play list

25 April 2011

鹿頸-鎖羅盆-荔枝窩-三椏涌camp


鹿頸>鳳坑>榕樹凹>鎖羅盆>荔枝窩>三椏村>三椏涌>上下苗田>九手旦租>烏蛟騰

因天雨及雷暴警告關係一度想取消,但一早未見有狂風暴雨所以研究過後我地照舊9點半到粉嶺集合

經過鳳坑一地都係蠔殼,多到比d海浪沖埋晒一邊,可想而知真係多得幾緊要

到左谷埔村附近既松記本來想食蠔,但得番d珍珠蠔,仲要羅黎整蠔餅,所以冇食到就走人了,之後經榕樹凹走左入榕樹凹村,依段路因鎖羅盆已經封左,所以一路都見唔到人行,而且仲生左好多蜘蛛網,去到榕樹凹村,又係廢村一條,但我地出左去海邊睇睇,環境不錯,仲對到正鹽田港,所以就順手食埋lunch,之後無聊既關係,仲走埋出海邊睇下有冇蜆之類既東西,點知比佢地發現左原來有蠔,拆左隻出黎仲好肥下,所以就開始左執蠔拆蠔煮蠔大行動,我見真係幾肥美下所以就生食左一隻不過真係好咸,都係煮左好食d,行動直至2點幾3點,佢地爭d唔願走要係度扎埋營咁濟,但之後我地繼續番本身既行程去到鎖羅盆

到左鎖羅盆並冇想像中既鬼異,相反仲有好多樹比人斬晒攪到黃泥處處,破屋亦同其他地方冇咩唔同,只太多蚊同趕路既關係,所以我地冇咩逗留就快速走人,去到路口見到個地盤,仲有水喉,所以就問左d地盤工人想羅羅水煮埋先走人,後尾我地考慮緊要繼續行走係附近扎營算,因已差不多天黑,而且我又好想睇荔枝窩d古樹,黑蚊蚊咁經過好似浪費左個行程,而且又有水源,地盤工仲好好人咁同我地講如果落雨叫我地入去間屋度訓添,不過就提我地好多蚊,所以後黎我地出左堤壩度扎營,點知夜晚都係比蚊/蠓仔咬死,所以我著晒襪,風褸笠埋頂帽避開d蚊&蠓仔,蠓仔真係唔怕蚊香仲要一咬就痕成個禮拜,太可怕了,後尾食過飯後就快快訓覺,果時都未夠10點,真係最早訓覺既一次camp了,本來以為除左我地中途比水警照後早早訓覺就完事,點知我可能因下晝食左6-7隻蠔後頂住左個胃,攪到12點幾要出營嘔,就係依度出左事,係我嘔既途中比蠓仔狂咬,卒之就咬到腳有7x幾粒,手3x幾粒,痕死我o剌今次,為左食幾隻蠔依下我真係慘,下次都係咪理咁多,如果多蚊既地方even出一出去小解都係做足安全措施算了

丫,爭d唔記得講我地岩岩到鎖羅盆時見左1男帶2女影相,女既仲作cos-player打扮,果時見佢地露出兩條大腿日落時間走入鎖羅盆,應該都知比蚊咬死,開頭以為佢地影完相後會出番黎原路走or租左船出番去,點知一直都唔見人,如果佢地跟我地原路走應該會好有問題,因一來已天黑,就算唔比蚊咬死佢地既裝扮入山都會好凍,2來佢地就咁行都好困難,因岩岩落完雨,成地都係泥,我地行山裝日頭有d路都唔好行,仲要係cosplay既裝扮上山一定好冼好難行,仲要唔知有冇水有冇電筒而且出番去都要3個鐘去到村口亦冇van仔,唔知佢地點攪,但已經太遲我地真係幫佢唔到了,果刻我地只好祝佢好運,雖然預知就算冇事佢地應該都會比d蚊/蠓仔咬到睇醫生了

因為係壩度訓,第二朝一早起身唔想阻到人,我地食左早餐後9點零就起行,去到荔枝窩睇過古樹後就食豆花同埋沙薑雞,價錢及質數尚可,同村民講開係鎖羅盆扎營,佢地就講果度好猛鬼,仲講左我地訓果條堤壩原來6-70年代因偷渡關係,好多人死左收唔切,條壩就做左臨時放屍地,哈,我地不以為以果時我仲心諗猛唔猛鬼我唔知,我只知鎖羅盆d蚊&蠓仔好猛就真

後尾坐左陣就走人,雖然某d古樹地方已經比政府欄起晒入唔到去睇,但出荔枝窩條小河就好靚,好有一種原始感覺,d魚仲好大條,揀左日頭先行荔枝窩係好岩的

之後經三椏村出三椏涌,上下苗田,九手旦租出烏蛟騰,因之前出黃竹角咀已經行過所以冇咩特別,前前後後兩日用左6個鐘左右行晒成段路,食過蠔睇過一二處我地想睇既地方,幾ok了

下年應該會再plan去鳳坑執蠔,因為實在太多太肥了,嗯

<15&16/05/10>
Photo Link <<<<<<<<<<<

No comments: