23 July 2015

三日兩夜大嶼山走營(東涌石壁郊遊徑分流二澳大澳) - Day.02 (04Jan14)

貳零壹參至伍日 - 三日兩夜大嶼山走營

東涌>法門古道>昂坪>石壁郊遊徑>大浪村去分流>煎魚灣>二澳>牙鷹角>大澳



雖然話今日要行好遠路,但我地因有32,所以最後都攪到成10點幾先起身煮早餐食,食完就經過花園餐廳睇下d舊屋同埋睇下佢有無開門,今次有開了,不過因廚師年紀大,已退休,所以只有一般餐蛋麵果d,所以我地最後行左去寶蓮寺搵野食,十幾廿年無食過,加下d野呢真難食,求其食左d野就番轉頭仲見到好多牛係度休息,轉番上去心經簡林條路,係花園餐廳食埋豆花未夠2點出發了

經過上一次行死既經驗,今次行岩路入石壁郊遊徑了,開初既路非常簡單,仲見下山見下水咁,而且可能唔算太多人行,d空氣同石上面既青苔好厚下,之後經過一段爛石路,未夠3點去到一d鋪得靚少少既路(見到好耐無見既白字熨部張炳奴,真係好耐好耐無見過佢既字了,行開山一段時間既人一定見過),又係山又係水咁,天氣朦d但其實幾開揚幾好view,行多個鐘就完左石壁郊遊徑去到石壁水塘了

經過引水道行過一個非常郊遊feel既樹林仔,岩岩好d陽光幾靚,影完相行到水霸既馬路,依度有d 景睇下而且無船灣淡水湖果個咁長同咁悶,右手邊係水塘同埋見到我地之前住既昂坪大約位置(睇到好清楚既爛頭山),左手邊係石壁監獄,我地話雖然個水塘堤壩應該好穩陣,但如果萬一爛左d水塘水就嘩啦嘩啦沖晒落水壩下面既監獄,恐怖,無聊完一輪見到隻牛食草,仲要係欄外面,跌落去又死得了,不過見佢好安心咁食,應該成日都係咁做的,唔洗我地擔心啦

行完水塘轉彎入大浪灣村條路過分流,見到有個牌寫明二澳唔比入,不過封村已經係好耐之前既事,加下應該無咩人係入面住,所以我地就照經佢入牙鷹角啦,睇個地圖仲有排行,不過我地唔算太倦,還好ok

先經過引水道到左大浪灣營地,無人係度,係途中玩左個geocache,攪攪下6點日落了,magic hour幾靚,好紫而且得個彎月,今晚行夜山應該好黑下,好快到左狗嶺涌營地,依度有人camp,d水源唔錯個view都唔錯,不過我地要行多好多路,所以無係度停

過多一個鐘度過左分流經過一d唔知有無人住既屋過埋煎魚灣營地就到左二澳路既入口,因之前封村所以有警告牌而且d字已經朦晒,條村好耐無人住d草好高而且好黑,周圍都唔知有無咩野生動物,我地行行下就有d眼同有動物跑過,所以都行得好小心下,但之後呢,過左個地盆再入就發生左一dd害死我地既奇怪事情,依度唔詳細講了,總言之係一d結界咁上下既野,非常奇幻,我地係二澳村入面大約40分鐘就出番海邊,之後呢再睇地圖ensure無問題就再向牙鷹角營地出發,去到差唔多9點半,食埋野就訓了,不過雖然岩岩遇到怪事同堆都算行左幾多路,不過我地仲好好胃口,仲將d飯焦掉幾個茶包入去煲整個茶跡飯添,不過個樣有d似洗煲水(雖然我地真係要佢黎順手洗煲),但味道還可既,攪到11點幾訓了,我地第二朝要行出大澳,不過好近的


[03to05/01/14]
Photo Link <<<<<<<<<<<

No comments: