play list

18 December 2014

台灣花蓮,蘭嶼 2013-06-20to27 - Day.02(21Jun)

貳零壹参年陸貳拾日 - 台灣花蓮,蘭嶼

21 Jun 2013 Fri 台東花蓮(北邊)Cloudy day

一早起身餵羊駝,可能知道有得食,一早已經企近路口等食,去到因仲係好多蚊,所以我餵兩餵就走人,d小黑實在太勁,就咬死

跟手番大廳食早餐,食完就叫老闆車我出去買長褲先去睇其他地方,我仲講下次夏季唔會再黎花蓮,老闆話真正既夏季會少d,反而開始踏入夏天同冬天先會多蚊,仲話一粒小黑咬完人會可以生到7隻小黑,聽落都痕死,仲話d血酸性先多蚊咬,總之就好慘

搵左陣去到街市既地方先搵褲買,個人即係安心晒,之後呢去左第一站松園別館,雖然天色麻麻但望出去個view唔錯,而且環境清幽,老闆話係日本人用過既地方,所以有少少日式感覺

 之後去左七星潭,好似上次住既民宿咁,地下係好多大大細細既石春,而且d水非常清澈,可惜係個天好多雲,如果唔係應該好靚,再去左附近既七星柴魚博物館,有少少舊物件睇,但可看性不高,反而d魚就好趣怪,而且色彩鮮艷,都睇左好耐,但個天呢就開始落雨了

見時間差唔多同埋落雨,所以我地就走左去食lunch,地點係指定既風味餐,個名忘記了,但就係原住民風味,只有set,基本上係一樣既菜,分別只係人多與人少,而且有個貴少少既就有竹筒飯食,見佢地係門口舊石度起勢扑,幾有趣,我地呢就叫左個細既,d野全部都好好食,有地道既剝皮辣椒,都幾辣下,仲有火龍果整既汁落落菜度非常惹味,仲有個麻糬,都唔錯

跟手開始去太魯閣(因對上一次花蓮我地係hea基本上邊度都無去過),首先去左清水斷崖,老闆話加下多左隧道所以安全左,仲指左之前既山路係幾崎嶇,會有落石,所以好危險,之後因要整路,所以局部時間開放,等左陣先入到去,行左一個又一個山窿,到左燕子口,人唔算多(因大車入唔到所以大型旅行團無過黎),山勢好滂礡,而且由山窿望番落河,d石一層層好古老咁(之後睇博物館講因地震加地殼變動,所以一層層介會扭曲既石層),再去左燕子口,慈母橋,長春橋(好多好多遊客同旅遊車),一般般山境,但山勢真係好高,要實際感受先形容到,五點鐘走人了,好彩無落雨可以慢慢睇

最後去左自強夜市,好似講到人人去親花蓮都要去既夜市咁,地點都幾遠下,其實都好細,食野既街主力只有兩三條,買左pizza(依個好食),仲有羊肉飯(開初只想買牛肉,點知原來係set,好多野而且仲幾平下),最後係日落前番到民宿,去左天台一路食一路睇景,見收太陽時有一陣雲定霧係d屋頂,但太遠好難影,睇住日落食,到夜晚以為有星,點知都係無,等我仲帶埋腳架添,希望蘭嶼有機會用


[20to27/06/13]
Photo Link <<<<<<<<<<<<<<<<

No comments: