美利茶廳

琴日係灣仔食晏,因天氣太熱又唔係好知地方食野,所以求其搵左間茶餐廳食,地點係灣電附近既柯布連道,間野叫美利茶廳門面係普通不過的茶餐廳,未踏入門已有人招呼我地入去,岩岩入左門口,個伙記兩三下手勢已搵到位比我地,雖然地方真係好窄,但都算坐到,就係我地坐低果一刻,湯茶刀叉已經送到@@,我心諗佢又知我地食茶餐,如果我地齋飲野都送埋湯?哈哈

望望牆上既餐牌,有兩個午餐,同事嗌左個碎牛飯,而我嗌左個白汁豬扒意,同事習慣地放d刀叉落杯茶度洗,因為我為人好懶,所以羅起自己果杯飲左啖茶望住佢洗,就係我岩岩飲完啖茶,隻杯未放低,記住係隻杯未放低,我地嗌果兩碟野已送到,我同同事一齊嘩左一聲,洗唔洗咁快呀?我同佢講依間野仲快過麥當奴,好利害

由依刻開始我就好留意間野個運作,見到唔止我地,真係個個一入去未坐定已有得食,同事好奇心亦同我差不多,佢計到由個客坐低嗌飯果一刻計起30秒就有得食@@,我亦留意到外賣亦快到離奇,岩岩門口嗌完,唔洗一陣已包好羅出門口,勁!!!

一路食一路同個同事研究,究竟佢地點解咁快,發覺除左d餐係好易整之外,原來有專人係度筆湯,筆飯,但唔好以為佢忙到停唔到手,我發覺佢仲有些小idle time,可想而知佢幾快手.另外見到d伙計羅野招呼人客亦好有步驟,每一次羅野比客,一定唔會單手去單手番,佢地一定會等齊足夠數量既野,先雙手羅過去比客(近果d當然例外),而每當門口外有人,佢地就會招呼左人客入內先羅野比其他客,即係坐低左果d唔怕佢走or等多陣而招呼左門口果d客仔入內,亦發覺到木台櫈既排法亦經過計算,一條長冷行比客行入去同埋伙記羅野走位,而人客坐既兩行木台凹凸咁排,咁就慳埋條走廊位,同個同事講,如果佢日日既午餐都唔同而又做到同一速度既話,依間野就真係勁,佢無論係流程,策略同效率都好強勁,員工生產力好高,仲係自動自覺,飽經訓練,連抄飯肉片河都唔會相差太遠,幾分鐘已送到,野食仲要ok,係杯野飲一般,依間小小既茶餐廳真係令我大開眼界

<10/07/07:日>