22 June 2013

大坑舞火龍講座 & 大坑舞火龍紮龍工作坊 & 書院道4號及蓮花宮 - Part.01(大坑舞火龍講座)

大坑舞火龍講座 & 大坑舞火龍紮龍工作坊 & 書院道4號及蓮花宮

01. 大坑舞火龍講座

參加左長春社既大坑舞火龍講座,之前都一直有興趣但人實在太多太可怕所以未睇過,咁岩因大坑火龍入左國家非物質文化遺產所以就有機聽聽講座

其實呢雖然我成日去中上環同銅鑼灣灣仔但我未去過大坑,一早搵左地圖係銅鑼灣道行入去,見馬路兩邊已經掛晒旗同大坑火龍既裝飾出黎,睇落條街都幾細,難怪封左路都頂到實啦

行左陣就去到大坑坊眾福利會,都幾舊下,但入面算幾大,入左去會堂講座已經開始緊,見到其中一邊鋪晒草,都幾高下應該係用黎扎火龍既,台另一邊有幾個火龍頭,有一個係鐵做既(後尾先知依個係要黎練習用既),至於另一邊既牆掛左一d相,後尾先知原來依度每年都有個攝影比賽,會於舉行完一個月後係研討會上頒獎,聽輝哥講研討會除左係慰勞食飯外仲係會賽後檢討,嗯

咁依個講座當然會講番大坑火龍點黎,其實wiki都有寫既,我唔詳細講了,但輝哥提到既長壽香同炮仗有驅蛇既功效又一d都唔出奇,咁多香咁鬼煙而且炮仗有硫磺d蛇怕左走晒去又幾logic,輝哥仲話當時舞火龍既人係唔怕炮仗既,60年代係六層高既高樓係咁掉落黎成地都係,嗯聽落都好熱鬧

大坑火龍今年已經係133年,當中只有打日本仔時停過,一連三晚,第一晚會係蓮花宮(觀音廟1863年)開光,大約9點零完儀式,之後入沅沙街打龍餅,跟手圍大坑行,舞一個鐘左右就會停低轉過晒d香再行過,第二同第三晚如是,會係9點零5分入廟之後行,八月十五果日會去埋維園,而最後一日8點零鐘會派龍餅比街坊,之後反方向行一圈最後就放出海龍歸天,丫,原來當時佢地火龍係出左海就算,但後尾唔記得咩原因就接觸到一位船家(唔記得咩姐),仲問佢d火龍係邊,原來佢地stick左係某一個彎位,後尾就開始叫阿姐幫手執佢番上岸,做左一排後阿姐唔係好想做,之後又講左一輪先幫番手,如果唔係警方應該唔比再咁掉落海了

招式方面除左打龍餅仲有其他兩三款,例如火龍過橋,而最主要既係中間既塊牌,叫橫江門,兩邊再有兩個頭牌,再出面就係星燈雲燈等等,之後仲介紹左龍珠(中間係碌柚,輝哥話要厚皮同乾身),龍尾,龍頸繩同龍鬚,而龍身佢地叫龍心既,加加埋埋有成240幾尺(龍身加頭有220尺,另二十幾尺既龍頸繩),而舞火龍方面都好多人,龍珠2個,龍頭1個,龍身31節每節2人,龍尾1個,但因需要好大體力,所以要替換,鼓方面亦有30人,加加埋埋有成其他星燈雲燈等等,有成百幾二百人,所以要分8組各有組長安排,而香就要一萬二千支一次,因一支只夠燒1個鐘三日共5round,真大陣仗

舞火龍要有經驗而其他既幫手都要練習,所以佢地會一早招攬人手,輝哥仲話有個外國人家長想比小朋友報名,但因太遲所以要下年報名先夠時間練習

嗯,聽晒成個講座都幾多學問同故事係度,幾有趣,希望傳統可以一直保存,唔好令佢變質就好了(輝哥非常抗拒政府插手,佢話長洲既包山咁就無左了,嗯,我都幾同意佢地攪親只有變得更煩同更公式化商業化,我最憎的)

To Part.02 - 大坑舞火龍紮龍工作坊

[22/09/12]
Photo Link <<<<<<<<<<

No comments: