19 January 2011

尼泊爾 2009-10-24to11-02 - Part.06(29Oct)

尼泊爾(Kathmandu,Pokhara,Poon Hill)

29 oct 2009 Thu Ghorepani,Poon Hill,Tadapani Sunny Day

一早4點起身要到poon hill睇日出,經過琴日既日落及雪山夜景,對poon hill既日出當然有番咁上下既期望啦,著好晒衫帶好頭燈腳架等等用品,就早餐都唔食由guest house出發了,雖然係黑蚊蚊行,但個個都為左睇日出,條山路不知幾熱鬧,但晨早流流訓都未醒加上未食早餐同埋二千幾上三千既山路,雖然有soldierporter陪埋我地上山,但我都行得極為辛苦,中途停左都幾多次先上到山,經過1個鐘度既山路,我地由二千五行到poon hill既三千二米,去到最後一個rest既地方,太陽已經差不多出黎,個天變得紅紅橙橙的,其實都幾靚,但我實在冇咩氣係度影相,所以抖順氣後就上山頂再影番過去好過




上到山頂已人山人海,風一般的大氣溫一般的凍,可能成身行到興恰恰既關係,都冇咩凍既感覺,set好腳架影左幾張相,之後就上高台度以再高既角度睇雪山日出既來臨,上到去亦多人到不得了,好彩係鐵台唔係真係有少少驚個台會比人踩霖,因邊邊已經好多人係度影緊相,好難先搵到個位走入去影雪山,可能因為高同埋個人靜左落黎,所以開始覺得凍凍地,好彩一早準備好手套頭巾,所以還好,但身邊既人不停講好凍好凍,真係覺得帶埋羽絨係明智的,哈

zoom近zoom wide咁影左相後,太陽開始出黎,d日光打落雪山度,感覺不錯,影下video再影下pano就走番落地面,可能夠光既關係腳架其實唔雖要點用都可以影到相,之後幫朋友影多幾張相後就開始走人落山食早餐

番到去guest house,對住個火爐暖左陣就食早餐lu,之後番房執番好d野8點左右就再次出發,但可能因時間不多既關係,我冇做checker既角色就出左門口,之後先知唔小心咁留低左個頭燈,3百幾蚊好貴呀 T_T


之後開始行d比較易既走既平路或落斜路,天氣好到不得了,加上雲岩岩積聚,層次十分之不錯,落到一半又見一個rest area,有支高高既旗掛係度,加上南天白雲雪山,極靚

之後去到一個叫Deurali既地方休息下,食三花腸既時候,見到有個外國人對我地既罐頭腸好有研究,想請佢食但原來佢係丹麥人,三花腸係佢家鄉出品,所以佢冇興趣食但問我地係邊買,哈


之後行過獨木橋再走落山見到滿山黃黃紅紅既樹,好似九寨溝d相咁上下,但當然冇咁多啦,可能時間問題又或者係樹加上氣候不同既關係,我冇去過九寨溝所以情況唔多清楚,之後行到去Saranga River,全部都係人,之後又係一條上山既路,雖然冇咁斜但都頗吃力,後黎去到一間叫Tranquility guest house既地方食lunch,係太陽下訓左個懶懶既小覺,先有lunch食,係食飯途中見到有人放羊,全程咩咩叫,又有兩隻牧羊狗,有隻仲幾靚仔,但佢地唔中意食薯仔只愛吃肉,比左食剩既momo比佢食,再影左幾張相就走lu


係行山既路中不停聽到佢地既咩咩叫,途中sagur仲捉左隻小羊上手,隻羊仔好驚4腳直晒咁,樣子趣怪,但好快就放番低佢因為其他羊怕我地捉佢隻小羊,開始圍我地,我地仲笑隻羊媽媽可能講緊粗口鬧緊我地都唔奇,不過我地唔識聽之嘛,哈

之後大約5點度去到我地住既地方Hotel super view top,去到已經時候唔早,但市面熱鬧,有d人擺下檔賣下野,但因太多人既關係,我地爭d冇房住,好在guide預先留位,所以仲有一個房但有3張床開頭話要同人share,經過一輪抗議後,我地先可以自己住番,但guide同porter都冇房唔知最後佢地訓邊,哈.沖完涼後上左一個小山丘度睇下全景,可惜係太大霧既關係未到日落個雪山已經唔見左,我地坐緊果度原來起緊一間guest house,感覺景觀一流及開揚,起好後一定好生意,但講開原來起間house都唔平,仲係同政府租地唔係自己買地,但做生意既可能支持到既,因大風既關係坐係度都覺凍,但居然比sagar嗌到人搵到d熱飲比我地,望住全景飲熱飲感覺真好

之後落番山,因第2日已經唔雖要趕路,本來想休息下先慢慢食dinner,但依間野既效率異常高,都未夠我地order既時間已經係咁追我地話整好晚餐,凍左好難食,算啦,不過個living room係幾好,仲有炭係台底夠晒暖但關晒窗有d焗,好彩不停有人出出入入,如果唔係中晒毒都似

不過間野既食物一般,有d難食,但個甜品chocolate pudding不錯,係甜到漏左少少

之後又出左去影雪山夜景,依度比Ghorepani既guest house更近個雪山,加上好多星,影出黎算不錯啦,之後十點零鐘就訓lu

Part.07(30Oct-TadaPani,Ghandruk,Kimche,Syauli Bazzar)

<29/10/09>
Photo Link <<<<<<<<<

No comments: