聽完盂蘭講座行番出去搭丁丁,途中經過太和街街市,之後其實影過下,不過今次有大機係身而且岩岩係買食送時間,所以影左少少相,ed咁既街市e種咁既擺賣方式亦係就快消失既產物,盡力既去影低當中既一事一物只係唯一可以做到既野
夜晚7點幾到左箕灣盂蘭勝會,依度已經係第67屆舉行,聽明哥講好彩依個仲有人出錢出力咁去支持,而且睇落裝飾華麗,大士殿亦加晒燈咁,一d都唔簡陋,但人就真係少,唔知係咪因已經係最後一日而且無大戲做,所以唔多見街坊,因有有份攪既工作人員,道士同埋某d攝影人士,我地當然係其一既一份子,但下晝聽左個講座再實地現場講解又真係睇得明好多,幾年前前去過紅磡睇過,果時好熱鬧但就完全唔明攪乜,只係覺d紙紮像好靚好有氣勢,而且果時都唔多敢影相,可能唔知盂蘭勝會故事掛
送神儀式首先由道士唸經再每個台咁行暈晒再番回台唸多陣一排,咁之後就開始送神上木神台度,之後就由場地送番去幾條街後既廟存放,我地跟住佢地出去,之後再見佢地手台樓梯手台到身水身汗,之後再好敬重咁去放上廟既神台面,一個個神咁做,好神性,所以我影完相後,都好專重咁合拾拜拜,老實平時我真係唔會咁對住d神像影相架,有d人仲用晒閃燈係咁影,其實真係唔係咁好
番回場地,工作人員又要接手做送大力王既儀式,首先要放晒d其他官員黑白無常等等出黎再幾個人一齊手台大力神上手推車,之前其實有少少儀式要做,話說幫手既人都好落力,嬸嬸點完香後就分比人燒燒拜拜,我當然二話不說即做(一直就算冇香入廟都要拜拜神),但見唔係太多人接只係掛住影
之後大力王就開始要出巡,因太大個既關係,出左少少意外,攪左一輪先上到車,推出場地門口時又要避開d門框電線天橋等等,不過係街度係咁行,真係幾有氣勢,當然啦,大力神出遊就係要趕番d鬼仔走,有氣勢係必然的,我地一行人當中有道士唸經有人打銅鑼有人灑豆同米亦有人灑水開路,幾特別,但其實人不算多,所以聽到有個幫手既嬸嬸講無左D細路仔係爭D,之聽到另個推緊鬼王既嬸嬸嗌完"大力王行街呀"又講今年都冇人嗌既,......沿途除左我地班影相人,路邊既路人只係睇睇有D影下相有D好好奇咁望下望下,如果我係幫手果班人,其實都幾洩氣下架,而且除左手台神台上樓梯外,聽到有個中年阿叔嗌手軟,睇落成班人都有一定年紀,而且女士居多,可能做ed活動,相對黎講男士時間冇咁多亦冇咁熱心啦,香港傳統既習俗,除左市民同政府唔多重視外(有時仲要投訴噪音,空氣等等,聽講大力王巡遊已經縮短左路程),青黃不接其實都係一個大問題
總之講起文化及建築保育就真係,唉.唔係話政府冇支持,佢地成日都講支持,但支持只係某d有價值即係吸引外國遊客黎睇果d價值,而且好多時仲會攪到不倫不類,大坑火龍已經係其中一個例子,加下又要保育盂蘭勝會,都唔知最後會攪到咩樣,點解傳統野要就遊客呢?依個就係傳統文化既垂死掙扎?
最後我地睇埋化大力王其他官員黑白無常等等再見佢除榜(話比隻馬帶番天庭)再之後係道士們最後的頌經儀式,之後佢地會燒晒所有野(除某d掛布外),而因時間已經11點幾,所以我就走了,不過都算係一個幾特別既經驗睇晒成個場既結尾
努力搵緊其他資料希望可以睇埋其他儀式啦
<14/08/10>
Photo Link <<<<<<<<<<
No comments:
Post a Comment