07 January 2015

大嶼山3日2夜camp(東涌昂坪羌山龍仔大澳) - Day.01 (15Nov13)

貳零壹叁年拾壴伍至搭柒日 - 大嶼山3日2夜camp(東涌昂坪羌山龍仔大澳)


卒之行大嶼山了,依次係32夜既camp,不過因無咩假,所以放半日星期五下晝先開始行,fd由市區入到黎買埋野pack好晒野行得黎都成4點先係東涌出發,未上山前經過逸東村,先有人曬緊果皮同洛神花,排得好整齊下,印象中上次行都好似有見人係果度曬野,應該係佢地慣左既晒果皮既地方

經過侯王橋,見有人捉緊魚,睇到有條大魚游緊,又睇左陣先行,去到360救援徑已經4點半,本身依條路係起360時用騾仔幫手揹野上山起吊車,5.7公里但由零上五百幾米,揹晒野咁行都其實幾倦,不過因我share,所以可以用細背囊,雖然要揹番一部份罐頭糧食,但都無平野咁重既

行呀行,上到半山見到吊車既鐵架已經開始日落,個景唔錯,雖然有d,但還可啦

之後行東昂棧道,雖然用實木整,但因我地揹重野,所以都唔敢一齊行,一個行完先一個,踏落去除左有少少搖外d木都陷左少少,始終都係日曬雨霖而且佢中間無落釘,所以都係安全d

岩岩係舊曆十三,月光好圓好光,而且個天都幾清,加埋吊車都真係幾靚,但入夜同係山頂d風好大,企定係度都幾涼下,影左陣相就唔停繼續行

未夠6點半已經黑晒,去到另一吊車架,有強光打落黎,配上差唔多全黑既棧道同埋都幾辛苦既上山之路,我地笑見到白光,

再到彌勒山轉向站,依度係中途地方,多左d機器同鐵架,見到有幾隻狗係度,佢地既樣同平時我地見既唔同,雖然都係唐狗但身上好長毛,好似著左mink,不過山頂咁大風咁寒,佢地d毛又長又厚一d都唔出奇

經過依個鐵架就到左彌勒山附近,行緊既係彌勒山郊遊徑,因整左樓梯而且又係有少少向下斜加上潮濕,地面有d,揹重野行真係非常辛苦,佢地一路咀咒依d斜落樓梯係仆街斜外仲話依度係五星,我都真係幾同意佢地既講法,咁既路真係比佢攪到腳抽筋,整乜鬼樓梯丫又唔係整得平過人,又滑又難行,多此一舉,難怪側邊有人行shortcut,可惜太黑我地揀錯左正路行,比佢玩死

行完晒果d仆街斜後一個鐘度就上到昂坪市集,但太黑所以都搵左陣先行到營地方向,見巴士站有好多牛係度休息,d牛都幾大隻,仲有d細牛仔幾得意

之後再行左一段路,9點行到營地,有幾班人係度,我地快速起營煲水煮麵開罐頭,食完隔離都未起好個營,飲咖啡睇下星,但月亮太光d星真係睇唔得多,而且營地非常濕,加埋風坐坐下都幾寒,無咩攪就入營訓覺了,不過附近d人好鬼嘈,一個營就嘈到3點另一個就未天光就開始起身羅水煮早餐,又係嘈死人,我都唔知有無訓左3個鐘,

To Day 02

[15to17/11/13]
Photo Link <<<<<<<<<<<<<

No comments: