22 July 2012

百年一遇‧攪軌叮叮四環遊

今次卒之參加到電車導賞了,之前一次就係時間唔岩另一次就係爆晒冇位,所以今次一知道有就即時報名
一早10點幾去到石塘咀電車總站,等齊晒人後就行入電車廠,見到架120號,之前做過research,佢係194x年既車,已經行左好多年,係香港現存最古老仲係行駛緊既電車,本身諗住去依個導賞團問下個guide依架車行緊邊條線,仲諗住去搵下佢,原來我地就係坐依架車,真開心

入到車廠(係我地眼見既地方)其實唔算太大,感覺比銅鑼灣舊車廠細(細個時有親戚住正係果度對面既舊樓,真係成日見,但果時唔識影相,冇影落留record)

因電車師父未到,所以就講下石塘咀既由來,應該好多人都知依度係一個好出名既妓院雲集既地方,原來之前一開始係石磺場,之後整整下有個塘咁而且外型似個咀,所以加加埋埋依度就叫石塘咀,本身香港有兩處妓寨,西人既就係吉士笠街(即有稱為紅毛嬌街),佢旁邊既擺花街據稱係因為去幫襯西人妓寨就要帶一支花去,所以就有擺花街既出現,至於華人既就係水坑口街,後尾因填海既關係,就將依度既妓院搬晒去石塘咀

1935年前就出現左最旺盛既塘西風月日子,周邊有好多酒樓戲院等等,習俗亦比較有趣,原來有出一個叫做骨子既報張要黎報導塘西風月既人與事,而有張叫局票既東西,原來係用黎請大妓寨既小姐去酒樓陪食飯,張票係由一種叫豆粉水既小角色帶去大妓寨,收費一蚊,所以之後就有一蚊雞既說法,而二妓寨呢就係平d既地方,多數係係附近既碼頭既咕哩幫襯,所以亦出現左咸濕佬既說法,哈,有趣

上車前講左原來電車路線同之前既有少少唔同,之前係水手館俱樂部既地方(即皇后大道東至軒尼斯道一帶)要彎入去既但後黎拆左層樓就拉直左車軌,即係我地依家行緊既路,再入就係大佛口(即皇后大道東同金鐘道既交界),果時依度掛左一張大佛相,所以d人就叫依度做大佛口,黎到依度就知入左灣仔

後黎電車師父到左,我地可以上車了,120車果真係古舊,車盆仲係用轉果隻轉速器,而且樓梯位有d特別,居然樓梯底有個位係度,坐位呢就全部都係木造而且有藤椅既設計,燈係鎢絲燈,窗框就仲係木邊,依加既已經多數係金屬把手而且冇邊,依種車細個果時好似有坐過但真係好耐冇見過(可能真係少又或者係我唔係香港人,所以坐電車機會少)

開車後第一站講番太平戲院既位置即依加德輔道西東方護老院果個位,導賞show左張賣飛既價錢出黎,有好多唔同既票價,因附近妓院既小姐好中意睇戲,所以有好多唔同既設計又有唔同既消費,都幾有趣,再前少少就係七號差館(即猛鬼差館又即係依家既西區警署)門口有兩支炮係果時係地下掘出黎就擺番係門口

再前少少係海味街,果時叫咸魚街,之後因個名唔好聽所以先改名叫海味街,順手講左南北行既故事,果時香港係轉口港,所以就有ed商行經營運貨同其他進出口業務等等,而且會抽佣2%所以亦叫做九八行,再前少少係三角碼頭,真係聽就聽得多,原來係干諾道西巴士車廠果個位,再前有一間舊式餐廳叫海安咖啡室,即現翠華老細曾打工既地方,見佢門口好似好舊咁,已經有60年,搵日要去食番餐先,再前係四大百貨公司既位置,現只有永安先施另兩間大新同新新已經冇左,果四間公司當時創左不二價依種售賣方式,睇海報好似好熱鬧咁

再之後左郵政總局既地址(即現環球大廈)睇相真係好靚好靚,拆左真可惜,仲有東亞銀行,門口支舊旗桿係一直用緊,怪不知咁古舊感覺,再前就係立法局,美利樓舊址

行前就入左灣仔,經過大佛口去左莊士敦道當時好多既酒樓地方(之前聽飲食個tour聽過,唔講了),再前係灣仔二號警署同救世軍既舊址,再前就係香港殯儀館既舊址,原來當時屍體係由集成隔離球場既樓梯搬落黎行軒尼斯道經天樂里出快活谷,所以出現左天樂里個名

再前係鵝頸橋,木橋近鏡相之前見過,但咁開揚既相真係第一次見,好大好多樹,果時依度係香港八景之一鵝澗榕蔭,真係靚,前少少六福金行果個位,之前有個轉軌架,用人手轉軌入波斯富街但轉自動化後,個台拆左了,再前就係快活谷跑馬地一帶,之前去大靠山tour時聽過又唔再講了

之後轉回頭路,開始講電車歷史,電車由1904年開始,第一代車得一層但有兩款,頭等車有10架二等車有20架,見到頭等車既相,基本上同纜車一樣,guide話係同一類東西,而二等車係冇邊既架所以d人基本上係自出自入自由上落車,好危險咁哈


第二代係1912年,叫做有二層,但其實只係加個鐵架係度,感覺都幾危險下,但樓上係頭等,又係貴d既,雖然冇頂但叫做好風景d掛

第三代係1920年,加左個頂但樓上周圍都係冇窗,落雨時好似渡輪咁拉高帆布咁

1930年第四代,已經有依加d車既雛型,有前後門,前門頭等買飛上樓上,樓梯係一條直上的,後門係下層二等位

1949年係第五代(即我地坐緊既120號車),因戰爭電車由一百廿十架得番十二架,所以係戰後就要再整好多車出黎用,中間講過電車廣告既資料,當時係手畫既,一整架電車主要分左八部份黎賣廣告,當時係手畫既,基本上要2星期先畫好,一賣就最少賣半年,電車先生(即電車會會長Eric)再講左係香港歷史博物館同海洋公園都有兩架舊式電車展覽,亦係第五代既產物,由電車公司送出,而海洋公園果架係同類車既第一型,樓梯係直上既,比歷史博物館或120號車還要舊款

第六代車係1988年,即現時流通行駛既電車,外表同第五代差唔多,不過就將個燈箱放左上車頂等上層後排既人唔洗咁熱(印象中細個真係好似搭過,果個位隻腳唔痴得埋去),而且車底加左裙腳位,等d車聲唔洗咁嘈

2000年出左架千禧電車,基本上係加晒車窗而且係鋁合金製造,但個感覺好核突,成架巴格士咁,而且eric話依架車市民話核突車長話熱死,所以冇人中意最後失敗了,現時應該得幾架仲係度,我就真係未見過

第七代係2011年既車款,都係鋁合金,而且坐椅改左其一中排位置改左,唔係對住坐所以唔用落車時頂住腳好難行,但佢改左lcd燈箱,真係好難睇,遠望都唔知咩車,之前舊式既除左底色顏色唔同代表唔同線之外亦比較易睇,真係追車都方便d(因電車開得慢,所以追車其實好普遍)

睇晒一大埋資料又番到石塘咀車廠,同架120影多左一堆相後就走人

因果度未有地鐵,所以都係搭叮叮落番中環轉地鐵走人,又再坐電車,今次係150號,即第六型車,我地成日坐果d,真係冇留意都唔知同第五代既分別,哈


<22/07/12>
Photo Link <<<<<<<<<<<<<

No comments: