4點幾起身到angkor wat睇日出,因天未光既關係,d風吹埋黎都幾涼下,去到吳哥時人唔算多,可以係荷花池企到第一排仲可以放到窄腳架,唔知係因太黑既關係定係d人心急,眼見已有兩個人跌左落水,相機同個身都濕晒,我呢就因只可開到窄腳架所以乾脆坐係地下算了,其實我都驚比後面d人迫落水,哈
等到5點半左右開始有d起色,但太多雲最後都睇唔到整個太陽,但d雲就真係好靚好似比火燒著左咁,不錯(又係現場睇d色靚好多,不過影唔到,我見咁就拍左movie但之後唔小心delete左,唉)
因唔番酒店既關係,所以就經東門直接去第2站Preah Khan(聖劍寺),丫,其實吳哥出面既護城河都幾靚,相當寧靜而且倒影分明,而東門就比南門原始,好多爛左既石雕都冇專登整番,而對出既河流亦相當優靜
去到聖劍寺都只係7點幾左右,佢既設計同之前果d完全唔同,人又少d睇得自在,其實佢都算幾大,不知不覺都行左成個鐘,最特別係一座2層高既建築物同埋舞者平台既跳舞浮雕,,加埋d陽光好靚,依間廟既石雕都算保存得唔錯,但因係佛教,好多石像既頭已經比印度教徒整爛,加上某d破落又或者崩塌既地方,整個感覺又變得寧靜而和睦,感覺舒服
再到左附近既Neak Pean(涅槃宮),行過一條係水上面既長棧道就見到一個好細既廟而且唔知咩原因唔比入只可以遠睇,佢隻馬造型都幾得意但入唔到去睇有d可惜
去到Ta Som(達松寺)雖然細間但d女神造型各個都不同,好靚,出門見有竹葉烤香蕉賣,本來想買黎食點知driver嗌住我,原來佢買左一條比我食,雖然出面好多油同痴立立咁但原來入面好好食,好似糯米咁有少少痴口,不錯
再到East Mebon(東美朋寺),又係唔同造型既寺,好多個塔又獅子又大象加上藍天不錯
去到Banteay Srei(女皇宮)雖然未夠11點,但天氣已經非常之熱,食過driver買比我既palm sugar同埋飲過路經單車小販賣既palm juicy(1千柬紙)非常清涼解渴,好味,而女皇宮主要係睇門上既浮雕,但咁岩撞到幾個團,所以好多人同好嘈,但就偷聽左d人地既講解又睇下書咁,有d故仔都幾有趣
咁岩撞正係正午時間上Kbal Spean(高布斯濱水底浮雕)其實都幾辛苦,依度其實唔算太好行,有d地方要爬大石而且有d地方好曬雖然有d入林但行行下都要成40分鐘先上到去,好彩有夠水同埋有帶pole(因腳之前整親好易拗柴,所以爬高又爬低既吳哥其實我都有d擔心),河上石浮雕有趣而特別,而且行過一個大瀑布有人玩水幾清涼(有個法國鬼妹好鬼活潑,又爬樹又周圍跳,睇見佢真開心)
落番山已經兩點幾好肚餓,driver帶我去食飯又係3蚊攪掂,嗌過野食去完廁所除埋對鞋就休息一下,依間野有位小朋友好靚女,後尾坐定左睇見原來佢阿媽都好靚而且相當年輕,怪不知個女咁靚啦,但靚還靚野食就好唔得,個菠蘿牛肉咸死人,好彩我食野好求其所以都係食埋佢
用左一個鐘去到Banteay Somre(班提色瑪寺),一入去就見人整緊野,以為係咩工程之類入到去原來係有人攪婚宴,門口有廚師waiter等等,入面其實都唔算多野睇,本身應該有水係度但就乾晒不過就有一條條巷咁我諗要黎行禮都幾唔錯,但原來可以租ed古蹟黎用我真係有d好奇
最後到左Pre-Rup(變身塔)睇日落,依個係本身冇既行程但就知佢睇日落唔錯,睇書講到幾靜幾少人咁,但上到去人山人海,好多tour係度(後尾問driver,原來係因巴肯山限人數所以d團可能改左黎食度睇),向西邊方向我已經去唔到第一層,只可以係第2層攝左個位睇,所以有d比樹遮而且多雲睇唔晒成個太陽但d光柱好靚,走時經過一個湖,應該好近我另加要求day3睇日出既Sras Srang(皇家浴池),magic hour加倒影好靚
番到siem reap市區已經7點,叫driver車我番Socheata食晚飯,坐低無耐就見番之前一晚認錯人果位女仕,佢見我又係一個人所以叫我同佢一齊食飯傾下計,我嗌左frog amok同埋lotus root,好食,同果位女士講開原來佢係美國人(華人樣但唔識講中文),佢係新加波探完仔後就自己一個去旅行,係泰國入境仲講左group taxi一架車坐9個乘客加行李既經歷比我聽,大家又講下旅行既經歷其他地方既睇法等等,所以一個人去旅行真係好多機會同人傾計,其實都幾得意,但因第日又要睇日出所以8點左右食完就走人,又係黑媽媽倦到死行番去,唉
<25/12/11to04/01/12>
Photo Link <<<<<<<<<<<<<<<<<
No comments:
Post a Comment