10 March 2010

歐遊(倫敦,巴黎,巴塞隆拿) 2008-04-30to12 - Part.07(05May)

貳零零捌年肆月貳拾至伍月拾貳號 - 歐遊(倫敦,巴黎,巴塞隆拿)

05 may 2008 Mon Paris Sunny day

法國站已差唔多尾聲,我地去埋今日既行程後6號既下畫就會搭火車到西班牙lu,所以plan左係依晚出去食飯,我地經過多日格價後,決定左會到番rue Mouffetard食飯,因為好似平d同選擇多一d

講番本身既行程,一早到左Marche aux Puces St-Ouen既跳蚤市場,但感覺一般,因為賣d野唔多岩睇,質素好似仲差過深水土步果d,sell野同周邊既人望落亦唔多友善,攪到我地唔係幾敢影相係咁倚行左2-3個圈就好快走左lu,但佢旁邊有d粉紅色花既大樹幾靚,雖然我冇影到但係兩旁大樹下行番陣都算係有番d收穫
之後去左羅浮宮(Musee du Louvre),比起凡爾賽宮易入場得多,唔係排太耐隊已經買左飛入場,9歐睇全場唔包Hall napoleon,係casher對出既地方做左幾十個國家語言既map,型

依度共分4個場館,每個有3-4層,入面既畫,石像同埋其他展品又好岩我睇,真係行到腳都跛埋,da Vinci既Mona Lisa我反而覺得一般,反而其他熟口熟面好大好大幅既畫反而有興趣d,但名當然係唔多記得啦,哈

羅浮宮因太大既關係,我地行行下又停,停完又再行過,中途休息左好多好多次,印象中係維納斯像(Venus de Milo)既場館中逗留得最耐,果度唔係多野睇相反打通幾間房大到爆既展場中就係得維納斯像一個,我地笑佢人地個個場都十幾廿個石像一間房佢就一個住咁大地方入面仲空框框咩都冇,維納斯真型,之但係其實又有幾張登都唔算空框框既,因果度地方好大,我見人流唔算太多就係遠少少既登度訓番陣,之後唔知點解好多人好嘈,我只好起番身同儀研究下一批又一批既遊客係咩國家既人,唔好以為我地無聊(雖然我地係法國一得閑就會咁做),其實仲有d仲無聊既事發生左係依個展館,話說我地研究人種當中,有一個男人捉住個工作人員係咁係咁講野又指手畫腳,望番果個工作人員表情及企得極為無奈及串樣,但仲好似好有耐性咁聽個男人講野,事情一路維持左成個鐘有多,佢女友由企係旁邊無奈等候直至坐底但轉左幾十個無奈pose個男人仲講緊,我地除左笑佢女友showoff左幾十個版本既無奈表情外,仲研究下個男人有咩咁好講,睇落又指褲又指腳,估計佢應該係投訴緊d人睇展覽著得太求其,唔多專重個場要管理人睇下d人既衣著先比人入場掛,儀笑我如果佢早入黎少少見我係張登度訓覺佢應該會投訴埋我,哈,另一邊箱,我地又發覺有對韓國母女係度嘈交,儀仲見個阿媽嘈嘈下一野星左落個女度,攪到個導聽耳筒甩左落黎條條fing咁吊左係個身度,之後個女一直比老母鬧到眼紅紅當中只係係咁易反駁番一兩句,黎到依度我地一方面要望左手邊既投訴男同無奈女,另一方面又要望右手邊既韓戰,仲要幫佢地兩個配下音,真係好忙,哈哈,真唔明個無奈女同韓國女唔一野走左去,比著我地一早就采你都傻走左去啦仲要係度攪成粒鐘,不過佢地咁有能耐又真係比到十足娛樂性我地,哈哈

無聊夠後我地發覺已經好晏,就離開場館出番地面食下一早準備好既麵包食下野影下羅浮宮既外貌等等,儀仲中左一野雀屎,其實佢一黎法國已經成日話好多白鴿成日都驚話中屎,但我話個天咁大個人咁細範圍邊有咁易中丫,點知佢真係好彩,仲鬧點解唔中我,有時d野就係咁橋,哇哈哈

落番場館再行埋要去既地方後就差唔多關門lu,之前講過我地要去番rue Mouffetard食晚飯,所以就搭metro去睇下邊間餐廳岩食,行左陣格下價後有個老細係門口嗌住我地,佢話有英文menu又見價錢ok,所以就坐低叫左個set dinner食番餐肉落肚,真係食包同食麵都食到暈,有扒食不知幾幸福,個set入面有紅酒仔一杯,極豐富既頭盤,有少少睇頭既扒同埋餐飲甜品,但個dessert因為係用酒做,都幾梗,攪到我飲完啤酒又飲Vodka,面都紅晒,但兩個人加埋只係41.8歐,真係相當不錯lu,我地仲羅埋佢d麵包走,又慳餐,真好

入黑後再到羅浮宮影下夜景,同日頭係另一個感覺,但我因溝過酒,手有d震攪到要用垃圾筒黎當腳架影相,好彩佢都算乾淨唔太臭,哈

Part.08(06May-PAR)

<30to12/04/08>
Photo Link <<<<<<<<<

No comments: