一早4點幾起身confirm收好晒d野就出門口,落到樓下reception就見關晒燈仲有人訓左係度,前一日已通知過佢地我會5點check out,所以就叫醒左個人幫我check out,佢都其實冇咩做過只係收左我條鎖匙同22蚊就再訓過,其實佢可以好似外國果d hostel咁一早收左錢再叫人掉條匙落箱咪算囉,可能要開閘所以要搵人係度掛,真係唔知佢地了
出到去天當然未光,人唔算多但街都叫有d車,係一檔著住學生衫賣緊野既檔口買左個包同咖啡就搵的士搭,可能人真係未訓醒,搵到岩既的士公司因身得美金,所以就問佢幾錢去機場,開頭佢話跟錶但我居然唔理佢再問多次幾多美金,佢隨口話10蚊我見貴就問隔離果架,問完先見佢唔係我要搭既的士公司而且又有一兩個電單車人埋黎係咁煩,所以都係上番我要搭既Vina Taxi,可能其中一個電單車人聽到要10蚊去機場我又ok,我入左車佢仲係度拉住個車門係咁講問我係咪10蚊,我當然唔理佢啦,佢就煩個司機想要錢,個司機唔知同佢up乜又攪左陣,我爭d想落車搭過第2架,最後個司機比左錢佢佢先願放開手,開車到機場見個錶只係10萬幾蚊,咁即係5蚊美金就ok,果刻我先醒起做咩唔跟錶我比美金佢除番越南錢咪得囉,真係傻左入到機場counter都未開,除左比貴左的士錢外仲唔見鬼埋個太陽眼鏡,岩岩買都唔夠一個月最大問題係去到吳哥應該會曬盲,shit
check in完飲左杯咖啡就差唔多上機,去到原來係縲旋掌飛機,怪不知個number咁前啦,不過依隻雖然係縲旋掌但就比我係nepal既大同靚,都叫做有個飛機餐食下
去到siem reap已經10點,個機場比較夏日感覺,搭tuktuk driver安排既車去到gh"Oral D Angkor"10.2一日包早餐,訂時除左平仲諗住近old market方便d但原來都幾入下,好似鄉村既感覺,門口既餐廳簡單但舒服,可能我住4日佢地比左2樓最入面間房比我,太好了可以用個欄杆用黎曬衫曬褲入到房都幾大,放低野就出發去第一站local market,果度係非常地道既market,連英文名都冇但就近national rd 6,所以好遠,本身諗住自己搭tuktuk去點知個tuktuk driver話包我一日(通過電話知本身個司機唔得閑,佢朋友黎車我話聽日先會接我去angkor wat,68蚊包大小吳哥同Beng Mealea,rolous group3日,加下仲包埋第一日free,唔同佢講價果然服務好d),咁我當然就唔會拒絕
用左十幾分鐘車程去到果個local market,果然沙塵滾滾非常熱鬧,可能冇咁出名所以完全唔見遊客,去到首先係出面行,出面既街市都好大下,但個地下就非常爛同濕,周圍係賣魚賣肉賣生果咁,而且個方法都係比較地道就咁放係度賣,d魚冰都冇粒咁熱放係度都唔知會唔會變壞而且所以好多烏蠅,行行下就會見d魚跳左落地係度地下彈彈下咁,仲有耐唔使見d人托住d野賣幾特別,行入少少見到有檔茶檔咁我就坐低要左杯凍咖啡,都要講左幾次佢地先知我嗌咩,而且佢地對我非常好奇而我就同佢地笑下又隨手羅左佢地放台賣既包要黎食,雖然周圍又沙又塵又烏蠅又垃圾咁不過我都唔理咁多照食照飲,哈,比低一蚊美金(睇過1美金=4萬1柬紙)佢地找番d柬埔寨錢比我,幾多唔記得了不過我知佢地收美金所以都冇唱錢只係係香港唱定d一蚊同五蚊細錢要黎用,相當方便
之後入左market入面睇,都好大又係濕晒成地垃圾咁但都算整齊,我覺得街市d人疊野真係有一手,排得好靚,佢地d肉例如羊就成隻切開晒就咁放係度滴晒血水咁睇落好血腥但夠晒raw,哈
因個太陽太曬而且隻腳可能行得太多所以有水pop,所以就係依個地道既街市買下野感覺上比較平d,買左藥水膠布(一時唔記得英文點講畫比佢睇既,哈)仲有買左暈浪丸(係暹粒過金邊諗住搭船睇風景要成6個鐘所以諗起要買藥)依個藥房既老細識講英文所以同佢吹左陣,咁岩佢地食飯我就睇下,佢地係坐係地下食中間有盤野旁邊又有幾盤細既,見佢地多菜問下佢,佢話食菜有益仲問我一唔一齊食,但我之前係依個街市食左好多野又炭燒夾餅又唔知炸咩條又炭燒香蕉仲有冰凍庶粒(依個好好食消暑解渴)實在太飽了,唔係我真係會坐低一齊食感受下地道風味,哈,丫仲有買左帽同太陽油,之前唔記得帶,我咁唔怕曬既人去到siem reap都真係頂唔順佢個大太陽d汗係咁流已唔理由佢流,佢地個冬天都咁熱(30度以上)夏天點去仲要吳哥咁多戶外,想像不能
行左2個幾鐘買晒野就出發去下一站post office,gps搵唔到所以叫司機車我去,佢係siem reap river隔離,一整排樹加上條河雖然d水黃黃地但好乾淨同埋個感覺好寧靜,怪不知有人坐係度休息,去左個post office,冇咩特別而後面又整緊所以冇咩睇影左d相就走叫driver車我番old market就可以了,諗住自己行下
去到old market(Psar Chaa)同bar street差唔多2點,個太陽就黎熱死我,入左去街市睇左陣,佢唔夠之前個market大而且多游客但都其實好大下,行兩行已經頭暈分唔到方向好快就走番出黎諗住第2朝早6點去睇下個熱鬧場面,之後係咁易行下bar street就想番gh,太熱了想沖過涼等太陽落山先再出黎行過,由old market行番gh原來都好死遠,中間經過center market但知道好遊客既地方冇咩特別所以都冇諗住入去睇,行下行下一方面以為自己兜錯路一方面就熱到暈低時卒之搵左間士多咁上下既東西坐下買下野飲,雖然出面馬路大大個太陽又沙塵滾滾但坐係度飲下依度評價幾好既angkor beer都幾唔錯,丫仲見佢地d電單車入油係好簡陋,係士多門口放左一樽樽酒樽既東西開頭唔知係咩後尾見有人停車原來係要黎入油既,怪不知咁多酒樽放係度入面d色又唔多似酒啦,都幾過癮
行到番gh見有少少肚餓就係佢附近搵左間野食(佢隔離係一間類似戲院既東西好多椅但就係用電視播野既唔知係睇碟定要黎睇電視),雖然好地道好簡陋仲有d烏蠅飛飛下但我都唔理嗌左個面食,果度有個小妹妹好好奇咁望住我,我就同佢笑下咁之後就除左對鞋同襪赤腳咁食野,佢見我羅住罐啤酒就比左d冰我,咁我就當然唔客氣要黎用啦理得佢會唔會肚痛啦啤酒夠凍先好飲,佢d麵都幾好食而且老闆娘都算識講幾句英文問我係邊度住又問我邊度黎,我答完佢之後佢話間野多香港人住喎我真係唔知都唔多見過其他住客,anyway食完晒走人時實在太熱我唔想再著番濕晒既襪同熱辣辣既鞋,所以就赤腳咁羅住對鞋行番gh,攪到個老闆娘問我有冇事,我只答佢好熱,哈
沖完涼(發覺成個人曬到紅晒)洗完衫同褲掛好晒後就睇下相見眼訓仲濕住頭咁都訓左陣,諗起可以去河邊睇下日落又或者去咩咩傳統織物研究所(IKTT)睇,所以5點零就出去,行過見到差唔多黃昏個太陽打埋d樹度係河面反映好靚,行前少少又見d比較窮既木屋都係倒影唔錯,見到個太陽落緊山本來想叫車去tonle sap lake睇日落但睇gps離日落都唔夠15分鐘,去到都落左啦所以都係去織物研究所算,其實果度都幾入去到條街唔算多人多車但又未至於太靜去到見黑晒咁原來已經close左,又話至7點既,唉
行番出去中心已經係magic hour再行下搵野食好了,本來諗住去食一間叫socheata既khmer food,但地址唔清楚(見人講間野係冷巷好易行過籠)even mark左係gps行左好多個圈都搵唔到,算了第日問tuktuk driver知唔知間野係邊好了,咁就去左soup dragon食柬式土鍋,一連兩晚打邊爐間野都幾靚下面係bar我問佢有冇野食佢話有先上左樓上,我揀左係露台地方食,中意可以望下野同埋涼少少,個鍋有蛋有牛肉有腐皮咁加上伙記幫我整既辣汁都幾好食,個waiter可能估我唔識食幫我整攪左一大輪有得食整個感覺係比越式好食,個伙記仲問我係咪日本人我答佢唔係再問佢好多日本人黎食咩佢話係,我眼見都有1-2台日本人可能係地球步方依本書既關係掛不過我記得上網都有人提過依間野食土鍋所以就黎左食,價錢唔平成11.5加埋支Cambodia beer(1.5)都真係幾貴,一個人食ed野就冇辦法有得平,另係食果時唔小心比個鍋熱親本來諗住冇咩野點知食完就知痛,問伙記羅藥諗住擦2野依間食火鍋既有湯火膏應該係平常既東西,埋左單等左陣佢先羅支膏黎,原來係新買既我仲問佢幾錢點知佢話由佢,擦左真係冇咁痛不過都唔知會唔會起水pop,算了由佢
見時間尚早行左陣夜市都叫做有d野食賣下又見有一度好熱烈好多人食野既地方但都幾遊客feel應該唔平再行前少少見到night market,有旅遊巴而且知係賣手信既地方所以完全冇興趣再行番bar street有間門口有台望落幾舒服既bar坐低嗌左個fruit mix(2.5)係甜少少但都唔錯,坐坐下望下d waiter同入面既格局清一色男人,感覺可能係gay bar怪不知坐我隔離果3條友講野咁gay啦,不過我當然唔理咁多繼續飲我既野睇我既街同相
坐多陣就要番gh,因條路實在遠同埋行左幾日真係有d倦所以就想叫架電單車番去,點知電單車唔多就搵左架tuktuk(我當然睇過個司機樣先坐)點知條友唔知間野係邊我話係gas station度佢都唔識,另一個就睇左張card片一陣話知點去,我想講我都識路但唔想行咋,問價要2蚊我話要平d最後1.5交易,番到去check左陣email(平時去旅行唔會上網但因要check其他gh既info所以先睇)問埋幾點有早餐食就上房,依度果然夠乾燥d衫乾晒係條褲仲未乾可能成4點先掛又摟得唔夠乾掛,不過又唔係等住著所以由佢係出面算,沖多次涼準備好晒第日用既野11點未夠就上床訓,太曬個人真係好倦
<25/12/11to04/01/12>
Photo Link <<<<<<<<<<<<<<<
No comments:
Post a Comment