play list

26 November 2008

灣仔船街-續(聖璐琦.3)

當所有人出番晒空地既時候,當中負責影相既人發現左一樣野,就係原來3個影相人由地牢直至空地再入埋課室出番黎所影既相,全部黑蚊蚊冇野睇,照計地牢同埋課室太黑但用閃光燈影相應該唔多唔少都可以影到d野,再者,地面因露天加大月亮既關係,人都可以好清楚到對方到但用相機加埋閃光燈都係漆黑一片,一部機二部機同一狀況唔奇,但三個人全部都係咁,果一刻已經異常古怪,隊員唔信邪再用閃光燈加電筒打燈再影多幾張試試,情況都係一樣,果一刻我地知道原來係佢地唔想比我地影相,所以之後我地收埋晒d相機冇再影到

當時因我冇咩野做既關係,我開始留意到周圍既氣氛異常,起初發覺周圍好嘈,當中有好多好多狗吠聲仲夾雜左好多雜亂既聲音,分唔到係風聲樹聲定係車聲,但係真係嘈到我地爭d聽唔到其他人講野,當佢地周圍影相研究同埋發現古怪既同時,果一刻我又突然發覺周圍好靜,靜到一粒聲都冇,狗吠聲冇晒,風聲冇晒,整個過程係好突然咁冇晒,雖然我接觸靈體既經驗唔多,但當中既變化亦好易感覺到有所不同,望上再上兩三層課室既時候,雖然我咩都睇唔到,但唔知點解心入面既感覺怪怪咁,當中有經驗既隊員話上面一d都唔簡單,佢地話樓上既走廊有d靈體已經僕左係度望住我地,我再向上係咁望,但都係咩都見唔到

之後我地既然影唔到相,所以就決定左上上面既課室睇睇,但上左一層既時候,因樓梯係可以望番空地同埋課室既走廊,佢地就話見到越黎越多靈體係走廊,係咁望住我地,果一刻心口既壓力亦越黎越大,我地決定左唔入二樓再上多一層直上三樓,但係未轉上三樓既同時,佢地有人見到三層樓既走廊已經企左好多靈體係咁望住我地,我除左感覺壓力比地下二樓大之外,亦覺得有一種怪怪的不安感,當中有個學過法既隊員話可以排個唔知咩咩7星陣就可以安全d,當解釋完一大爛餐後發覺我地得6個人排乜鬼7星陣丫,哈,果一刻感覺輕鬆番d但心中既不安感依然存在,我地stick左係二至三樓研究左好耐上唔上去,過左一陣,帶隊既人一聲令下,決定全體撤退,由空地入番地牢走出學校既同時,發覺到之前我地入去推開晒近出口既課室門竟然全部已經關番埋,冇風又冇人點解會自動關門,好怪,但我地冇再花時間研究,就出左學校行番去公園講番所遇到見到同埋感覺到既野,當我分享緊自己既怪怪不安感既時候,帶隊人就講番點解佢會決定左唔再上3-4樓,原來我地stick係二三樓樓梯果時,佢感覺到有種引我地上去既力量,而背後係一種不懷好意立心不良既感覺,佢知道頂樓果度一定有一至兩個比較高能力既靈體係度,如果我地堅持再上一定有事發生,所以佢就決定左走人,而依種就係我所講既怪怪不安感,原來如此

經過一連串既分享研究之後,我地決定左唔再入紅屋而走人,因為7月佢地實在太強,我地要過埋鬼節先再攪過另一場聖璐琦加紅屋探險

後續

<26/11/08:夜>

2 comments:

野孩子 said...

續集呢?等左好耐喇~~ :P

q"._."p™ said...

懶之過 =P

希望下個禮拜寫埋南固台