03 December 2013

緬甸 2013-01-31to02-16 - Part.13(12Feb)

緬甸

12 Feb 2013 Mon Monywa(West) Sunny day

約左司機7點出發蒙育瓦西邊睇石窟(Hpo Win Daung Caves),6點半早餐,但太少野食,飲左個咖啡再食多左條蕉就走人,去Caves要一個鐘,無想像中咁凍,去到目的地只係8點幾,司機去左一間鋪度休息下食下野咁,介紹左個fd帶我去睇石窟,見佢英文唔錯就ok啦

首先去左邊睇(Yin Ma Bin Township),入場費3us,d佛好多但又不失美觀,而且擺位不錯,加上牆上既圖好正,由原塊石頭咁樣刻出黎真利害,而且好耐歷史,地下亦有好多雕刻痕跡,可知當時工程浩大,而且一到特定節日,就好多信眾黎依度參拜,仲會係依度留宿,非常熱鬧,聽guide講最舊既係14世紀,之後有16,18,19等等,而且牆上既畫亦好正,guide亦好懂得影相位而且講故事同介紹比我睇既畫真係好精彩,用左成3個鐘先睇晒,佢都話平時d人只係睇一個鐘就走,但見我好有興趣,所以用左好耐時間同慢慢分享不同既石雕同壁畫,特別係壁畫,成個故事咁,好似漫畫一樣,非常靚非常值得睇,當中有d地方係無咩人(而且早),所以比較殘舊,地下亦有好多蝙蝠屎,因係赤腳,所以要盡量避開下,另有d地方亦由guide先行睇睇有無蛇先,所以依個石窟都係由guide帶會好d,走前仲叫我幫佢地影左張相,哈

再用多2us入場費去右邊(Salin Gyi Township),依個係新少少但又係由一舊石頭雕出黎,好似地下城咁,係另一感覺亦不錯,走時經過一個山,司機伸手指住個山頭,原來個山型係一個臥佛,一睇就知係佛既側面,太神奇了,最後去左guide既鋪頭食飯,但好咸所以我食唔晒,當中就寫左少少感想係個guide之前比我睇既記事簿,多數係英國同法國人,仲見有個台灣人,司機話我係佢第二個香港顧客,佢話monywa多數係歐洲人黎,亞洲既比較少(走時見到一架小型既旅遊巴,車上全部係歐洲遊客),計數時食野唔算貴,我亦比埋尾數個guide(food2us+3us),最後問埋地址要寄番相比司機同guide就走了(司機Myint Lwin,guide Aung Min佢地無地址,所以只寫左Monywa Hotel個地址比我),離開時guide同司機講要帶埋我去2分鐘近既cave

去到係小型d既石窟,但都唔錯,不過比Hpo Win Daung Caves更多蝙蝠屎,應該係仲少人黎既地方,睇左陣就離開了,走前同佢係個沙地寫字溝通左一輪巴士票,最後先知有6點車仲叫佢5點半黎車我去巴士站買飛,仲唔肯收我錢,司機叔叔真好人,不過之後諗番起,二條友係個無人既石窟前係咁係沙地寫字,攪笑,最後去埋Shwe ba taung,但無咩特別,之後就走人了

番到去想係old market落,司機問我去唔去埋買聽日既車票可以車埋我去,用左2500ks=20hk買飛再車我去old market附近就say goodbye了,行左個唔知咩寺再行埋old market一陣(出面比入面吸引,而且真係好old,入面好多野都就快爛咁款),番去clock tower前,見到有間叫廣東同鄉會既地方,就行左入去睇,諗住可以講下廣東話點知老人家係講國語既,同佢地打招呼後傾下計,原來依度係教中文既地方,見黑板寫左好多字,仲有個女仔係度做緊功課,講左兩句就繼續我既蹓躂,番到市中心,係忙碌既車路邊有條村落仔,入左去睇幾寧靜,有d細路係度踢波有人掃地,完全同外面係兩個世界另一種感覺,之後買左個牛油果就行番酒店了,沖完涼食埋果就訓左陣,再hea下成9點先出番去,搵左間野食串燒同飲啤酒,同當地人一齊睇下好誇張既印度式警匪片一齊笑下,之後就買左支水番酒店了

開頭第一日係clock tower見d人好忙而且無咩笑容加上我羅住部大相機佢地唔知點解眼神好奇怪,我感覺唔似之前既緬甸反而似係大陸咁,但今日係街市係廟同果條路邊小村又番番之前既緬甸感覺,之前一日以為monywa好唔同但原來仲有親切笑容同曼德勒街市一樣既感覺,整體黎講,係緬甸一同對方有眼神接觸就自自然然會露出笑容,感覺係非常親切,想番起係香港,依度一日我笑住同人打招呼既次數多過我十年係香港既總和,緬甸人實在太友善了

To Part.14 - Monywa, Bagan

[31/01/13 to 16/02/13]
Photo Link <<<<<<<<<<<<<<<

No comments: