20 January 2012

越南,柬埔寨 2011-12-25to2012-01-04 - Part.08(01Jan)



之前約左船公司6點半係gh度等車出發去碼頭搭船由siem reap去Phnom Penh(金邊),一早食過野checkout完就等車黎,之前已經覺得間travel agency好求其,睇錶成6點半都未出現,之前checkout時就已經問過gh d人去碼頭幾遠,佢又係up左個距離比我(可能地方大既就成日都係講公里,問到明幾多min都係答得好玄,可能車速對佢地唔係一個問題,所以問要搭幾耐車永遠都答我唔到又或者個range闊到半個鐘至一個鐘既差距 -_-),所以佢6點搭7都未見影我就諗住自己坐車去算(加上7點船6點半先黎接我始終都係不安),點知出左去唔見車,要再等多陣先有,上車叫佢去碼頭指埋個名比埋個地圖都係唔係好知係邊,佢幫手打去碼頭又打去船公司(碼頭唔理佢船公司又話有車黎緊接),但我都係唔多安心叫佢車我去啦,佢就開車行前一小段路,指指個travel agency佢話不如我係度等(名一樣,亦已見有人係度掃緊地,睇個司機都唔識路,所以都係直接搵agency問算),問幾錢,佢笑笑口話我話,我見咁近其實好難比錢但見佢打電話幫我問依個問果個,所以都係比左2蚊佢

之後入左間野度,個老闆岩岩番,同佢講冇車黎接我,就幫我check簿,我話唔係依間鋪係第2間鋪訂,就問我羅張ticket睇,原來唔同公司(前兩個一樣後尾第3隻字唔一樣-_-),佢話間公司會去接我,叫我番gh等,唔係人地點搵你,我講行番去都有段路而且又唔知到唔到,所以想佢幫我,佢話可以幫我嗌車但要10蚊,我問motocycle幾多,佢話5蚊,仲幫我call車,打緊電話時我睇個鐘已經7點,我同佢講7點船會唔會去到都開左船,佢話可以打去hold住架船(心諗怪不知得係金邊個gh問我係咪sure7點船因之前佢接過一個7點船但9點先開,d船原來係咁delay),之後老闆叫我安心等下架車好快到,等左陣佢又走埋黎同我講叫公司車車埋我,不過都係5蚊,我講冇問題,佢就call左架車黎

黎到既係van仔,車上已經有幾個人,老闆同司機up左幾句野我就上車,司機幫我放好行李係車頭就開車,點知司機不停聽電話又不停兜黎兜去不停咁pickup人上車夜行李,不知不覺架車已經full晒行李放到上天花,但仲係不停咁兜,隔離個外籍女士同其他人明顯覺得架車已經full但對佢仲係不停上客好好奇,我呢因之前一晚聽左個美國籍女士個group taxi事件,所以已經有少少心理準備,最後架十幾人車上左二十幾人,除左二十幾件行李外仲有2架單車,前面一排放埋活動椅落黎坐左5個人,再前少少有人坐樓梯有人坐得一半位仲有一個坐左係佢男友對腳上面,哈

好彩去到碼頭都係9點,司機unload行李時比較粗魯,但係我黎睇其實又好正常,有個鬼妹唔知放左咩係背囊頂一路開車時都好似好擔心咁叫前面個人幫佢小心睇睇個袋唔好比佢跌落地(我心諗咁死多人點會點得落地最多跌落d人個身上面者),咁unload到我袋時又一野倒轉跌左兩級落樓梯,個鬼妹仔已經緊張到極點一見佢自己個袋就係咁叫小心小心唔好掉,我心諗ed地方你怕爛就一早用自己隻手羅住啦,我揹好背囊後就幫襯d小朋友買左兩個包(前一晚唔記得買定野上船食,早餐時又因掛住點去碼頭唔記得羅佢幾塊面包,幾驚去到碼頭都冇野食買)

行去碼頭時又有兩架船,當然又要比ticket加口講去金邊再加睇下隻船有冇寫去邊啦,睇左又問左真係去金邊,行李比低佢地就搵位坐(其實一路我都對行李搬運有比錢既心理準備,點知冇人問我羅錢,哈),因想睇風景所以就好似其他人咁坐出面,見人上左船頂,問點上佢話冇梯所以我最後係爬上去既,隻船其實開緊仲要幾快下船邊呢冇欄得兩隻腳位咁窄,一不小心就會跌左落海,哈

上左去好大風但幾舒服,睇左陣水上屋就沿住tonle Sap River(洞里薩河)一路開船,條河大到好似個海咁,風景唔錯食住野都ok但我係船尾d水花開始飛晒上黎,加上出左遠少少已經除左個天同d水已經冇咩睇,而且船程要5-6個鐘咁吹法都好睏下,所以爬番落下層睇下有冇位,落去時梗係要好小心啦,離岸越遠佢開得越快,落左水停得船黎開番轉頭應該都浸死左了特別係我唔識游水既人,哈

落到樓下見都唔算太多人仲有位坐,行去船尾去個廁所再搵地方坐,發覺全船唔計柬埔寨人就得3個亞洲人,果兩個應該一個係日本人一個係韓國人,我呢就做左中國同香港既代表,心諗佢地應該唔係搭旅遊巴就係坐飛機,邊得我咁好閑情咁貴坐船睇風景,係船倉訓左陣又出去睇下風景,見到有人落船,但因冇實際碼頭,果2-3個當地人係坐一隻駁船走既,而果隻駁船其實即係香港既獨木舟再大少少咁上下既東西,上船時左搖右擺好易跌落水,落完人又再開船,再睇番附近既環境,有少少岸邊又有d木屋仔高腳屋仲有好多細細隻既船仔係度捉魚,都幾老式既網魚方式,d人又一路好熱情咁揮手,個感覺都幾得意,但因陽光實在太好而且隻船又太快我又懶羅大機出黎,所以d相好難影

過左陣就離開左有岸既地方,睇gps果度應該係kompong(磅湛),睇錶應該2個零鐘就到,所以就係出面曬下太陽訓下甲板,點知好境不常,隻船居然行錯路,d水睇黎都幾淺下,攪左一輪又拉繩又停船又問經過d船仔又倒船先走到,睇gps,佢都行錯左好大段路,已經遲左開船仲要行番轉頭,頂,最後不知不覺中我就又係甲板訓著左,起身時曬到一忽忽,睇下個point見都唔係爭好遠就到,睇錶差唔多3點,咁計落都唔係爭好遠,可能佢開得快想追番d時間掛,最後未夠3點就到,雖然同我本身7點開船計落既時間爭緊幾個鐘,但都未天黑仲有時間行下,落船就見一班人過黎拉客,我當然唔理去搵我個名啦,卒之見到個driver,佢話1點半已經係度等緊我,我同佢say sorry話遲開船同行錯路,其實船時間咁難control而且又要貴巴士成3倍,怪不之得唔算太多人,但太陽同風吹吹下都幾舒服而且景還可,有時間有閑錢可以試一次既

上左車好快就到gh,個名叫fancy gh,位置都算近market,但就係偏少少既橫街,起初睇d人講到好靜咁仲以為係冷巷,anyway,要左最高既一層,雖然要行樓梯但高d個景好d我都唔mind,上到去間房都幾唔錯,個露台仲幾大而且個view不錯,比25蚊都抵既,放低野就唔好浪費時間出發

首先當然係搵食,行左去Central Market(Phsar Thmey,金邊中央市場)附近既Khmer Dessert食椰奶咖哩麵,佢除左咖哩麵出名外甜品評價都幾好,但我甜品一般而且要留肚所以冇試到,個咖哩麵(我都係用手指要黎食,對食緊果個係麵定麵線定米粉有少少懷疑),不過味道幾特別又足料,而且d柬埔寨茶都幾好飲(我係依間鋪卒之明白點解之前其他食檔會比個吉杯一定加埋支飲筒比你斟茶,睇佢收野原來係就咁倒左d水同埋飲筒就會比下個用,個杯唔洗架原來,哈)

跟手行下中央市場,幾特別既design,當中有d食市,好似幾好味咁,食左個好好味既法包,酸酸辣辣加埋牛肉夾埋一齊食,真係好正

再黎諗住沿住佢其中一條主要道路Monireth Blvd(金邊得幾條大街有名,其他都係用號碼就算,但有門牌總比澳門好,對我黎講搵地方尚算方便,哈),行去食南瓜布甸,點知行到去都唔多見有得賣,只見有包有其他麵檔既東西賣,搵左陣都冇心諗可以資料太舊冇左就算,求其坐低要左杯fruit mix,依度既mix同siem reap唔同,多左榴槤同埋生雞蛋,仲比siem reap果d再甜d,但係外地我對甜既容忍度大左,所以冇咩問題

跟手見未天黑,想去河邊睇睇日落但行都有段距離所以就坐電單車去,話要去河邊又指地圖佢同我講國語原來係華僑,講講下仲講埋廣東話添,車算隱陣(金邊交通比siem reap甚至越南差得多,十字路口兩線行車可以個個方向都有車行緊埋黎,倒頭車非常極之普遍,如果十字路口過一條馬路你要睇8個方向,而且之前d地方雖然多車但唔知係交通好定d人技術好d,都唔見撞車,我一到金邊第1日已經見兩次撞車)好快就到左河邊,要左2千柬錢都算平,佢係咁問我係咪自己一個又問留幾日等等,我當然唔會話自己一個旅行,就答佢我到先周圍睇下野朋友就到,到步後佢又問我之後去邊又話可以打比佢想做埋我其他生意,但因本身book左tuktuk所以就同佢講等朋友到埋先,金邊黎講我始終有少少保留,但上得車佢個樣都算老實而且又講廣東話如果要電單車用可能都會打比佢唔奇

到左河邊見到皇宮,因之前睇過報導話果度入夜唔多安全,但實際人非常之多雖然比較黑但好熱鬧,唔知係咩節日定廟會,好多賣花人(d花好得意本身一舊咁用手摺摺下就會變成花咁),賣雀(要黎放生既),仲有d羅住個碌友皮點蠟燭唔知要黎做咩既小朋友係度,再行前少少就好多散步人士,完全唔感覺到太雜既感覺,所以天黑後都係咁易行下睇下野,但我部大機影都只係影幾張相就會收番埋,唔會一直咁掛係身行街咁危險,哈

再行行下就去左一個街市,原來金邊既街市咁夜都開,仲要好熱鬧,但就真係好黑(相iso較高左,實際冇咩光條街雖熱鬧但好黑),d人都唔知見唔見得清賣咩,數錢又隊得好埋先睇到,而且都好多小檔口賣野,感覺好似幾十年前既香港(睇舊相),又唔算多遊客,我好中意個感覺,雖然一地垃圾又周圍塵但都係求其街邊食左個鴨仔蛋又食左個好似鼻涕感覺既甜品(後尾check番原來係紅豆糯米椰奶)仲買左個竹葉既東西番gh食,開頭以依個係竹葉蕉後尾打開先知原來係之前係siemreap食過好咸同好大味好似咸魚既東西,怪不知咁多配菜,番到去沖完涼咁易食左d就算(係露台食條街好靜而且冇咩光個感覺都幾舒服),而且太大味所以我放左佢係廁所個垃圾桶,因有蓋唔係應該成間房都係味

雖然第2日約左8點,但因冇咩做最後11點零就訓,張床對正個冷氣而且張被好薄,所以要開到27度先叫好番d(因安全問題唔開得露台門訓),唔係凍死


<25/12/11to04/01/12>
Photo Link <<<<<<<<<<<<<<

No comments: