play list

25 October 2012

油麻地文物徑導賞團

貳零壹貳年捌月拾捌號 - 油麻地文物徑導賞團

參加左文化葫蘆既油麻地導賞團,首先係榕樹頭集合,介紹油麻地依個名既來源(原此地以賣桐油同麻纜)所以就叫油麻地,而榕樹頭附近既街,係當時既人集合既地方亦係廣場既意思,後尾譯左英文叫Public Square Street,但做番中文就變左做公眾四方街,再後尾再叫左做眾坊街,所以其實英文先係形容當時既情況既
而隔離既梁顯利個位本身係舊差館,所以舊時果度係叫差館街既,至於我地第一站去既地方就係天后古廟,係1865年或之前已經有,至於佢另兩間城隍廟同觀音古廟,整整三間廟我一次都冇入過,原來係好靚既,特別係觀音廟入面用紙做既12奶娘(加下得番9個)同埋城隍廟既60太歲神像,真係好靚,但係唔影得相,但真係堅靚,有機會真係要睇睇,guide仲順手講埋香港第一間觀音廟係水坑口街,由浮木拜祭到後來刻左觀音像,有機會要去睇睇先得

跟手就講另一邊對面街見到既美都餐室,其實未夠鐘集合時我都去左飲野,但個感覺真係好差,唔比影相之前已經知(再之前去過一次),但今次真係印象極差,首先係坐低左就唔比轉位要跟單,我話比錢先佢要我落樓下比(KLM),好啦,我唔轉,再聽到要迫人一定要人地單邊坐,有人同條佬嘈就話唔做佢生意,連個睇樣應該係蒙古症既伙記都串到死,我都真係第一次見蒙古症既人有咁串既樣,真好教育,之後呢見有班日本人係咁影相,佢又唔嘈喎,即係點,咁型又唔阻人地,記得之前都唔係咁既,依個所謂既二樓話事人,咁攪法都應該會做死間野了,老鋪唔係咁做如果做到D野又唔見得有咩好食,就食屎啦,我唔會再去ED咁既所謂老鋪,挑

講番導賞,介紹左美都既設計,係比較環保式天然采光而且係一路窄上去,目的係會令街下光D同比較通風,之後行左去廟街,廟街南係政府所以比較整理而廟街北呢就係自己既,所以鋪就會比較雜亂,原來係咁既,至於油麻地街市,室內果座係1957年起既,以實用為主,但商鋪仍然係比較喜歡係室外擺檔,據講有100檔以上既街檔,除左一般生果肉類蔬菜,當中有好多係賣藥材同埋嫁妝用品既,老實如果唔係依個導賞,我都真係唔知有依個街市,而且賣藥材同埋嫁妝既鋪都幾過癮,有趣,丫,仲有個guide講左有d傘倒轉掛晒係度,其實係用黎阻住d水唔好比佢整濕d貨既,簡單又實用,哈

再後黎到左玉器市場,又係一個經過但未入過去既地方,入面除左賣玉器(guide講以廣東道玉器市場為高檔而油麻地既係比較平價少少既玉石)仲有特別既行業,就係寫信佬,加下生意當然唔同以前啦,但果部打字機果D幫人寫信又或者報稅既舊招牌都幾有趣

跟手到左油麻地警署,如之前所講,舊警署係梁顯利個位,依加既係第2代警署,但都有番咁上下歷史,係1922年所建,愛德華式建築,以傳統既灰藍色為主,屬於二級歷史建築物,即係可以拆既,唔知政府遲下會唔會拆左佢

之後係行左去上海街,講左少少舊招牌(多數以外型為主,因當時d人唔多識字,所以就以所賣既物品做招牌,賣刀就係刀既款賣錘就係錘樣),而舊樓呢,戰前有大露台,1925年再起過,之前有臨街柱但之後就開始無用依個方式,因會阻住馬路既擴建,guide介紹左上海街某一舊樓就係咁,一部份新既無柱而舊果邊仲有大露台同臨街柱,都幾特別(個故仔仲係業主為保育舊樓而比左好多錢去保住舊果邊既樓)

再前少少就有一座古怪紅磚屋,處於某豪宅下方(印象中好耐之前見過無咁靚得d暗暗既紅磚外牆,同旁邊既住宅格格不入,唔知係咩黎既),其實係油麻地抽水站,真係唔講唔知係1895年既建築物,依座野又有另一故事,事源係無人理左好多年之後係2000年郵政局既慶典,無意中搵到依度既舊地圖先發覺原來咁有歷史價值,佢做過郵局,公廁,垃圾站同埋露宿者之家,仲爭d比人拆埋,身世真坎坷,依家整晒玻璃亦番新左,係油麻地戲院所屬既傳統曲藝中心,佢既牆身其實最有價值,特別係圓圓地既紅磚,摸下佢感覺都唔錯

至於油麻地戲院(1930年建成1998年停止至2012年重開),整過晒靚仔哂之後其實我對佢無咩興趣,但原來佢門口果兩支有人面既柱,係今次番新時先發現,之前比人封左係牆後,如果唔係再整,就唔知原來有依兩支柱,唔講以為係新整既添

最後係油麻地果欄,之前自己入過影相,今次都係下畫所以人唔算多,果欄1913年已經係度,有250個欄,去左睇有牌坊既位置,介紹左某d係貴價批擋既外牆亦講左木頭車既停車場同擺位既分別,仲講左原來有個露天無門而且簡陋但又極近街邊既廁所,仲岩岩見到有人去緊,真有趣

導賞大約兩個鐘度,開初以為會講多少少舊鋪但原來所佔唔多,其實油麻地真係好多舊野,只係我唔識,希望再有機會會講多少少舊街舊樓舊鋪既tour啦

完晒之後見仲有時間,自己周圍去影影舊街舊樓舊鋪,仲影埋得如酒樓,外牆已經好古式又地下亦係舊式設計自己走左上樓上,好似無咩人(可能落左場未開始做生意,所以走人),依類舊式酒樓係香港我都唔知仲剩番幾多lu

[18/08/12]
Photo Link <<<<<<<<

No comments: