽格格不入,係~整套片比我既印象及信息係格格不入及事與願為,所有人由初步觀感及至後來故事發展,得出來結果全部顛倒,借此講出姨媽以為自己所選所做一切理直氣壯理所當然,但高尚及有承擔既性格撞上一連串挫折,到頭來換得事與願為及格格不入,故事去到中尾段亦變得悲涼,有時好多野唔係你想就係,事實好多時都好現實,而現實亦好多時好殘酷,依套片可引起觀眾多方面的思想及反思,無論係自身政治或身邊既環境,不錯的電影

<05/08/07:夜>

Photo Link

十二金釵眾生花

~~十二金釵眾生花(12 Flower) - [2007]~~

一隻相當抵買的碟,除左mp3外,我買依隻碟既主因係裡面既dvd,看似有趣及相當indie既影片,係,我並非當佢係mv而係短片,雖然畫汁爭少少,但內涵搭救

- 阿芝既HomoSapiens相當幽默,如果介紹係真既既話,就相當有趣

- 跟手林夕既作品,太廣告感,加上老子既道德經,好深o者

- 而古仔既就非常不錯,idea及意思簡單直接,真係估佢唔到可以咁好,睇時令我諗起奶茶拍依d野都好洒家架喎,有冇過料比佢先?哈哈

- MV中金培達三千年後比想像中差,可能太白太明顯同充滿想像感既旁白有d唔夾,效果好似平凡左d

- 麥婉欣既SoPoetic,我就非常中意,畫面好charm好正,片中又見田原感覺非常好

- Sa既一句think less but not thoughtless,來得相當漂亮

- 之後高輝既賣火柴的女孩很一般,可能係因為電影節中睇過一套非常好既版本

- 而夏永康既萬花筒mv,靚係靚但睇到我真係頭都暈埋

- 小克講一段愛情既過程,很認真,唔出番個logo,真係認佢唔到

- 走出紅樓本身係一首十分精彩既歌,配上夢想與現實既交錯,好中意

- sammi既一個小小twist,自然地講出時間與女人既關係

- 但作為最後既故事,彭浩翔好似平淡了一點,可能只係節錄,差了一點(自我安慰中)

<04/08/07:夜>

Photo Link

jackass number two

~~jackass number two(死蠢鬥一番2) - [2006]~~
jackass - 一套幾年前十分喜愛的 tv show,印象中應該有3個season,無可否認佢地真係好鬼無聊,但諗頭十足,好多野都玩得一餐,d人又唔怕死,爛玩到痴線,後來出既jackass the movie,感覺不太好,因為好多已經係tv show入面玩過,冇什新意,反而依套number two,一開場果part我已忍唔住笑,唔計玩多左低級技倆,其他都幾過癮,係覺得個個game都係得一個試,玩左後其他人只有在旁拍手,冇左果種個個都有份玩既場面,我覺得冇乜癮,另發覺Bam Margera佔既份量多過steve-o,係咪靚仔左佔戲會多左呢?哈

<03/08/07:夜>
Photo Link

200 Pound Beauty

~~200 Pound Beauty(醜女大翻身) - [2006]~~

開頭幾有趣,片中的肥妹造型幾得人好感,有天份但冇外型,為左一直留係暗戀對象身邊,不惜被利用及取笑,某情度黎講角色及遭遇幾可悲,女角以整容作為改造的方法,睇過電視及金基德既Time一定會感受到,相信一點都不好受,男角在韓片中已算非常有型,片中幾首歌亦算不錯,老實講女角改容後並非美若天仙,只係傻傻地幾可愛,尾段以缺憾式童話收場,不過不失

<30/07/07:夜>
Photo Link

綁架

~~綁架(Kidnap) - [2007]~~

尚可一看,片內除張志霖外個個絕頂聰明,故事無可否認不錯,特別綁架的過程及鋪排著實不錯,但個個都咁醒有點兒攪笑,ending亦怪怪的,明顯弱了很多,講番角色,奶茶handle緊不一樣的角色,果斷而堅毅剛強,二話不說就地脫衣,對於片內一句就算辛苦也不讓人知道,某情度想起真實的奶茶,也很辛苦,心痛,片中奶茶很有型特別係selection screen的相片,另張兆輝幾搶而林相比下有點兒迅色,眼神表情已ok可惜聲音不夠強悍,沉番少少會好一d,加上對手太強冇辨法

<29/07/07:夜>

Photo Link

香港的好天氣

終於終於都落出雨了,持續了二百多個鐘的炎熱天氣警告終於除下,印象中已連續多個禮拜藍天與白雲,雖然真係好熱,但睇見依個好天氣真令人感動

講番炎熱天氣警告開頭果個禮拜,我已暴晒了二日的,皮膚變黑了,臨離開香港去上海前,係地鐵上見到除我變黑外,車箱內無論咩年紀,大部份人都變得黑黑的,我係心入面諗,香港人越來越似泰國人了,哈哈

去到上海,很熱很晒,上海空氣很差,天空灰灰的,聽香港上去做野既同事講,很多年已沒有藍天,好掛住香港有山有水有天,原來香港已很幸福了

做完野後,就係上海四年來最熱果日,我地出左去戶外玩,根據官方報導,果日有40.2度(雖然冇人會相信得咁少,但聽係咁聽啦),我又暴晒了一天

番番香港,機上廣播香港有34度,嗯~藍天回來了,雖然34度,但我一點都不覺熱

花與藍

花 - 並非色彩燦爛的花,而係古怪既design令到我新買既碟一羅出黎已經花了

藍 - 無意中的藍,只因心痛既我想影低隻碟既花痕,但能力有限,到最後只影到窗外的藍

p.s.相片冇ps過,但效果有趣

<04/08/07:日>

單身部落

~~單身部落(Single Blog) - [2007]~~

真係唔明點解會睇依套片,可能係因為想輕輕鬆鬆睇番套港產片,太耐太耐冇睇過了,另又因為有曾國祥,佢做戲不錯,所以試試,可惜換來相當的失望,睇來很難先可找到另一套半醉人間及反斗狂奔了,前十零廿分鐘開得不錯,有d地方幾好笑,但後面越來越賣弄性喜劇,仲要冇什驚喜果種,阿rain很做戲感,谷祖林亦太誇張,救命,而董敏莉幾cute,可惜都係很嫩,而曾國祥角色亦無甚發揮,可惜

<29/07/07:夜>
Photo Link

The Messengers

~~The Messengers(鬼差) - [2007]~~

依套片中文名叫"鬼差"但睇完後覺得應該改名叫"好鬼差"先岩,一心以為彭氐兄弟出品的鬼片一定有番咁上下質數,點知被昆了,睇完後全套片沒一點彭氐風格,只留於一般美國鬼片格局,片中的鬼魂亦係日式那種,點解美式鬼魂一定要明目張膽呢,太令人失望了,但見到久違的煙剷先生,總算有一點點意外,上網search過,原來彭氐只係掛名導演,基本上成套片大部份都係美國導演再拍過,怪不知完全feel唔到彭氐感覺啦,唉

<23/07/07:夜>
Photo Link

旺角波鞋街

熱鬧的旺角波鞋街,政府銳意改善,再見了,唉

<20/01/07:夜>

Photo Link <<<=======

Perfume The Story of a Murderer

~~Perfume The Story of a Murderer(香水-一個殺人者的故事) - [2006]~~

由Tom Tykwer拍出黎既片果然並非一般Hollywood movie,故事本身由小說改編,電影中整個架構非常結實而濃厚,特別係開頭找尋及探索香氣既過程,滂滂滂滂既心跳聲,繃緊既劇情及鏡頭,高潮位居然集中係開頭及電影既上半部,有趣, Tom Tykwer果然對節奏很有把握,故事本身包含左好多野,天才,獨有,追尋,收集,擁有,魔鬼,迷惑等等,故事發展慢慢走向說教,可能好個人既感覺,睇戲時係度諗如果依套係講外語感覺會唔會再濃厚d,non-mainstream hollywood movie,始終帶有hollywood的字眼,唔係在於講英文本身而係隱含當中的走向,另外,套片仲令我諗起好多年前既少年落毒事件簿,同樣地天才橫溢,同樣地離經叛道,同樣地走火入魔,後者好像少了一份人工修飾的凝造感

<15/07/07:夜>
Photo Link