25 November 2013

緬甸 2013-01-31to02-16 - Part.06(05Feb)

緬甸

05 Feb 2013 Mon Nyaung Shwe,Taunggyi,Kakku Sunny day

晨早6點起身執野,6點半食早餐,依度既早餐真豐富,有pancake,蛋,面包等等,食完成7點,行左出門口影左幾張相就出發了

車程相當遠,要成2個半鐘,途中見到個日出相當靚,因天氣凍但太陽出所以水面有陣霧氣,好靚,可惜我無叫停低影番幾張相,之後去左東芝(Taunggyi)比低3蚊入場費+5蚊導遊費(kakku指定項目,一定要請guide先入得去),再次出發,因我中意睇舊野同local people,所以先同導遊講叫佢安排一下,係入去kakku既路中,停左陣,見到好多人坐pick-up,真係車都壓扁,但山路都有力行,個engine真好力

途中見好多新起既屋,亦有好多人整緊路(緬甸都係人力為主,整路唔多見機器,搬沙又好攪泥又好都係人海戰術),因依度係東枝(Taunggyi)即shan state(撣邦)首府,問起原來依度開始發展,而新屋多數係中國人既,因為好有錢,而且非常好勤力一日做好多個鐘係緬甸人黎講好神奇,佢地係比較享受生活既一群,有d唔明點解要一日做咁多個鐘咁辛苦,而亦講左緬甸發展會有咩問題,睇黎有d擔心,除左多外來人會引致物價升窮人無錢買野,而且佢地亦怕錢會令本來純樸既文風會改變,睇黎除左我點解要快d黎緬甸外,本地人亦唔係好想發展得咁快

講講下時間未夠9點,所以去左個local market(似係5day market),去到都係好少人係度開檔,問點解咁晏都未開,原來係因d人要係山上羅野黎賣,所以要9點幾10點先多人到坐左係當地茶檔飲下野傾下計等時間過,等左陣見到有牛車到,依度原來除左local market,仲係賣牛既市場,所以我就自己走過去睇,依度唔夠之前一日係Nampan大但有牛賣又幾特別,到左9點9我都差唔多行晒個市場咁濟,當中買左支庶同2個柑,就一路行一路食,本來只想買庶,但阿婆比多兩個柑我本來仲想再比,但我見太多所以無要到,價錢只係1000ks(即唔洗1us),見時間都晏問問導遊點解都係咁少人,原來係因為下禮拜係中國新年所以今禮拜就唔多人出黎,聽司機講東枝比較多中國人而且好有錢,所以d人留番d野新年前賣

見無咩再多人,所以就再出發,途中去左借廁所,見門口有人整緊磚,又睇左陣,係用沙整個型之後放係太陽下晒就可以,聽司機講要100ks一舊,都唔平wor,經過一大段都幾靚既路,睇黎係發展緊,聽guide講起因物價越黎越貴,所以政府開始控制旅館價錢,指明加價不能高於15%,睇黎我係未控制前黎,所以機票又好guest house又好,比上年年尾時貴左3份1,比上年年頭貴左一半有多,我又係唔岩時候黎,唉

去到kakku pagodas(卡古佛塔塔林)真係好多塔,壯觀,入去當然要除鞋,中間係幾好既路行得幾舒服但旁邊又係沙粒路行落好痛,經guide介紹,睇左d比較有特色既塔,再睇左陣就去食野,本想去旁邊既簡陋食店食,但guide講左一堆野,所以算了,去左靚d果間遊客feel既餐廳食,guide介紹左個牛油果沙津非常好食,果然係當造季節,依度望出去算可以望到整個kakku既佛塔,還算不錯,坐左陣就同guide講低約好二個鐘後再見自己就再行入去睇了,依度既感覺同Ywama pagoda類似但比較整潔,佛塔當然多好多(好似有成二千幾個)但好似細個d咁,得少少可以成個人行入佛塔度,每個佛都唔同樣,有企佛坐佛臥佛亦有頭戴皇冠既佛,某d手勢同形態類似泰佛,所以只係睇佛像都睇左好耐,人亦唔算多,去睇左一個池塘仔,可以有塔既倒影,係之前個guide介紹我去睇既,真不錯既影相地點

留番半個鐘時間行出市集睇下野,但得賣本地香草豆類既野多,無咩其他野睇,所以就行番轉頭入多次kakku既小賣店,睇中左件t-shirt,去旅行時其實我只會買t-shirt,而且依度比較少人去,所以就係依度買件啦,而且價錢仲好平,只要2300ks(即2.5us都唔洗)

join番guide就開車走人了,經過大蒜田就停車睇左陣,仲行埋入去睇下佢地點整d大蒜,因導遊屬於Pa-O(巴歐邦)而依度種田既係shan(撣族),所以佢就無跟我入去,我自己行到埋去睇,發覺要用草蓋住防水浸而且要不停咁除雜草,仲同種田既人指手畫腳講左一輪,我首先問佢地可唔可以影相,之後佢地問我去左邊,係咪一個人黎咁上下既野,我show比佢地睇之前影既相同岩岩幫佢地影既相,佢地非常開心,哈

之後睇左陣就走人了,途中去左個pao既村落,睇當地人既民居,入面都幾大,有客廳放左拜神既神台,再入就係飯廳,非常地道,即係下面放柴上面就咁吊住個鐵煲果隻style,見個頂黑晒,問左原來煮飯時整既,佢地話一煮飯就會成間屋都係煙所以慢慢就會黑晒,之後又講左其他既生活又或者問香港既生活等等,之後就再坐車走了,行番去車時,同guide講依個村落睇黎生活唔錯,規劃唔錯,一條條整齊既行人路,旁邊用草黎做籬笆,一齊條村落比人感覺係整齊,舒服而乾淨,guide聽到不以為言但我就覺得pao既村民好懂得享受生活味道

係東枝放低導遊再番到Nyaung Shwe已經差唔多天黑了(一來一回只係車程都要5個鐘)就順手入左瑞揚比亞寺(Shwe Yaung Hwe Kyaung Monastery),因差唔多入黑所以只有我一個遊客,見到小和尚岩岩做緊功課(係窗邊睇到佢地好似好悶咁係度四圍郁,哈)所以開初只係外面睇下野影下相咁,之後放左學就入去睇睇,d窗果然係最特別的,圓型拱型而且個頂仲有彩色玻璃,設計好有特色,但因開始天黑,所以相比較難影,睇左陣就走
之後就番guest house沖涼再出去食飯,去左之前mark低既minmin,再叫多次好味既蒸湖魚同lassie,還不錯,因周圍都係外國人,所以我一個係度食全條蒸魚佢地都望望下,因之前太懶既關係,有2-3日無寫日記,為免唔記得晒,所以一路食一路寫,之後停左電黑蚊蚊我都繼續開頭燈寫,比個外國人問我寫咩咁勤力,哈,同台既係一對法國年輕夫婦,講左幾句,之後黎左對年紀大少少既德國夫婦,又講左兩句就繼續寫我既野,不過真係好少見外國人咁多野講(法國太太),真係唔停咀,少見

食完番去訓了,想第二日一早行番去朝早既湖面睇日出,d霧真係好吸引,所以好早就訓了,嗯

To Part.07 - Nyaung Shwe,Mandalay

[31/01/13 to 16/02/13]
Photo Link <<<<<<<<<<<<<

No comments: