08 July 2012

馬灣

貳零壹貳年柒月壹號 - 馬灣


由青衣搭車到馬灣已經2點半,天氣好好,首先由馬路行入芳園路,落左芳園書室,由芳園書室落一條樓梯就見到海邊,依度係漁民村下面既海邊,仲有都唔既魚排,旁邊有個細沙灘,爬繩落去影左d相,沿石行過少少有人唔知係掘蜆定蠔,訪邊有唔少狗虎視眈眈,問阿姐沿路係咪可以上漁民村,阿姐話係再問多唔多狗,阿姐居然話唔知,行左幾步因冇帶棍諗諗下都係算

行番上路不知不覺入左馬灣舊村,經過馬灣大街,發覺已經十室九空,而且用鐵絲網圍住,亦見好多字話唔知咩比人呃又無良咁,anyway,行前少少就係天后古廟,間廟都幾舊,再前少少就係棚屋同汲水門,環境唔錯,休息左陣問人知唔知壓水石碑係邊又係唔知,所以去左碼頭附近既九龍關,影左少少再行前就搵到壓水石碑,其實冇咩特別但佢附近個亭唔錯,對正西,日落應該唔錯,

再番轉頭由棚屋樓梯行上漁民村,上到去已經冇晒人住,全部已經比鐵絲網圍晒,由窗望入去都幾古老下,有d係舊式板間房,屋既數量唔多,一座有兩至三層,每間屋都唔算太大,係旁邊望番落海,又係先前見過既漁排,有條樓梯應該係落番海邊既

行完漁民村因時間尚早,所以就行去島既另一面,但因唔知咩太陽塔定馬灣公園攪到有d路封左,行左一段先出番芳園路,當中見到馬灣堂同經過田寮村,因太倦所以去飲左杯野,由芳園路行經過海邊,個沙灘彎彎地加埋氣汀九橋都幾靚,而且藍天白雲感覺唔錯,雖然我就黎熱死,行前少少就到天后宮,感覺比舊村既天后古廟新而且冇咩特別,落左沙灘睇左陣就上番馬路再行,兜去碼頭果邊行去好多人既挪亞方舟條路,中途經過馬灣泳灘,好多好多人,不過條青馬橋又唔錯,仲見埋汀九橋添

經珀麗路珀欣路係消防局果邊行番落去馬灣舊村睇日落,汲水門已經好多拍友,睇落個太陽應該比山遮住,行前少少碼頭,好多人釣緊魚,再過番之前去過既亭,又有人釣緊魚,睇左陣都係番碼頭算,休息左陣差唔多7點就日落,望出海都幾開揚,好多大船行黎行去好繁忙咁,日落都幾燈黃雖然見唔到咸蛋王但d光打落海度還算不錯,望番轉頭以為有magic hour點知係冇既

等緊陣已經開始天黑,就係吹下海風放相機係地下影下青馬夜景,攪攪下已經8點,睇番schedule要8點半先有車,但因都有一段少少既路,所以都係走人,行出去真係鬼影都冇隻,但都算叫有街燈,影多左幾張夜景相就行番上珀欣路搭車番荃灣,一日倦到死既行程卒之完左,下一次仲未plan有咩地方影,再諗諗先

Back to Part.01-東涌

<01/07/12>
Photo Link <<<<<<<<<<<<<<<<<

No comments: