06 December 2013

緬甸 2013-01-31to02-16 - Part.16(15Feb)

緬甸

15 Feb 2013 Thu Bagan, Yangon Sunny day

因蒲甘到仰光班機轉左時間,而距離蒲甘機場只係20分鐘路程,所以點都要踩多轉車睇多次日出,去左本身想去睇日出但馬車司機無去而既Shwe Lake Too,5點出門口用左20min就踩到左目的地,但因天黑個入口都幾難搵,好彩之前一日已mark定gps所以都ok唔係有排搵

經過黑媽媽既寺廟行上條非常窄既樓梯上到平台已有2pair人係度,個位置好細只可企到十幾廿人,我首先爬上去第二層但因太窄放唔到腳架,所以落左一層個入口平台仔度set好腳架,依度個view無瑞杉多佛塔(SHWE SAN DAW即前一日日出地方)咁好,無咩前景,而且我支鏡唔夠長,所以更一般,反而唔係向東既旁邊個景仲好少少,可惜太陽唔係果邊出,等到六點幾太陽卒之出來了,好圓(終於無雲遮了),但都係果個問題,支鏡唔夠長,無幾耐個天就有好多熱汽球,變左另一個景觀,睇多陣就執野走人了

番到酒店7點半,還左單車後就去左食早餐,食完8點準時出機場,好快就到左,個機場都幾新淨下,好彩今次無delay,有時間係仰光玩番半日,太好了


去到仰光11點幾,本來想問機場info center有關circuit train咩時間同係機場個站買飛得唔得,點知內陸機場無info center,算了,去酒店放低d野再睇下點先,出門見有司機,一開價9000ks,傻咩,我還7000開頭唔得後尾又話得司機又話要8000因會traffic jam喎,唉算了,比佢地煩死,就8000ks啦,上左車又係熱死人既的士,去到YMCA12點幾,放低野就快手出去火車站搭車,睇過gps段路行過去係20min,但就熱到死

食完地mou檔行左20min就到仰光中央車站,之前經過路邊見到好多唔同樣既巴士,細細架咁幾得意(巴士多數係日本二手車,所以好多時見到日文字),而經過住宅區就見有好多一條條繩搏住個袋由樓上吊落街,似係用黎買野方便d,幾有特色,anyway,到左車站就用1US買ticket,有時間就同counter傾下計,睇左地圖有機場附近既站(Mingala Don),問左原來都可以係果邊果車票出市區,但一個鐘先一架車而且車程唔知幾耐,加上機場到仰光都只係1/3路程,所以都係出市區搭晒3個鐘車好d(話晒circuit唔通1/3就落車又或者坐完一圈3個鐘後再係機場搭車出市區咩),我搭2點25分車(中央車站尾班車),因唔一定會同一月台,站長有車時叫我過對面月台,即就咁行火車軌過去對面,都真係好耐無試過

車位唔係前而係橫排(即電車下層咁樣),同我想像中唔同,我唔理咁多就除左隻鞋先坐低(緬甸人九成以上平日都係著拖鞋周圍走),架車其實都唔算太慢(之前講同踩單車快過佢),同曼德勒過早緬果架差唔多,由十幾公里到三十公里左右,特別係當停站同開車時好慢,d人基本上自上自落,賣野既人由一卡車跳落再跳番上另一卡車,都幾有趣,而停車時基本上又唔算係停,大部份站係一停就響笛,停左都唔知有無2秒架車就開,我都學下佢地跳車卡,最後係後少少既卡停低坐定,查票員全程只係見左兩次,我懷疑如果唔查既係無人會買票既,可能下午係買食送時間,有d站有街市好熱鬧,而且有個好似批發市場既地方好多人搬野上車,由門口同埋窗口入(有d乘客見到係自己附近有貨隊上黎又會幫手一齊上貨,好鬼守望相助),攪到成車滿晒貨,幾個站後又會趕落貨,首先有人跳落車,跟手有人係火車度推d貨落月台,但因架車基本上係唔停的,所以就會留低一條貨路,攪到個月台一堆二堆生果貨物,情景非常有趣,而且見到火車上有d告示,有英緬文,係叫d人善待遊客,而佢地真係會對遊客好好,例如會比讓窗口位比遊客(雖然眼見我坐果班車得4-5個遊客),又會好有笑容等等,總之感覺就非常親切

另外係火車度既3個鐘基本上係唔會怕肚餓同口渴,好多小販托住d野食跳上跳落,而且有人賣凍水,雖然個杯呢係唔多洗,但如果我無水都會買黎飲飲,好似好清涼咁,而我呢就買左支雪條(50ks=4毫港紙,要好快食,溶得好勁),另外仲食左支粟米,而佢地既粟米仲要好鬼大支,好飽,都係100ks(8毫港紙),而且仲見有炸野,鵪春蛋,蘋果,橙,連糖水都有得賣,利害,但又因為太多野食同開窗既關係,d人隨手就飛野出火車,火車軌沿途都幾多一堆堆垃圾,對比於現代化既梗窗火車,舊式既有好有唔好啦

坐到5點半先番到仰光火車站,時間都差唔多日落,本身諗住行下昂山體育館(aung san stadium),以為係街車又或者市集,但原來真係一個體育館,無野睇,之後去左超市買人地話好食既榴槤雪榚,食落味道同香港既無咩分別,而且基本上一打開就已經溶,好彩無肚痛,見到附近既人好似已經收工,係條街度踢緊毽,好似好開心咁,哈,本來想去行37&38舊街,但已經天黑,算了,搵野食好過,去左車站附近既茶館食左一碟好似印度既簿餅加緬甸既食送,都幾好味但就好油好油,食到成手係油,食完又再亂行,去左好似深水土步黃金既地方,而且好多舊書賣,封面十分吸引,睇落係一d恐怖書,最衰係緬甸文如果唔係都買番幾本,行前少少就見人係度打緊類似康樂棋既東西,不過係用手彈而唔係用棍打,又有一d唔知係咩棋既東西,睇左陣行行下就到左好多野食既地灘,而且好多生果賣,但我太飽都係番酒店沖個涼先,熱死倦死

休息到9點幾先出去,好多鋪都收哂,食左檔雞比抄麵既地灘,都幾好味,但隻雞比呢d肉少得可憐,食完番去執野訓覺,第二朝5點半出機場了

To Part.17 - 仰光,曼谷,香港

[31/01/13 to 16/02/13]
Photo Link <<<<<<<<<<<<<<<

No comments: