09 October 2013

台南市,台北,新竹_內灣 2012-10-14to19 - Part.03(16Oct)

台南市,台北,新竹_內灣

16 oct 2012 Tue 台南市 Sunny Day

一早起身去左國華街同民族路三段食早餐,朝早好熱鬧好多食店而且係街市式感覺,難怪咁早關門啦(多數係7點收),經過左阿娟肉粽魯麵,好多人排隊,但我地無食到反而去左食阿松割包,我要左豬舌割包,好似中式漢堡咁,但都幾好食

之後買左金得春捲又係好多人排隊既富盛號食左碗粿同碗魚,仲岩岩有人走所以可以坐低食,碗魚無咩特別但碗粿好得意,感覺似豬油又或者鹵水汁雪凍左既感覺,望落好似好油但原來食落唔油而且相當好味,我仲順手係佢隔離既車仔阿叔度買左個唔知咩榚,佢d國語好難聽,佢up果下我仲記得係咩榚之後忘記左,跟手搭的士去安平,係車上食左依個咩榚,味道好似鹼水粽,好奇特

坐左一陣車,去到一d好似郊外既地方,又有果種台中既感覺,方圓百里都唔會搵到的士既預感,之後去到安平,首先直去安平樹屋,入去之前食左個金得春捲,開頭以為唔怕凍食,點知原來有汁,個皮林晒,感覺一般

買過飛後首先去左德記洋行,我比較喜歡佢地下既天花,木板加上淺藍色感覺舊得黎舒服,睇左陣入面既展覽品就過左去樹屋睇,都幾大下而且d樹好壯健,d根好多而且係樓上睇仲騎住晒間屋,幾特別,再前少少有個水池仔,望出去係一片紅樹林,之後番入老街搵野食,但平日都係冇咩小鋪食野,只有一間叫安平小吃觀光文化館既東西,食左比較出名既周氏蝦卷,都幾多蝦肉味道唔錯,而其他鋪多數係買蜜餞之類既咸濕野食同埋記念品既地方,嗯

之後去左搵台鹼宿舍區,真係頗日式木屋但大部份已經比圍欄圍住左(後尾睇番網上既相似乎搵錯左,果然功課無做足係會miss好多野架下,哈),再後經過左安平古堡,要錢所以冇入去,經過周龍殿,影左兩個靚靚門神,再行下老街搵下安平特色既劍獅,但時間唔多所以搵左陣就走人,經過樹公王,去左舊式店舖買左野飲,果支懷舊黃色類似汽水既物體,係完全無汽而且好甜但有一種小朋友好中意既感覺,我細個應該飲過的,再番小吃文化館,encore左蝦卷食左魯肉飯蚵仔煎但無食出名既鼎邊趖,因感覺好似好熱既東西,所以無食到

之後走人諗住去睇綠色隧道,點知得2點幾既scheudle船(又係冇做功課既後果),其他要夠人先開,15人我地得4個都係算了,的士司機推介附近有咩睇,我地揀左去全台最大既鹿耳門聖母廟,去到果然大到爆炸,好似故宮咁款,因係平日無咩車約左司機9個字後番黎接我地,入左最正中既廟,d柱d牌匾d天花,嘩,真係好舊,正呀,睇左陣,行左去旁邊既建築度,冇咩睇仲見招租唔知咩咩殿既位置,我估係用黎放神像供奉既東西,ed野都原來有得招租,行左番入正中最入既廟堂,又係好大,仲撞到個fd行緊(原本我自己入去睇既),講起原來係小五講既最靈既月老廟,難怪佢講好遠啦,一路行上頂樓,係樓梯兩旁放滿結婚相,感覺真係好堅,我呢就無拜而朋友因順手所以就拜拜月老啦,因時間太晏,無咩廟祝,就自己搵,係眾多神像中卒之搵到月老,睇左介紹知道左點拜攪左一輪已經夠鐘,番出大門的士已到,再後黎諗住開車到伍角船板,聽講台南依間係第一間,但去到已經冇左,又係冇做好功課呀下

因司機趕時間,放番我地係老街就走人,又岩岩走左架公車要等好耐,街又冇的士,後尾學左係台中果招入7仔試下叫佢幫手call車,真係work的,仲要唔洗錢,下次去台中台南依d無咩車既地方,都要咁做

番到台南市中心周圍搵下野食,去左食成行成市既當歸食物(好多當歸鴨當歸羊等等),係一間叫岡山羊肉既地方食左個當歸羊同叫左個小抄,因成間鋪都無咩人,其實都驚驚地,但個當歸羊一入口,唔難食就知道安全了,食食下開始有人買下賣又或者入店食,睇番原來係岩岩開門無幾耐,仲做到半夜3點,台南人原來真係唔洗訓的

去番原先第一日間cafe度食雪榚再入左過幾間另一個cafe度飲野,都係老鋪加新裝格局,但無咩人而且有陣怪味,雖然靚靚地但感覺一般,飲完野出番去買生果,間鋪都係出名既,叫泰成水果店,新鮮入口生果,唔平,但味道幾好,之後番歸訓覺了,第二日就走人番台北了

Photo Link <<<<<<<<<<<<<<<<<<

No comments: