My Little Airport - 寂寞的星期五

雖知道我聽歌並不愛聽/看歌詞,但My Little Airport就算是例外,因他的詞是比歌來得重要,這張寂寞的星期五有一種回歸的感覺,歌不再是跳脫的罵,少了不滿多了回想多了懷念青春的淡淡憂愁,也有一種令人一起細想一起細味的感覺,歌的鋪排也見心思,沒有一味的沉重(印度之後一直至寂寞的星期五也極為負能量,而菊花的味道就令人放鬆了點點),雖然最後還是以悼二零一二年的夏來結尾,負面情緒一下子再次沉淪至底,詩人果真多愁善感,但我喜歡這張碟

Try This Song : 我們一起離開吧, 爺就是一條辭職撚

Official Website : http://www.mylittleairport.com/

[31/10/12]

盂蘭勝會(初三) - 赤柱街坊福利會盂蘭勝會

貳零壹貳年捌月拾玖號(柒月初三) - 赤柱街坊福利會盂蘭勝會

因初四先會比較熱鬧(有天后出巡、放生、行朝),但因第日要番工,所以有時間初三都入去睇睇

紙紮物品比較清晰,但冇潮式咁多台位而且多就地而放,大士王樣貌同動作當然唔同,而祭品亦唔太多見,唔知關唔關今日係第三既關係

而且見有時間入去天后廟睇睇,仲拜左個神求左個籤,係上籤,但佢寫左百事無靈番上網check原來係百事無虛,怪不知睇到我R晒頭啦,希望今年剩落黎既係好事啦

之後走時仲順便去埋赤柱郵局影幾張相先走,又要趕下場了

[19/08/12]
Photo Link <<<<<<<<<

盂蘭勝會(初三) - 香港仔黃竹坑鴨利洲華富街坊盂蘭勝會

貳零壹貳年捌月拾捌號(柒月初三) - 香港仔黃竹坑鴨利洲華富街坊盂蘭勝會

因大王廟門前裝修,地方淺窄,去到剛好做緊儀式,部份十供,而大士王唔係立體而係一幅鬼王畫,比較特別,其他亦因係第三日,所以比較多祭品,比較特別係多d其他山,例如豆干山,龍眼山等等,而且居然見到有副十五糊係度,十分奇特,仲有神袍今次睇得清楚少少,見到八仙賀壽,都真係幾靚

另順手入埋大王廟睇睇,而因天氣太熱,所以過左南朗山道熟食市場飲左杯野,依度就快有地鐵,到時可能又唔同晒了

[19/08/12]
Photo Link <<<<<<<<<<<

盂蘭勝會(初三) - 石籬石蔭安蔭潮僑盂蘭勝會

貳零壹貳年捌月拾玖號(柒月初三) - 石籬石蔭安蔭潮僑盂蘭勝會

一早出發去左最近既石籬石蔭安蔭潮僑盂蘭勝會,本身佢舉行既地方好大,有個球場,但加下起左樓後越來越細,依家只係迫係石籬十一座上少少既空地仔度,連食煮野既地方都唔夠,要放左係下一層既地方,雖然係咁但居然都差唔多所有台都齊晒,連戲棚都

有,咁細地方都可以放晒d台而且係用竹棚做,我覺得幾唔錯,最衰係佢第一日我要番工,唔係可以join埋佢既請神儀式,聽講幾熱鬧,下年希望睇到

另可能係第三日,雖然地方細但一早非常熱鬧,好多供品非常豐富,連麵山,包山,糯米山,菜山都有,而且仲見好多生果,但香火真係好勁,爭煙到眼盲

仲有依度係潮式但大士王係黑面既,比較少見,睇左陣就走人趕下場了

[19/08/12]
Photo Link <<<<<<<<<

盂蘭勝會(初二) - 筲箕灣南安坊坊眾會

貳零壹貳年捌月拾捌號(柒月初二) - 筲箕灣南安坊坊眾會

夜晚去左幾年前去過既筲箕灣南安坊坊眾會,今日係第二日,夜晚有全真破地獄,時間真係唔多清楚,去到問人羅rundown,阿姐可能好忙,感覺比較冷酷,之前係依個盂蘭勝會度覺得d阿姐好nice加落力,唔知點解今年好似感覺唔同左咁,可能係之前東頭村既太熱情令我有錯覺都唔定

去到人唔算多,但事前功夫及步驟不少,堆沙,砌瓦片,砌鴨蛋,點蠟燭,放地獄城(後尾先知得依度有,聽講之前仲有閃燈添,真特別)等等,仲有法施們做既儀式都整左一輪,而排隊既街坊就比較多,每人都羅住晒d神牌係度等,之後放晒入地獄城再封門,就由一個氣勢十足既先生做破地獄儀式,比我想像中平淡感覺一般

至於個場,同之前差唔多,但就多左d雨檔,所以好難影晒成個大士王,而且當晚仲見到故事館同之前既講導明哥帶人睇儀式,所以我又問左好多野咁啦

但吸入太多煙,令我喉嚨好痛,嗯

[18/08/12]
Photo Link <<<<<<<<

盂蘭勝會(初二) - 東頭村盂蘭勝會

貳零壹貳年捌月拾捌號(柒月初二) - 東頭村盂蘭勝會

上畫睇完油麻地下畫就參加左長春社既潮人盂蘭勝會考察,去左東頭村睇睇,首先我到左九龍城再入左東頭村睇睇,之前一次去九龍城影相都有入過東頭村,加下好似又執緊d鋪,真係賣少見少,中民冰室一早已經close左,見到錦華冰室,牆上d磚仔都幾靚想影下相,問阿姐佢唔比,算了,由佢

番番去盂蘭勝會場地,主講既都係潮州商會副主任胡炎松先生,講既野有d都其實同潮人盂蘭勝會食品祭品講座差不多,但就比較detail講盂蘭勝會既rundown,雖然真係佢講咩就mark咩,但其實我預左一個月時間走好多場盂蘭勝會,實際去睇應該會知得多少少既,所以一去我就去左神壇果邊睇祭品同後排既酒杯

潮人盂蘭勝會黎講,多數係三日既,首先第一日10點左右係請神(多數係請德福老爺或者黃大仙等等),會由值理經師做儀式之後就係安神儀式,多數會有大士台,孤魂棚同經施棚現場東頭所見(因地方大所以都幾齊),最右手邊係金鎊棚,佢既旁邊順時針依次序有辦公室,神壇(又或者係正壇),神袍棚,經施棚,再有福品台,戲棚,大士台同埋孤魂棚,場地都幾大,而第一日仲會做埋法關儀式由值符使者騎住白馬去伸請做法事既批文,而第二日就會有金山供佛(即十獻,之前祭品講庭講過既花,果,衣等等),再有豎幡科儀,有五支幡要黎招鬼既,某d仲會有走五土(例如長沙灣或三角碼頭),之後就係放焰口(即施食),再繼續就有謝佛散旗,由9-11個先生羅住金童玉女走黎走去,要黎捉番一d唔願走既小鬼,最後會係送神化大士王等等

基本上第2日比較少儀式做,所以今次係東頭既第2日基本上我地去到係冇咩睇(同我本身所想像既唔同,我以為好似幾年前既香港故事館咁會有某個儀式睇),但咁岩因4點鐘,就有五福連睇,基本上潮州每日都會做同樣既五福連,佢係由2短3長既故事而成,加埋只有半個鐘,分別係十仙賀壽,跳加官,天姬送子,唐明王淨棚同京城會,都係講人所要既東西,其實係第一日會有破台儀式,主要係用叉又或者生雞黎破台,要黎保順利既

之後又講到神袍棚,原來望落都幾靚,有天地神三件神袍而且會有埋帽同鞋等等,而袍上面有晒八仙賀壽既公仔係度,再上面就係一條龍,真係好大件,中間果件係天地父母,而左係南神右係北斗,再講前少少有隻紅馬(帶信眾的願望上天,但後來聽講係大士王既坐騎,我攪唔清),咀含春草,代表生命力旺盛

講到大士王,其實有唔同型態,依個東頭村盂蘭勝會係潮式既,大士王會係戴帽,觀音放頭,正腳,左手會羅住南無阿彌陀佛,而鶴佬會係舉腳,無帽無鞋,至於廣府既就係腳半坐,手有筆,原來唔同大士王都有唔同造型

最後講到派米,因當時米鋪好多都係由潮州人經營,所以就有左派米依個儀式,以我所知多數係最後一日先做,但幾年前有人死左,就由5公斤變左1公斤,而且每次都如臨大敵會有差人註守,而且某d仲因人手問題又或者個場太細而變左無平安米派

至於廣府既破地獄,九幽地獄由地獄使者做一個破穢儀式令先人順利升仙,之前阿婆過身時睇過一次,相當有動感,聽講正一既破地獄會更好睇,我應該會係黎緊既一個月會睇得到

臨走時5點左右見理事等等開飯,佢地非常好客,我地行埋去佢就不停叫人食,我因為要趕下場而且唔肚餓,所以冇食到,但後尾聽人話d粥好味,所以都整左碗潮州弼食下,真係幾唔錯

[18/08/12]
Photo Link <<<<<<<<<<