05 December 2013

緬甸 2013-01-31to02-16 - Part.15(14Feb)

緬甸

14 Feb 2013 Wed Bagan Sunny day

因房好近馬路同大堂,所以好早就嘈醒左,見4點幾就起身擦牙出去睇下馬車會唔會到左,點知都係未見,見其他人係咁出發我架馬車都未黎,都唔知約佢5點半係咪太晏,卒之司機準時到左,架馬車算細但都算幾舒服,但坐2人應該會辛苦d

未天光都幾凍下,想去Shwe Lake Too睇但佢都唔知有無聽就車左去較遠既最多人去睇日出既瑞杉多佛塔(SHWE SAN DAW Pagoda),好彩人未算太多,我仲有位落腳架,但又係雲多,睇唔到日出,但成個天紅晒還可,算好過無啦,睇完日出就番酒店攪好機票再訓左陣,十點再出發

先去瑞西貢佛塔(Shwezigon Pagoda),可能係遊客指定地方,d商販好似迫人買野咁,我唔係咁中意,再去本身想睇日出既Shwe Lake Too,樓梯比較斜而且窄,爬上爬落幾過癮,而且景觀唔錯,望得幾遠,睇左陣再去下一個既悉隆敏羅寺(Htilominlo temple)同烏帕利寺(Upali Thein),前者石雕多而後者壁畫精美但唔比影相,感覺同Monywa cave同一類,最後去埋瑞古意塔(Shwegugyi temple)同達賓紐寺(Thatbyinnyu Phaya)就去食飯了

可以食西式又可以食緬式,我揀左緬,坐到入去所食既野係無得揀,但都係緬甸菜既特色,好多一碟碟,味道還算不錯

下畫再行塔,先去摩訶菩提寺(Mahabodhi Paya),入面無咩特別但側邊既牆雕刻唔錯,有d似柬埔寨既圖像,再去Bupaya pagoda,依度可以望到伊洛瓦底江河(Ayeyarwady),睇左陣就去喬多波陵塔(Gaw-Daw Palin Phaya),米內良塔(Mi Nyein Gon),狄瑪揚義佛塔(Dhammayangyi Temple)依個係我最想去既塔,果真比較特別,入面比較原汁原味(有d地下仲有好多蝙蝠屎)而且宏偉,走廊既形狀不錯加上陽光幾靚,至於其他既寺好一般,而且壁畫我係Monywa己睇好多,所以更加興趣一般,下畫既蒲甘好熱,而且馬車搖下搖下咁我好想訓覺,如果踩車都幾辛苦,咪攪我

日落前再去埋蘇拉瑪尼佛塔(Sulamani Pahto),依度都好多壁畫睇,睇左陣就去睇日落,本來我想去Pyathada Paya但司機話人多去另一個都好靚既,去到原來又係Buledi,所以再一次係度睇日落,但見天都係有雲唔樂觀,果然又係睇唔到成個太陽,激氣

番到酒店找埋馬車數就入房,見有番電就叉下相機電,但因無晒錢所以又要出番去唱多50蚊美金食飯搭車同最後一日仰光既使費,好彩仲唱到,最後攪掂晒係酒店對面求其食就算,要食番d平野先得,舊蒲甘果邊食野實在太貴,番到去坐左陣,又無電,真係有冷氣都無鬼用

To Part.16 - Bagan,Yangon

[31/01/13 to 16/02/13]
Photo Link <<<<<<<<<<<<<<

No comments: