08 August 2013

薄扶林火龍

貳零壹貳年玖月拾日-薄扶林火龍

之聽左大坑火龍講座,到左中秋果日,我因怕太多人,所以反而走左去睇薄扶林火龍,知道7點開始,唔知點解冇小巴所以就坐巴士去,搭車去到薄扶林村已經封左路,見到條龍已經放左出黎,師父做緊縛尾既動作,龍身同頭都係禾杆草人扎成,而尾縛上類似芭蕉業既東西,而人呢未算太多,之後呢6點半左就開始點香,人亦開始多,依套同大坑有d唔同,佢係比公眾一齊參與既,而我可能係羅大機既關係,有工作人員問我陣間會唔會落瀑布灣,我答佢當然會,佢就比左張攝影組既貼紙比我仲叫我影完d相比番佢地要黎影野,自問影相唔算太好,但既然可以幫到手又可以近距離影相就當然樂意啦
一齊點香既好處係大家都好開心一齊參與,而唔好既係香插得好亂亦比較參次有斜有鬆同埋當我幫手一齊插時好多已經無位,成日比香辣到,我諗緊陣間舞火龍時d香應該會係咁跌出黎,下面既人兄應該會係咁比香辣,anyway,一輪煙到眼都盲既插香儀式完成左,就到拜神點睛既時候,當時亦差唔多7點左右,開始舞龍頭之後就開始舞過去前少少既位置,地方唔算大所以比較難打龍餅(聽到有人話今次警方封少左路,所以好窄),而且又可能無大坑咁專同講究,總係覺得有點柴娃娃既感覺,但大致上好多人都好enjoy同開心,另一種模式既表達,沒有對錯開心享受就可以了,而我因有攝影証就可以比較近咁影龍,但因第一次,真係唔多識影,對唔住比証我既朋友了
舞左一陣就首先行去好有歷史價值同埋係薄扶林村好有地位既李靈仙姐塔拜拜,因薄扶林村實在太窄,又人好多條龍又長所以好迫,我仲比香辣到(所以一早已經著件殘少少既衫黎,哈)之後呢舞番出去再過左對面條橋行左去另一廟拜拜之後就番回村口休息同再插新香
第2round再係封路地段打龍餅再之後就開始入村了,因地方實在窄,都攪左個幾鐘由8點半至成10點先完成,當中火龍入到去會係村民門口拜拜收收利是,好似舞獅咁,而某d村民會用自家香加係龍頭,當中氣氛十分之好眾人亦十分開心,好地道感覺,但因龍頭太大而某d路口太窄,所以成日都kick住要就黎就去退後再前先入到,見舞龍既人兄個個大汗?細汗都幾辛苦下,而村民呢因係中秋,所以就多數係度燒緊野食,見火龍黎左就企晒係門口又或者伸過頭出黎睇熱鬧,開開心心咁其實幾有趣,雖然人多但總有位企下正如我之前所講,比較地道而少了商業味,始終我覺得黎睇既人都係果百零二百人度,有d仲係華富既街坊,差人亦唔算太get involve所以比較岩我
之後呢番回村口休息再補香時我就開始行落瀑布灣(因之前工作人員話我知要係第2round休息時好行落去唔係差人封左路有証都可能落唔到去),so,由馬路一直行,雖然之前去過華富1-2次,仲要落過瀑布灣但因太黑而且未試過由外面行入去,見某天橋有d人企左係度等火龍,所以我就上左去睇下環境又問問人點行,經指點後等左陣火龍就黎了,因唔想走得太後,所以就落番路面同火龍一齊行,好快咁入左華富村,因果part係冇封路,所以大會工作人員同差人都比較緊張,怕d車車親人,雖然人唔算太多但都應該有百幾人掛,火龍經過差館經過消防局都會拜拜,之後呢過左消防局就落斜路過瀑布灣,係條斜路度火龍又再跑,前面既一眾街坊觀眾等等見到條龍沖緊落黎齊聲大叫走呀走跟手一齊跑,情況好攪笑好歡樂
過左依段路就到左落瀑布灣果段,因我有攝影証,差人放行比我落去,但就聽到大會人員同差人講緊可以放幾多人落去,因水漲緊而且果度係海邊所以差人都好緊張咁control人數,隱約聽到只可放50人落去,我唔知實際有幾多人,之後亦冇聽地deal就開始行落海邊,依度明顯整靚左好多,之前記得好窄同比較難行,anyway,好黑但我習慣帶電筒所以還可以,落到去只見幾個差人同埋好少工作人員係度,而同我一樣有証既人只係得5-6個左右,ok,工作人員開始係一個差唔到黑到爆既環境下點香,因地方實在太細我就企埋一邊唔想阻到人,影左一輪相龍就落緊黎,就咁睇成個area大約都係50個以內,而因安全問題,所以參與舞龍既都著晒救生衣,係黑蚊蚊得少量燈光既環境下背脊就反晒光咁
放低左條龍開始掉舊香落海再插新香,聽到差人講原來會掉落海唔知佢果刻係咪諗要比告票呢,哈,之後插上新香後再起鼓舞龍拜拜就落海了,聽講依個龍歸滄海只係回復番一兩年,因華富村管理唔比佢地入村之後可能因一百年慶典問題所以比番佢地入去落海,anyway,我以為只係比龍頭浸浸但原來係要成條落埋海,所有舞龍人士齊齊濕身齊齊行落海,之後條龍係海度圍圈再將龍頭浸落水儀式就完成了,舞龍人士亦一齊潑水好不高興,之後拖番條龍上水因濕左會變得好重所以都幾吃力,當中可能時間已經係十二點而且打鼓比較嘈,有人居然係類似豪宅既地方用激光射落黎,我都真係唔明點解一年只有一次而且係咁少既時間都忍唔到,點解唔心想依個傳統係你唔知投左胎未既時間已經進行緊但就因你加下有錢買左依度起既地方既某一單位就變得唯我獨尊,一丁點容人之量都無,如此思想我都真係唔知講咩好
Anyway,完成左龍歸滄海就見有工作人員抆龍鬚了,原來依度都有依個傳統,咁我見有人羅左一抽,我就問問可唔可以比條我,咁我就有都有份有一條龍鬚了,依個應該係平安之用,我就好似大坑咁用黎整左條手扼,雖然唔係好靚同埋其實太細戴唔上手,但心諗可以掛係屋企門口既,仲有一忽細細既就放銀包好了

ok,完成晒整個儀式就行番去巴士站搭車,而巴士尾班車已經開左,咁岩有van所以就上左過銅鑼灣走人了,一整個薄扶林火龍我覺得比起大坑既無咁講究但勝在與眾同樂開開心心,其實簡簡單單咪幾好,希望可以減少外來其他因素盡量繼續依個有一百年歷史既薄扶林火龍傳統啦

[30/09/12]
Photo Link <<<<<<<<<

No comments: