教堂鐘聲茶粿香 – 鹽田梓悠遊行(Part.01)

貳零壹肆年參月拾伍日 - 教堂鐘聲茶粿香 – 鹽田梓悠遊行

第一次入鹽田梓,今次係睇景睇教堂同學整茶粿,所以好有興趣,不過天色唔太好,個天非常灰,係西貢坐船入去只有20分鐘,星期六,日同公眾假期都有船,而且可能近西貢,所以算多船期

去到碼頭落船已見山頂一間天主堂,下面係一間士多,得一條路上,再上就有另一間屋,好快就到左果間屋,原來係鹽田梓村公所,門口仲有一棵風水樹咁上下既野,係樟樹來的,不過已經空心但又其實仲生存緊,聽講4-6月仲會聞到樟腦味,但我地未到時候啦,原來依度有個傳統,生女呢就會種一棵樟樹,之後用黎做嫁裝既,又幾好想法

係村公所附近,有一排石屋,依度以客家人為主,門口多數有一塊空地,叫做禾塘,係用黎曬禾曬豆既地方,遠望既係鹽田,就係之前係度曬鹽既地方(1909年已停),依幾年又重新來過,不過加下泥多過水,所以未有咩睇到

至於d屋大部份已無人住,1997後已搬走晒,加上只有六日有船(來回35蚊)所以平日既最多只有工人係度9-5點整屋或整鹽田,安排復原舊貌,但依度既屋只可以復修但唔可以出租或買賣,原來牆壁既磚舊時係用糯米石灰加泥黎做,可以keep到好耐同埋亦可防蟲,舊時d人真係有生活智慧

時間差唔多我地正式行前先食左個竹筒飯,真係用竹同炭整既,食落有好香既竹味,不過好似話幾多工序同埋時間整,所以唔係成日有得食,坐係度可望碼頭,唔錯既view

食完就開始行上少少,先睇左舊時依度傳教士既舊居先,行上條小斜路,見有d爛屋係度,不過原來係豬欄唔係屋,怪不知咁細,通常一間豬屋四口住,大中細豬,跟手先到陳慕英修女舊居,個牌仲寫埋別名叫夢大姑,幾親切,之後仲有睇其他幾個神父既舊居,但得一間比較保養得好,其他都好破舊下了,門口仲放左好多舊野係度,都係之前既生活用品

睇完就去左好近既澄波學校,入面係展覽中心,有d農具,日常用品展覽,比較得意既係介紹左個砵,依度會係新年用砵煮豬肉飯返老家過年,仲有個年榚模,要煮一日先得,舊時既野料又新鮮又用時間整,應該好好食,可惜未試過,仲有個有坑圍住既缸,用時會係條坑放水,主要係放糖,咁做就可以令d蟻入唔到去偷食,個缸個名叫激死蟻,有趣,仲有d碗都幾靚,雖然唔算多野睇,但都幾唔錯

To Part.02

[15/03/14]

Photo Link <<<<<<<<<<<<