15 August 2013

秀茂坪大聖誕

貳零壹貳年拾月壹日-秀茂坪大聖誕

八月十六係大聖誕,因第一次去,而且聽講要8點前到會好d,所以一早就起身搭車去秀茂坪,黎到依個第一次到既地方,因大聖佛堂地址搬過,所以搭的士都搵左一段時間,去到只係一個好細既地方,因係暫時既,而正廟係佢隔離仲未起好,所以環境好迫同比較簡陋,見地方細成咁,應該唔會有我想睇既行刀梯走火炭既儀式了,但聽到有人問今年會唔會做扶乩,老人家笑笑口話會,因我未睇過扶乩,所以就算無行刀梯走火炭都唔算太失望
一早去到岩岩7點,已經有工作人員係度整緊d野,但街坊呢都係我坐左一陣先出現,佢旁邊既神壇師父都係岩岩到,而前少少呢就係另一個裝香既地方同埋一個小型既齊天大聖神像,行入少少有個細office,一邊係有2個大聖像另有1個三太子像(我係後尾先識佢),而神像都好有靈氣,而神台面有d祭品係度,同孟蘭既擺設差唔多,有生果有酒杯等等,而另一邊就有一張小工作台同一d簽文既東西,有d廟既感覺
之後呢7點半左加街坊開始多,但以老人家為主,而後生既多數係陪老人家羅下野執下野咁,我就無所事事咁睇下街坊拜祭,聽到好多人問寫字既兩位老人家係邊,有人答無啦地方咁細,但到8點左右就先兩個老人家到場,仲有個老婆婆幫手,真係加加埋埋二百歲有多,ok,佢地開好台就開始幫人寫野,係街坊們捐錢出黎再寫名既,兩位老人家d字好靚,而寫完名多數會羅旗仔同一包應該係平安包既東西,而亦有人問要羅符,有時會有人帶入office羅有時又會有人答冇,依度d答案都好飄忽下
8點半左右見office位有人羅相機,跟住入就見著住三太子衫既人兄係度做緊儀式,睇唔明聽唔到佢講咩但應該係上身扶乩之類既東西,而且好多時見佢拍晒台咁,好惡咁(後尾聽佢講因三太子係比較惡既,所以係咁既,嗯,佢真係成日指台同鬧人的)
之後呢又到神壇先生念經,d經文同音樂同孟蘭有d唔同,都幾好聽,而先生既經書真係異常簡陋,睇落係手抄本,而且係抄係形形式式唔同style既書仔度有d仲有卡通公仔添,真有趣
到左十點就開始準備另一輪儀式,因office位置太細,所以就出左去出面既細細空間做另一請神上身儀式,開頭三太子話地方太細要所有人落番下面台,但好似無人郁而我呢就行過左另一邊係office位度睇,唔好阻住佢地做野啦,始終估計動作應該都幾大下,咁呢老人家同三太子大哥就開始請神,動作果真大,無幾耐就上左身(我唔識睇亦feel唔到),老人家係大聖爺而三太子大哥當然係三太子啦,有樣野有少少唔同呢就係佢地兩個上身後都好震下,以老人家為甚,而三太子呢我唔知係因割?割到手震定點lu,老人家既長劍好唔利咁割極都無血,要羅個磨刀石出黎磨兩野,但眼見都係冇血,而三太子呢就應該係刀片,手起刀落十下八下已經出血,咁就羅起d符印d血上去,街坊們應該都睇慣而有某d可能第一次睇又或者睇唔慣血腥場面既人就面有難色,而我呢,其實無咩野感覺,之後d符整得7788就見三太子將d血滴落杯水度跟手化符要個唔知係主席定總理既人飲左佢,仲大聲訓話左一輪,當然我仍然係聽唔明佢講咩既,三太子見d水未飲晒,又再鬧個主席要佢飲晒,跟手就完成送走三太子既動作(係沫幾下面之後除左個頭巾),依個時候又有另一個應該都係辨事人既阿叔到左,個樣好面善,唔知係邊度見過,anyway,三太子又再次上身再鬧一輪佢遲到等等完成另一round既動作
d符就開始派比街坊,街坊會添錢落個膠袋度,有人問要食符,我估係有血果d,但又一次好飄忽地有時派有時唔派,跟住呢我落番地面再睇下野又或者同之前係孟蘭識落既人傾下計,有個呢同大會阿姐有兩句,阿姐就比左支旗同符佢,佢就幫我羅埋,有旗有一黃一綠有血既符,阿姐幫我地綠色既摺好話保平安而黃既就要開水飲要黎除病既(到依一刻開始諗緊究竟街坊講既食符係指有血既定係黃色依張要黎飲既呢),阿姐仲提醒符已開光唔可以坐佢又或跨過佢喎,嗯
之後呢就又到神壇先生另一輪頌經,除影相人仲有街坊一堆,人太多所以我無上台位只係係下面睇睇,因已堆滿人,有d想拜神插香燒衣紙既人就得番一條細路行,仲要落番地面既斜路已block,咁我係下面幫老人家上上落落咁,年紀大呀見佢地羅晒野咁好驚佢地跌親
大約11點9左右就有麒麟出場,之前等緊佢時就係門口聽人吹水,知道另一師父係舞麒麟既,仲有講起石籬地藏王誕,亦講起石籬之前既情況亦有講鶴佬既習俗習性同埋原藉等等資料,好有趣,麒麟呢係對面馬路過緊黎我地就行前去睇,今年得一隻聽講之前有五隻而同我地傾計既師父呢都有參與既,今年唔知係地方問題定點得番一隻,麒麟真係好有靈活,個身個頭發得好勁,好難影相,anyway,聽講麒麟會沖到台前賀誕,所以早左行去台附近睇,跑過黎沖上台真有氣勢,睇完一輪麒麟就去左另一邊既廟拜拜,我無跟去不過估可能係將會起好既大聖廟,12點左右就搭的士走人去下一場了

[01/10/12]
Photo Link <<<<<<<<<

No comments: