灣仔船街-續(聖璐琦.1)

其實我見鬼既經歷唔多,印象中只係細個時係屋企個窗望到對面天台有個綠色靈體,冇咩特別只覺得好奇怪,之後就從未見過,但自己就對鬼神極有興趣,細個時已經係慈雲山黃昏6-7點自己一個坐係走廊睇怪異集,左右同埋前面都係一條條冇咩人行既陰暗長走廊,自己一個係度睇鬼書都唔好話唔陰森(可能街坊行過會覺得我係一個怪小孩,哈哈),但我偏偏極中意依種氣氛,細個時亦試過好多次夜晚訓唔著,係上隔床透過氣窗,望出去一個人都冇既暗黃走廊,唔知點解總係有一至兩支燈係壞壞地,閃下閃下咁,但除左氣氛恐怖外,就次次都冇咩特別經歷,所以到大個左,就忍唔住要出去探下險去親身及近距離咁認識多少少依方面既野,哈哈

第一次去探險既經歷都幾驚險下,記得當年係01年既農曆7月,第一次係網上參加左佢地攪既探險,地點係灣仔船街,我join既團體主張專重求真但不迷信,所以佢地每次去新地點,都會由經驗多少少既人去日探了解當地既環境及風險評估,但因我係新人,所以只會join夜探,我記得當時去到灣仔已經係夜晚8-9點,如果冇記錯,係合和入面既大家樂食過飯後就去船街了,老實果度我真係好陌生,眼見佢地行過古廟前合十一拜,我亦跟佢地照做不宣,之後係船街既公園聽佢地講清楚指示及萬一危險如何逃走及集合等等,雖然自問絕對唔係一個細膽驚青既人,但氣氛實在絕不輕鬆,之後我地一行6人(點解記得咁清楚?哈哈,之後會有交代)開始進入我地既探險地"聖璐琦",老實,在我感覺中,依間聖璐琦既猛鬼程度絕對比起佢旁邊既紅屋(南固台)強勁得多,南固台同聖璐琦既分別係前者係私人而有修養既鬼居而後者絕對係三山五嶽不受約束既九龍城寨,所以當中既經歷自然係以聖璐琦為甚

01年既船街始終未係名勝之地,依度只係一d個別人仕探險地而已,所以我地基本上冇咩阻礙就可以順利由樓梯既一旁由聖璐琦既地牢進入,我地成班人一路行一路講唔好意思打攪晒,入到去係一條窄窄既走廊,因係地牢既關係,當然係伸手不見五指啦,我羅住一支不太專業既電筒,跟住佢地經過走廊,睇睇兩旁既房,穿過佢地話極為猛鬼既男廁,就去到地牢既中心,我記得果度除左溶溶爛爛黑蚊蚊之外,周圍既氣氛亦異常恐怖,我覺得果度係lab之類既東西,因為四面都係房,格局係好多房門同埋一大塊一大塊既玻璃窗,當然依d門窗已經係爛晒,我地可以係所企之地,由電筒或影相既閃光燈,360度咁望到所有房間入面有爛木台,爛櫃,一個個大大既化學玻璃樽等等,加上人少而地大既關係,氣氛凝重氣溫亦下降不少,依個唔知關唔關地牢既關係,anyway,經過一連串既探視之後,我地亦開始向地面出發

下續

<23/11/08:日＞