急症室

唔知食錯乜野,琴晚出去食完飯後就開始唔舒服,起先腰骨痛之後開始肚痛,半夜起身嘔左兩次之後肚痛得仲利害,之前從未試過,前又痛背脊之痛,嗌晒救命咁濟,卒之頂到天光,未夠9點就冒住雨死去睇醫生,去到仲要未開門添,又凍又痛真係幾悽慘,好彩等左兩個零字就開門了,醫生亦比正常時間早左番,講完病情比佢聽之後,佢話怕我胰臟炎,要我去急症室check下,聽到急症室真係好想死,因為真係要等好耐,不過佢講如果係胰臟炎會好危險,唉.點都要去啦,揀左間我比較熟悉瑪嘉烈去睇急症,可能每次我都係去專科門診,佢既急症室真係第一次去,原來都幾靚下,人唔算太多,非急症要等"120"分鐘,shit!!!

印象中去過急症室1-2次,對上一次係半夜拗柴,痛到仆街,果次係去威爾斯, d"登"一d都唔好坐,可能人太多太亂,房亦係用布間開,感覺很差

係瑪嘉烈坐左一陣就比人叫去睇分流,護士小姐初步檢查過後,列為次緊急,心諗,咁都好d,非緊急120min,我次緊急應該會短d掛,好彩d"登"幾舒服,唔係我就慘了

係度等呀等,感覺上個肚同條腰又好似冇咁痛,雖然好眼訓,但因要留心聽廣播嗌名,唔可以訓,係度睇睇身邊同埋送院既人,可能因天氣太凍既關係,見到好多老人家入院,加上天雨關係,亦見好多人跌親要睇急症,整親腳真係好慘的,諗起都辛苦,唉

等左成個鐘後,人越來越多,非緊急要150分鐘了,真可怕,冇幾耐卒之到我了,比人叫入房見醫生,雖然間房唔太大,但起碼好過得一塊布丫,醫生小姐亦好nice望落對眼仲好靚添,嘻,佢問下病情檢查下之後,比我感覺係幾有耐性,雖然隻手係凍d,但點都好過果時趕頭趕命既感覺好多,醫生要我去驗血驗尿照X光,唉,知道又要等好耐了

出左房後過左陣,比人叫到另一間房,護士小姐抽血及幫我打止痛針(其實我同醫生講我已冇咁痛,但佢堅持要我打止痛針),支針真係幾痛,冇幾耐又比人叫左去做心電圖同埋照X光,X光果度要除晒衫褲換佢件袍,天寒地凍好想死,張床仲凍冰冰好難受

攪左3個幾鐘後,醫生小姐問我好番d未,我當然話好番d啦,佢話我胰臟水平正常,應該係腸胃炎,背脊只係舊患,應該問題不大,叫我陣間去羅藥就可以走了,呼~~幾驚要天寒地凍就快過年先黎留院呀,好彩者

去到另一座既藥房羅藥,唔知係因地庫關係定係儲藥既地方係要凍d既關係,入到去坐左陣太凍頂唔順,行左出門口企,望望四圍都冇乜人冷青青,夜晚依度應該都幾恐怖下,哈

等左陣,卒之有藥了,感覺到藥房d人亦好nice,我羅過藥後就搭車番屋企食野了,因為成日一d野都冇食過,好肚餓

經過依一次急症室事件後,發覺d工作人員冇咁冷漠,好多人都好nice好有禮貌,急症室比我改觀不少

thanks急症室各位工作人員

<02/02/08:日>