17 December 2014

台灣花蓮,蘭嶼 2013-06-20to27 - Day.01(20Jun)

貳零壹参年陸貳拾日 - 台灣花蓮,蘭嶼

20 Jun 2013 Thu 台北,台東花蓮Sunny day

再一次去台灣,今次主力係花蓮睇羊駝同埋去台灣最東邊既外島蘭嶼

首先係台北機場去火車站,食過lunch後就坐火車去花蓮,係花蓮車站上的士過今次住既地方木瓜溪民宿,上次住花蓮係海邊,今次係另一邊即係內陸,主要係農田為主,經過一堆好窄既路同埋講係去睇羊駝,的士大佬就知係邊了

去到睇左間房,非常大,而且廁所係木地板,感覺舒服,之後約好老闆出去食晚飯既時間就行去對面睇羊駝,一出門口就有兩隻唐狗出現,仲非常熱情,一黑一啡黃色,因老闆同老闆娘唔知去左邊,所以我地諗住就咁係馬路邊睇下,點知兩隻熱情既狗係咁吠又係咁踏上我身,仲要咬我條褲,睇睇下原來係叫我地去睇羊駝,見佢地入左閘咁我地就跟佢地入去啦,行入去時發覺d蟬叫得非常大聲,而且非常大隻,係我地個頭上面飛來飛去,跟手行行下就見有幾隻羊駝係度,但天氣太熱已經剪毛,仲要係岩岩剪,無左個好似波咁圓圓地既身型,好彩都算剪得唔錯,而且有晒髮型,加上佢地個個隻頭好大好圓而且眼睫毛非常長,仲要唔同表情,有時串串地有時又傻傻地,都幾攪笑

但因近草而且係夏天,我一時唔醒起蚊既問題,雖然帶左蚊膏但只預備左短褲(可能之前既花蓮係海邊而且蘭嶼都係海邊,所以無諗過咁多蚊),佢果d其實唔算蚊而係一粒粒黑色類似香港既朦仔,佢地台灣叫小黑既東西,真係企一陣都咬死,仲要係咬時會痛果隻,所以影果十零張既羊駝相,其實係我係咬到跳起的,所以我都係行番埋入少少好過,老闆娘之後出現,我比佢睇d蚊痕,佢都嚇一跳,仲叫我著長衫長褲,我已經著左長風褸,但隻腳呢真大獲

同老闆娘講開狗狗,原來兩隻狗非常中意痴住人,所以我地睇羊駝時佢地都好乖咁坐係度等我地,而且啡色果隻仲好中意痴住我,佢地個名好難記,所以我就乾脆叫佢地小黑同小棕算了

之後睇過比蚊咬左幾十粒,仲非常痕,好彩支蚊膏夠大支可以幫到我,不過就真係好痕

之後6點零就出左去市中心食飯,周圍睇下行行下去左邊頭既一處非常日本感覺既河邊,因唔知食咩,所以求其去左食羊肉,間野叫北港羊肉大王,叫左幾種菜同一支啤酒,樣樣都好好味,而且出面係馬路同河,唔算太繁忙,感覺非常不錯,而且見都有幾多街坊,估唔到咁都搵到好野,所以已經諗定左點都要食多次

食完番去就見有其他人到左,老闆帶我地出去睇花(穗花棋盤腳),佢話係夜間先開既花,都幾香下,之後睇下魚睇下蝦咁,因房上唔到網,所以就係大堂上下網,見到d蟬飛左入黎,但反轉左唔識轉身,係度喪嗌,喂手小棕入左黎,仲咬起一隻蟬走左出去,隻蟬係佢口係咁叫,個情況真係非常攪笑,

約好聽日一早起身睇羊駝食早餐同包車睇太魯閣,所以都差唔多就訓了,,訓前感覺到地震,雖然無之前係意大利果次咁強,不過張床都係震的,睇番原來相隔無幾遠既村有4級地震,希望之後無再震就好了


[20to27/06/13]
Photo Link <<<<<<<<

No comments: